Éxodo 2 - New Testament with Old Testament portions

Moisés akinamu

¹ Nu imanik waitu pujuinaig, chikichik shuar Leví weantu, nuwan nuatkauwaiti.

² Tuma pujus nuwa ajapruk uchi aishmagkun jureruiti. Tura uchi pegkeri asamtai, nina jeen tres nantu uuk apujsauwaiti.

³ Turasha uchi chichiaru asa, nukap tsawan uuka apujmainchau asamtai, sukun kánua numamtinan najana entsa utuawai tusa sakatar, uchin egkea shir nukuk Nilo entsa yantamen saak irunmaunam inanasuiti.

⁴ Tura nawantrin chicharuk: “Umaim urukatig ame ika wajasam iista”, tusa tinaiti. Timau asa ika wajas ii wajatu.

⁵ Tumai faraónkan nawantrisha nina inatairi ainajai entsanam maittsa wuwaiti. Tuma jeaa entsa yantamen wekajkama suku kánua numamtin najanamu nanatun wainkauwaiti. Tura nina inatairin chikichkinak chicharuk: Utita, tusa tinaiti.

⁶ Tama weri itaamtai sukun urak iikma, uchi útu egketun faraónkan nawantri wainkauwaiti. Tura wait anentar chichaak: Juka israelita uchiti, tusa tinaiti.

⁷ Takai uchi umai faraónkan nawantrin jeari chicharuk: Amesha wakerakminka ju uchin umuntsa tsakatmartinan israelita nuwan yama uchin jurerun eatkan uturtajme, tusa tinaiti.

⁸ Tama faraónkan nawantrisha ayu, weme utita, tusa tinaiti. Takai uchi umaisha wuwaiti. Tuma nina nukurinak itawaiti.

⁹ Turamtai faraónkan nawantri chicharuk: Ju uchi jukim amina jeemin apujsam tsakatmatrurta turawakmin akiktajme, tusa susauwaiti. Turamu asa nina nukurig uchinka juki tsakatmaruiti.

¹⁰ Tura faraónkan nawantrin susauwaiti. Turam nina uchiriya numamtuk amajsauwaiti. Tura Moisés anaikauwaiti. Nunaka entsanmayan jusauwaitjai, taku tinaiti.

Moisés Egiptonam pujayat uun jas Madián nugkanam pujustasa tsekegmau

¹¹ Moisés uun jas nina patai ainan iistasa chikichik tsawantin wuwaiti. Tuma senchi takamtikainam waitu pujuinan wainkauwaiti. Nuiyasha nina patain egiptonmaya suimun wainkauwaiti.

¹² Tura ashi iimas shuar pegke atsakai Egiptonmayan maa yaikminam yutua ikuknaiti.

¹³ Tura ataksha kashin tsawak nina patai ainan iistasa wuwaiti. Tumakma mai nitak maanittamaun wainak chicharuk: Amina pataimijaigka maanikaipa, tusa tinaiti.

¹⁴ Tama ni chicharuk: Amekaitam ina apurim, amincha ya chicham iwarin atá tusa turammataiya tame, Egiptonmaya yau maamam turusmek winasha mantuattsamek turutam, tusa tinaiti. Tama wii magkartuamaj nunaka nekartuawaraipi tusa sapijmakuiti.

¹⁵ Egiptonmaya shuaran Moisés maamun faraón nekawaiti. Tura nina suntaari ainan Moisés maatarma, tusa tinaiti. Turasha Moisés Madián nugkanam pujustasa tsekegnaiti. Tuma jeaa yumirmatai amaunam ayaamas ekeemsauwaiti.

¹⁶ Tumai sacerdote Jetro nawantri aina, apari ovejari ainan entsan shikik aakartasa yumirmatnum siete nuwa jeawaruiti.

¹⁷ Turasha ovejan kuitamin chikich aina jeawar nu nuwa ainan tuke turin asar, entsan suritainak atumka menastarma tusa tuinakai, Moisés nui pujau asa ayamruk, entsan shikik oveja ainan aakuiti.

¹⁸ Turamtai nuwa ainasha apari pujamunam waketkiar jeawaruiti. Tumawarmatai apari nitan chicharuk: ¿Urukamtai yamaika nukap megkatsuk taurmea? tusa tinaiti.

¹⁹ Tama nita chichainak: “Egiptonmaya shuar ina ayamrutmak nigki entsancha shikik oveja ainan aakmatai, nukap megkatsuk taaji”, tusar tiaruiti.

²⁰ Tuinakai nitan chicharuk: Nusha tui pujuma, urukamtai ikuknuram yurumak ajamsami ¡werum utitarma! tusa tinaiti.

²¹ Timau asar weriar jukiaruiti. Turam Jetro jeen nukap tsawan pujusuiti. Tumamtai Jetro nina nawantrin Séfora naartinan nuatkati tusa susauwaiti.

²² Turam nuna nuatak pujus uchi aishmagkun akia Gersón anaikauwaiti. Nunaka wika chikich nugkanmaya shuaraitjai taku tu anaikauwaiti.

²³ Moisés Madián nugkanam nukap uwí pujai egiptonmaya apu jakauwaiti. Turasha nina patai israelita ainaka inaku senchi waitkainam Yuusan aujsaruiti. Turam nuna antuk:

^24-25 Abrahaman, Isaackan, tura Jacobon atum weantu ainan turatnaitjai tusa anajmatawa turusag israelita aina waitainan nekau asa, Yuus wait anentrauwaiti.