Éxodo 17 - New Testament with Old Testament portions

Entsa muchignumia jiinkimu

¹ Yuus nunii wetarum tinu asamtai, Sinnumia jiinkiar aya nugkanmag we wenakua, Refidim tutainam jeawar pujusaru ainawai. Turasha nuigka entsa atsau.

² Tuma asamtai umartin entsa sukartusta tusar Moisésan pegkerchau chicharaina. Tuinakai nitan chicharuk: Winaka entsa umartin sukartusta tusarmeka pegkerchauka chichartumain ainatsrume. ¿Atumka Yuuska inka yainmamainchauk enentaimtarum?, tusa tinaiti.

³ Takaisha senchi kitamaina asar, Moisésan chicharainak: ¿Ii ainatika ina uchiri, tura ina tagkuri ainajaimak kitakai ashi jinati tusamek Egipto nugkanam pujarin jiikratkimam? tusar tiaruiti.

⁴ Tuinakai Moisés Yuusan aujeak: Apuru, shuar kitamainak seatainawai, tumaina asarmatai warina susartataj nu turutta. Shuar aina ishichik arusarka kayajai tukuriar mantuawartatui, tusa tinaiti.

⁵ Tama Yuus Moisésan chicharuk: Entsa awatim numpa amajsamiam nu ushukrutairam jukim, amee shuar ainan apuri yaruakam wetá.

⁶ Wika nain Sinaí Horeb tutainum muchig a nui nakattajme, tusa tinaiti. Tusa tutai israelita ainan apurin yaruak wuwaiti. Tuma muchig amaunam jeaa nita emtin ushukrutairijai muchigkin awatnaiti. Turam entsa jiinmatai shuar aina ashi umararuiti.

⁷ Nu nugkanka Meribá tu anaikaruiti. Tura nuiyasha Masá tu anaikaru ainawai.

Israelita aina amalecita ainajai maanikmau

⁸ Israelita aina Refidim nugkanam pujuinai amalecita aina nitajai maaniattsa jeawaruiti.

⁹ Tumawarmatai Moisés Josuén chicharuk: Shuar aina etegkram amalecita ainajai maaniattsam kashin káshikmasam wetá. Antsu wika ushukrutain Yuus surusua nuna jukin, nain wakan takusan wajastatjai, tusa Moisés tinaiti.

¹⁰ Tusa timau asa Josué shuar ainan etegkar, amalecita ainajai maaniattsa wenakai, Moiséska Aarónjai, tura Hurjaimak wear muranam wakaruiti.

¹¹ Tuma kunturin takui wajakaigka israelita aina, amalecita ainan nepetaina. Antsu Moisés yaweki kunturin nenamtaigka amalecita aina, nitan nepetaina.

¹² Moisés kunturin takui wajau asa yaweakai Aarón Hurjai kayanam ekentsaruiti. Turawar uwejnum akantsag achikar wajasaruiti. Turamu asa Moisés kunturin nenatsuk etsan akatmaknaiti.

¹³ Tuma asamtai Josué amalecita ainan nepetkauwaiti.

¹⁴ Turamtai Yuus Moisésan chicharuk: Israelita aina, amalecita ainajai yamai maanikara nu pachisam atak aneartin chikichik papiinum aarta. Amalecita ainanka ashi ijinattajai.

¹⁵ Tusa timatai Moisés tagku aina maa patasa epetain najanawaiti. Nuna tura umik Yuuska ina shuarin nepetak ayamturmauwaitji, tu anaikauwaiti.

¹⁶ Tura chichaak: Yuus ina shuarin nepetturmauwa nu amalecita ainanka tura nita weantu ainajaigka tuke maaniske atinaiti, tusa tinaiti.