Éxodo 24 - New Testament with Old Testament portions

Israelita ainajai chichaman Yuus umikmau

¹ Yuus Moisésan chicharuk: Aarón, Nadab, Abiú tura Israel shuar ainan apuri setenta yaruakam wii pujaj imajai wakata. Turasha nita ikag tikishmarar pujusarti.

² Antsu ima amek wii pujaj imajaigka wakattame, chikich ainaka imajaigka tachartatui, tura israelita ainasha imajaigka wakachartatui, tusa tinaiti.

³ Timau asa Moisés israelita aina pujuinamunam jeaa, Yuus timaunka ashi ujakaruiti. Turawaram nuna antukar chichainak: Yuus turamaj nuka metek umiktatji, tusar tiaruiti.

⁴ Tuinakai Yuus timaun Moisés ashi aaruiti. Tuma tsawak káshikmas nantaki nain taritkamunam tagku aina maa patasa epetain najana, doce kayan pegker ainan chiki chikichik tribunun apujsauwaiti.

⁵ Tura israelita ainan tunauri tsagkurnar agkan pujusartinan tagkun maawar epeawartinan, shuar natsa ainan etegkawaiti. Turawaram tagku ainan maa epenak Yuusan emematiaruiti.

⁶ Antsu Moiséska tagku numpen tsapa ainanam akanak juki tagku aina maa patasa epetain ukattrauwaiti.

⁷ Nuna tura israelita aina ashi antukarti tusa Yuusa chichamen aujsauwaiti. Turamtai nita chichainak: Yuus turamaj nuka ashi metek umiktatji tusar tiaru ainawai.

⁸ Tuinakai Yuus turata tusa timau asa, tagku numpen juki nitan ukatkauwaiti. Tura nitan chicharuk: Ju numpajai jutikajrum junaka chicham ashi umiktinan suramsamaj nu umikmi tusan jutikajrume, tusa tinaiti.

⁹ Nuna tusa inaiyak, Moisés Aarónkan, Nadabpan, Abiún tura Israel shuar ainan apuri setenta yaruak nain wakauwaiti.

¹⁰ Tumawar Israelan Yuusrin: Kaya shir pegker zafiro tutai nayaimpia imau wigkanam najama wekan wainkaruiti.

¹¹ Tura wainkamsha Israel shuar ainan apuri Yuus pegkerchauka amajkachuiti, tura nina emtin yuawaru ainawai.

Moisés Sinaí naintrin cuarenta tsawan pujusmau

¹² Nuiyasha Moisésan Yuus chicharuk: Wii pujaj imajai nainnum wakam nakarsata. Tumawakmin israelita aina, ame jintintatnun chicham umiktin ainan kaya tablaya numamtin ainanam, wii aarmau a juna susatjame, tusa tinaiti.

¹³ Tama Moisés Josuéjai Yuusa naintrin wakauwaiti.

¹⁴ Moisés nain eke wetsuk, israelita apuri ainan chicharuk: Juig matsamsarum nakamsatarma, tumakrum chicham akaisha Aarón Hurjai ujakrum iwaratarma, tusa tinaiti.

¹⁵ Nuna tusa ikuak nainnum wakauwaiti, tuman yuragmia numamtin utsaanar yutuawaiti.

¹⁶ Tuma seis tsawan asauwaiti. Tumamtai Yuus siete tsawanta jui, yuragmia numamtinnumia Moisésan untsukuiti.

¹⁷ Tura israelita aina Yuusa senchirin jiya numamtuk kean nainnum kean wainkaruiti.

¹⁸ Moisés yuragmia numamtin utsaanar amaunam pachinkauwaiti. Tuma cuarenta tsawan tura kashi pujusuiti.