Éxodo 34 - New Testament with Old Testament portions

Yuus Moisésan chicham umiktinan ataksha susamu

¹ Tura Yuus Moisésan ataksha chicharuk: Kaya tablaya numamtin najanamu kupirmam numamtin jimar najanata. Turam nain iwakta, turawakmin chicham umiktinan nuik aarmaj turusnak ataksha aartajai.

² Kashin káshikmasam Sinaí naintrin wakatin asam iwarnasta, nain wakakmin wainkattsan wakerajme.

³ Turasha nu tsawantinka Yuus taatin asamtai, shuar aina tura tagku ainaksha Sinaí naintri tesamunmagka wakacharti, tusa Yuus tinaiti.

⁴ Timau asa yaunchuk najanawa turusag kashin tsawak Moisés káshikmas, kaya tablaya numamtinan jimaran najana juki we, Sinaí murariin wakauwaiti.

⁵ Tumamtai yuragmia numamtinnum pachitkau tarauwaiti. Tuma Moisésan Yuus nina naarin pachis ujak:

⁶ Wika Yuus wait anenkartinaitjai, wika Yuus wári kajechuitjai. Wii etegkamu ainanka wika senchi anenaitjai.

⁷ Wina anenkartutairka yapajintsuk tuke awaiti, tura shuar tunaun takasu akusha tsagkurturta tusa turutkaigka wika tuke tsagkurnaitjai. Turasha shuar tunaun takasaru ainan, tura nita uchiri ainan, tiragke ainan, tiragke uchiri ainan tura nuna tiragke ainancha waittan suwaitjai, tusa tinaiti.

⁸ Tusa takai Moisés nugkan antiastatuk tsuntsumaa Yuusan emematuk

⁹ chichaak: ¡Wina apuru! Ika amina chichamrumka nekas umichu ainaji, turasha ii ainatin nekas anegkrakumka ina tunauri tsagkurkarturta turukratam amee shuar amajkartusam uyunkartusta, tusa tinaiti.

¹⁰ Takai Yuus Moisésan chicharuk: Wii atumjai chichaman umiktataj nu shir antuktarma. Atum tuig pujustin ainarum nuigka yaunchuksha chikich nugkanmagsha wainu jakchamun wainchatai ainan wii iwainakai wainkatin ainarme.

¹¹ Atum umiktinan chichaman yamai tajarum juka metek umiktarma. Tumakrumin atumsha wainmaunam, amorreo ainan, cananeo ainan, heteo ainan, ferezeo ainan, hebeo ainan tura jebuseo ainancha ashi jiirtinaitjai. Turan nita nugke ainanka atum pujustarma tusan amastinaitjarme.

¹² Atumka wii nugkan anajmatawaitjarme nui pujustin ainarme. Nui pujakrumsha nita pegkerchau takatairi aina unuimarairum nitajaigka chichamka umiktin airpa.

¹³ Antsu nita yuusrimtairi ainan emematainak tagku aina maa patasa epetairi ainaka ashi tsairatarma.

¹⁴ Wika Yuus kajenaitjai, tumau asamtai chikich shuar aina yuusrimtairi aina nuka emematirpa.

^15-16 Nu nugkanmaya shuar ainaka nitak najanawar yuusrimamurin tagkun anajmatawar maa epenak, nuna namagken yuinak atumsha yuatarma tusa turammain asarmatai atumka nitajaigka tsanigtin airpa. Nitaka wina emematrutsuk nitak najana yuusrimawar ememataina asar, tunaun takaina nuna uchi aina wainkar nitasha turusag tunaun takasarai tusarum atumin uchiri aina kuitamatarma. Nuiyasha atumin uchiri aina, nita takamurin pegkera iman iiyainak nitan nawantri ainan nuatkarai tusarum kuitamatarma tusa Moisésan Yuus tinaiti.

¹⁷ Yuus atii tusarum jirujai najanarum emematirpa.

