Éxodo 19 - New Testament with Old Testament portions

Israelita aina Sinaínam jeawar pujusarmau

^1-2 Israelita aina Refidim pujuina jiintrar we wenakua aya nugkanmag nain Sinaí tutai pakarin jeawar pujusaru ainawai. Nui jeawarua nuigka Egiptonam pujuina jiintramurigka jimar nantun ejéniaru ainawai.

³ Yuus Moisésan chicharuk: Sinaí naintrin wakata, tusa tinaiti. Timau asa Moisés nain wakauwaiti. Tumamtai Yuus chicharuk: Wii amina yamai titatjam nu israelita aina ujakarta.

⁴ Egiptonmaya ainan waittan susarmaj nu wainkamarme. Tura nuiyasha wii atumin churuwi pinchu nina uchirin iyaraig tusa nanapen awas itauwa numamtuk imajai itajrum nusha wainkaurme.

⁵ Ashi nugkanam shuar aina pujuina nuka wii najankamu ainawai. Nu aina nuiyan wii atumnaka wina chichamrum umirtuinak wii etegkamur tura chikich shuar aina nuna nagkasau wina anetair arti tusan tinaitjarme.

⁶ Atum ainatirminka ima winak umirtuinak chikich ainancha wina chichamrun nekamtikawarti tusan etegkawaitjarme, tusa Yuus tawai tusam israelita aina ujakarta, tusa tinaiti.

⁷ Timau asa Moisés waketki jeaa israelita apuri ainan untsuk irumar, Yuus timaunka ashi etserkauwaiti.

⁸ Turamtai nuna antukar wear chikich israelita ainan Yuus timaun turusag ashi etserkaru ainawai. Nuna antukar nita chichainak: Yuus turamaj nuka metek umirkarmi tusar tiaruiti. Nuna tiarmatai Moisés ataksha nain waka Yuusan ujakuiti.

⁹ Turam Yuus Moisésan chicharuk: Wii amijai chichamun shuar aina antukar nekaspapi tawa tusar turamiarti tusan, yuragminam pachitkau Sinaí naintrin wantintuktatjame.

^10-11 Tumatin asamtai weme jeaam, amee shuar aina chicharkum: Yuus Sinaí naintrin tara chichamu antuktin asarum, yamaikisha tura kashinkisha jaanchrum nijakrum iwarnastarma.

^12-13 Turasha nu tsawantinka Yuus taatin asamtai, shuar aina tura tagku ainaksha Sinaí naintri tesamunmagka wakacharti. Nui shuarkesha tumachkusha tagkuksha tesamun nagkaiki wakka kayajai tumachkusha nagkijaigsha mantamnattawai. Trompeta umpuamun antuinaksha tesamua nuig wakarti, tusa Yuus tawai tusam ujakarta, tusa tinaiti.

^14-15 Tusa timatai Moisés waketki jeaa israelita ainan chicharuk: Tres tsawan tsawaarmatai Yuus chichamu antuktin asarum, atumin nugkutairi aina nijaatarma, tura atumi nuwe ainasha takasairpa, tusa tinaiti.

¹⁶ Tres tsawan tsawamunam ipamat aina uruka imatkai, yuragmia numamtin nainnum utsaanar káshi jasuiti. Tumamunam trompeta shir senchi umpuamun antukar senchi ashamainak kuraina.

¹⁷ Tumainakai Moisés israelita ainan nita pujuinamunmayan yaruak Yuus taratnunam jeastatuk nain taritkamunam ejénaiti.

¹⁸ Sinaí naintrin jiya numamtin keamunam Yuus pachitkau taramtai yuragkim mukuintau, tura nu nainka senchi muchitu.

¹⁹ Trompeta umpuamuka nu senchi antuwa, tumai Moiséska Yuusan auju. Turam Yuus Moisésan ayak, charpijai metek jau.

²⁰ Yuus nainta tsakarin tara Moisésan imajai wakata tusa untsukuiti. Tama imanai jeamtai,

²¹ Yuus chicharuk: Waketkim israelita aina pujuina nui jeaam chicharkum: Wina waitkartasa wii pujaj imajaigka wakacharti, wii taja nuna umitsuk imajai wainakka jinawartatui.

²² Antsu ima sacerdote aina nuke shuar ainan tunaurin tsagkurnartinan pachis aujtusartasa tawartatui. Turasha imajai eke watsuk, wii wakeraj tumasarag umintsartatui. Nuna metek uminachkaigka wii nitancha ijinawartatjai, tusa Yuus Moisésan tinaiti.

²³ Tusa takai Moisés chichaak: Ame Sinaí naintri tesamua imajaigka wakacharti tusam tinu asaakmin, ashamaina asar nitaka wakachartatui, tusa tinaiti.

²⁴ Tusa takai Yuus chichaak: Wari waketkita. Tumam Aarónjai wakata, turasha chikich aina tura sacerdote ainaksha imajaigka wakachartatui. Nuna metek uminachkugka jakartatui, tusa tinaiti.

²⁵ Moisés nainnumia akaiki jeaa, israelita ainan Yuus timaunka turusag ashi ujakuiti.