Éxodo 33 - New Testament with Old Testament portions

Yuus israelita ainan atum pujustinnum wetaarma timau

^1-6 Yuus Moisésan Sinaí nugkanam pujuinan chicharuk: Israelita aina Egipto nugkanam pujuina jiiruitam nu, yaruakam atumi uuntri Abrahaman, Isaacan tura Jacob nu ainan chicharkun: Atum weantu ainan nugkan susartinaitjai tusan anajmatawaruitaj nui wetá. Nu nugkaka shir pegkeraiti, árak aramsha shir tsapainiar neren ainawai, entsa ainasha nukap iruunin ainawai tura tagku ainasha nukap pampain ainawai. Atum wetinan jintan inakturmastinan, tura shuar wina umirtichu cananeo ainan, amorreo aina, hitita aina, ferezeo aina, hebeo aina tura jebuseo aina jiirtinan nayaimpinmaya shuaran akuptuktatjame. Israelita aina enentaimkachu asar jinta wesar tunaun takainakai kajerkan ijinawaraij tusan uyuntsachartatjai, tusa Yuus tawai titá tinaiti. Timau asa Moisés shuar ainan nugkutai orojai najanamu aina nuka utsagtarma, tusa tinaiti. Nuna antukar shuar aina senchi wake mesekaruiti. Timau asar shuar aina nui nagkamagka nugkutai orojai najanamunka nugkurcharuiti.

Wayar Yuusjai chichatai jea nuapjai jeamkamu

⁷ Moisés Yuus turata timau asa, israelita aina pujuinamun ikuki nuapjai jeamkauwaiti. Nuna tura umik, Yuusjai chichastasa waitai tu anaikauwaiti. Shuar Yuusjai chichastasa wakeraka nita pujuinamunmaya jiinkiar jeawar nuap jeanam wejakaruiti.

⁸ Moisés nu jeanam wayaattsa weakaigka ashi shuar ainaka nita jeenia aa jiintrar wajasar iiyai iiyainakua nuap jeanam awaya jakaruiti.

^9-10 Nu jeanam Moisés wayamtaigka wárimas yuragkim utsanu. Tumakai israelita ainaka Yuus Moisésjai chicha asamtai, nita pujuinamunmag tikishmajakaruiti.

¹¹ Moisés nuap jeanam wayakka chikichik shuar amikrijai chichauwa numamtuk Yuusjai igkunia tuke chichajakuiti. Nuna tuma israelita aina pujuinamunam waketu jakuiti, turasha Josué Moisésan yayájakua nuka nuap jeanmag pujujakuiti.

Yuus Moisésan senchirin iwaintukmau

¹² Moisés Yuusan chicharuk: Ame israelita aina jintintawarta tusam turutnaitme. Turasha wina yainkatin pachismeka turutchauwaitme. Tura nuiyasha aneajme, tura wii aminka etegkawaitjame tusam turutnaitme.

¹³ Ame nekas wina etegtua akumka, israelita ainatijai wari turattsamea wakekauwaitam nu pachisam ujatkata. Nu pachisam ujatkakmin, nekaspapi Yuus yainkattawa tusan titatjame. Ame winau arti tusam etegkartua asam, inka kajinmatkartukipa, tusa tinaiti.

¹⁴ Nuna tusa takai Yuus chicharuk: Iturchat atsamunam weti tusan, ame wetatam nuigka ima wiki uyuntsattajme, tusa tinaiti.

¹⁵ Tusa takai Moisés Yuusan chicharuk: Ame uyunkartuschatin akumka jiintrarum wetaarma, tusamka tichattame.

¹⁶ Antsu ame uyunkartakminka chikich shuar aina nugka ii pujustinnum pujuina nu ina chichartamainak Yuus etegkamuapi ainawa tusar nekarmawartatji, tusa tinaiti.

¹⁷ Tusa takai Yuus chichaak: Nuka nekas tame, wika aminka nekas aneajme, tura wii aminka etegkawaitjame, tusa tinaiti.

¹⁸ Tusa takai Moisés Yuusan chicharuk: Amina wainkattsan wakerajme, tusa tinaiti.

¹⁹ Tusa takai Yuus Moisésan chicharuk: Wika Yuus asan, shuar ainan wii wakeramunka wait anentratnaitjai. Tumau asan wii ashi senchirtinaitaj nuna iwaintuktatjame, tura wina naarnasha nekamtikattajme.

^20-21 Turasha wina iyashruka wainkashtatme, antsu wina iyashrun wainuka jamainaiti. Wii pujamu yantamnum muchig puja nui juakta.

²² Ame wajamunam wii nagkamaktasan muchig wa amaunam awajsattajme, turan uwejrujai jiimin epenkan nagkamaktatjai.

²³ Tura uwejrun jusamtai wina tuntupur wainkattame. Turasha wina yapirka wainkashtatme, tusa Yuus Moisésan tinaiti.