Chiki chikichik uwítin jiistamatin pachisa timau

¹⁸ Atum chicham umiktinan tinaitjarum turusrumek, pan levadurajai pachimtsuk inarkamu yutai jiisat jeamtai jiistamkurmeka siete tsawan pan levadurajai pachimtsuk inarkamu yuattarme. Nu jiistaka chiki chikichik uwítin nantu yama nagkamchak achiamunam jiistamtin ataarma. Egipto nugkanam pujarmin nu nantutin jiirmiajrume.

¹⁹ Atumi uchiri iwairi aishmag aina, tura atumi tagkuri vaca uchiri aishmag aina tura oveja uchiri aishmag yama nagkamchak akinkaru ainasha winau artatui.

²⁰ Chikichik burro aishmagkun petsakmataigka oveja aishmag chikichik surustatrume, nu turachkurmesha cabra uchiri aishmag chikichik surustatrume. Antsu nu surachkurmeka burro uchiri kuntejnum tsupikrum maatarma. Tura atumin uchiri aishmag akinamtaigka chikichik anentak surustatrume. Chikichkiksha anenkan wina surachiatkugka winaka emematrishtatui.

²¹ Ashi atum takastasa wakeramuka seis tsawan takastarma. Turasha siete tsawantinka árak aratai tsawan akaisha tura árak juutai tsawan akaisha ayamratarma.

²² Arak yama nagkamchaku jukmau aina pachisrum, tura árak inagnaku jukmau aina pachisrumsha jiistamatarma.

²³ Wika Israel ajakua nuna Yuusriyaitjai, ashi aishmag uun ainaka chiki chikichik uwítin tresa imajnia wina emematriarti.

²⁴ Chikich shuar aina nunaka wii jiirartatjai, turamtai atumi nugkegka nukap atatui. Atum ainatiram wina emematrittsarum wii pujamunam winakrum atumi nugke ikuakrumnasha pegkesha atantramkichartin ainawai.

²⁵ Tagku maarum epeakrumsha nuna numpejai tura pan levadurajai pachimra najanamusha nu tsawanta nuikika epeawairpa. Nuiyasha kashin tsawaku yuami tusarmeka, jiisat Pascuatin tagku maarum epeakrumsha namagkegka ampirairpa.

²⁶ Wina emematrittsa iruuntai jeanmagka araka jigkai nekas pegker aina iisrum itatarma. Cabra uchirigka nina nukuri muntsurijaigka inarkairpa.

²⁷ Tura ataksha Yuus Moisésan chicharuk: Ame tura amee shuar aina umiktinan amijai chichaman umikaj ju aarta, tusa tinaiti.

²⁸ Moisés Yuusjai chichaak Sinaí naintrin yurumkan yutsuk tura umutsuk cuarenta tsawan tura cuarenta káshi pujusuiti. Nui pujus kaya tablaya numamtin jimar najanamunam chicham umiktin ainan diez aaruiti.

Moisés Sinaí naintrin pujau Yuusjai chichas umik waketkimu

²⁹ Yuusjai chichasu asa, Moisés nina yapi winchamtin jasuiti, nu tumamunka nekamatsuk nainnumia waketki ni shuar aina pujuinamunam chicham umiktin ainan kaya tablaya numamtin jimarnum aarmaun juki jeawaiti.

³⁰ Tuma jeamtai Aarón tura ashi israelita ainasha wainkar ashamaina asar Moisésan jearcharuiti.

³¹ Tumainakaisha Moisés nitajai chichastasa untsukaruiti. Yama nagkamchakka Aarónkan untsukuiti, tura israelita apuri chikich ainancha untsuk ikanak chichasuiti.

³² Tura nuiya ashi israelita aina jeantaru ainawai, tumawarmatai chicham umiktinan Yuus timaun nitan ujakaruiti.

³³ Nuna ashi nitan ujak umik Moisés yapin nukukuiti.

^34-35 Antsu Yuusjai chichastasa Yuus ememattasa iruuntai jeanam wayakka yapin nukutsuk waya jakuiti. Tura Yuusjai chichas jiiniakka israelita aina ashamrukarai tusa yapin jaanchjai nukuk israelita ainan Yuus timaun ujajakuiti.