Éxodo 16 - New Testament with Old Testament portions

Israelita aina yuatnun Yuus susamu

¹ Israelita aina Egipto nugkanam pujuina jiintramurigka chikichik nantu nuiya quince tsawan ejéniaru ainawai. Tumawar nugka Elimnumia pujuina jiintrar aya nugkanmag we wenakua Elim nugka mura Sinaíjai iinias amaunam Sinnum jeawaruiti.

² Nui pujusar Moisésan, tura Aarónjai pegkerchau

³ chicharainak: Atumka aya nugkanmag yujasar tsukai jinati tusarum Egipto nugkanam pujarin jiikratkin ainarme. Yuus Egipto nugkanmag jinati tusa turamin akaigka imajnikar tsukai waitu yujamaitsuji. Egipto nugkanam pujusrika olla ainanam namag aimkar inarkamu aina shir yuar ejémarar pujumiaji, tusar tiaruiti.

⁴ Tusa tuinakai Yuus Moisésan chicharuk: Yutain nita yuatnun nayaimpinmayan shir nukap akuptukartatjai. Turamu asar ashi tsawantin jukar yuartatui, turasha chikichik tsawantin yumainan iisar juwartatui. Wina chichamrun umirtukartimpash tusan nunaka nekapsan iiyakun turawartatjai.

⁵ Turasha seis tsawanta nuigka jimar tsawan yumainan juukartatui, tusa Yuus tinaiti.

^6-8 Tusa takai Moisés Aarónjai israelita ainan chicharuk: Ika imanchau asar, atum yumainka sumaitsujrume. Atum chicharum nuka Yuus pegkerchau chicharkurum tarume. Niyaiti ina nu turatarma tusa turamuka. Atum pegkerchau chichakurme nuna, Yuus anturtamkaurme. Israelita ainati Egipto nugkanam pujarin jiirmarua nuka Yuusaiti, ii ainatsji. Tuma asamtai yamai etsa agkuantai atum yuatnun namagken amasmatai, yuattarme turarum Yuus ijai puja nu nekattarme. Tura kashin kashikmaska atum yuatnun pankan shir nukap akupturmaktatrume, tusa tinaiti.

⁹ Tura nuiyasha Moisés Aarónkan chicharuk: Nita pegkerchau chichamurin Yuus anturkau asamtai, ashi israelita aina Yuusan emtin irumrata, tusa tinaiti.

¹⁰ Tusa takai Aarón israelita ainan irumrauwaiti. Tura nitajai chichaak pujai, aya nugkanmag muranam Yuus tsaaptin jas yuragminam pachitkau wantinun wainkaru ainawai.

Yuus israelita ainan yutai maná tutain akuptukmau

¹¹ Yuus Moisésan chicharuk:

¹² Amee shuar aina wina pachittsar chichaina nuna antajai, tuma asamtai nita chicharainakum: Arum agkuantai namag yuattarme, antsu kashikmaska pankan nayaimpinmayan yuawar shir ejémakartatui. Tumawar wii nitan Yuusriyaitaj nuna nekarawartatui, tusa tinaiti.

^13-14 Tusa tinu asa nu tsawantinig etsa agkuantai nanamtin waya numamtin codorníz tutain ishiakuiti, nu turamu kaunak nita pujuinamunka nugkan ashi enetkauwaiti. Tura kashin tsawak kashikmaska maná tutain Yuus akupeak yumi yutina numamtin amajkauwaiti. Tura maná kakekauka puju jas nugkanam asauwaiti.

¹⁵ Turamun wainkarsha nekainachu asar, nitak chichainak: ¿Jusha warimpaita? tusa tuinakai Moisés chichaak: Junaka nayaimpinmayan atum yuatnun yutain, Yuus akupturmakurme.

¹⁶ Tuma asamtai atum yamai yuatin, tura atumin jeen urutma shuara pujarum nu yuatnusha nekapmasrum, chiki chikichik shuarnau jimar litro tumainan jukiarti, tusa Yuus turamrume tinaiti.

¹⁷ Tuinamu asar chikich ima nukap juinai, chikich ainaka ishichik jukiaru ainawai

¹⁸ Yutain nukap jukiaru aina nunausha ampinturcharu ainawai. Tura yutain ishichik jukiaru aina nusha atsumacharu ainawai. Chiki chikichik shuar aina nita yumaina turusag jukaru ainawai.

¹⁹ Nuna turawarmatai Moisés nitan chicharuk: Chikichkitirmeksha kashin yuatin tusarmeka ampirumka ikuschattarme, tusa tinaiti.

²⁰ Tusa timau ainayat, kashi tsawaku yuatnuncha ampirar ni ikuaka ikusaru ainawai. Nu turamu ainaka akarkar shir pegkerchau mejena. Tuma asamtai Moisés shir senchi nitan kajerkauwaiti.

²¹ Ashi tsawanti káshikmas chiki chikichik nita yumaina turusag juwa jakaruiti. Antsu aa irunuka etsa yaki jak sukuam entsamna megkajakuiti.

Siete tsawanta nuigka ayamratarma tusa Yuus israelita ainan timau

²² Chiki chikichik shuar aina dos litro jukiarti tusa timauwa nuna inagkas seis tsawanta nuigka cuatro litro tumainan pankan jukiaru ainawai. Nuna turawaru asarmatai israelita apuri aina Moisésan jeari ujakaru ainawai.

²³ Turam Moisés nitan chicharuk: Kashinka Yuus wina ememattruinak pujusarti timauwa nu tsawan atatui. Tumatin asamtai yutai yamaiya juik inarkarum yuatarma, tura yutai ampintramtaigka kashin yuatin yamaiya juik inarkarum ikustarma, tusa tinaiti.

²⁴ Timau asar Moisés timaun metek uminak, yutain nukap juukar inarak yuinak ampintraunka ayamtai tsawan tsawaarmatai yuatnun ikusaruiti. Turamsha nuka akarkacharuiti, tura mejearcharu ainawai.

²⁵ Tumamtai Moisés nitan chicharuk: Yutai ampira ikusmauka yuatarma, ju tsawanta junaka ayamtai tsawan atii tusa Yuus pegkermamtikamua nuwaiti. Ju tsawanta juika aa jiinkirum yutai eakrumsha pegkesha wainkashtatrume.

²⁶ Atum yutai aina juktinka seis tsawanta nuketi. Turasha siete tsawanta nuigka, ayamtai tsawan asamtai yutaigka atsuttawai, tusa tinaiti.

²⁷ Tusa timau aig, ayamtai tsawan tsawarmataisha yutain juukartasa ujumak shuar jiinkiar eainaksha pegke wainkacharu ainawai.

²⁸ Tumainakai Yuus Moisésan chicharuk: Atumka wina chichamruka pegkesha umirtatsrume.

²⁹ Seis tsawanta nui atum yuatnun jimar tsawan pujusa yumainan amajrum nunaka siete tsawantin ayamainak jeag pujusar yuawaruiti, tusan turajrume, tusa tinaiti.

³⁰ Timau asar siete tsawanta nuigka ayamraru ainawai.

³¹ Israelita aina nu yutain maná tu jakaru ainawai. Nuka culantro jigkaiya numamtin ajakuiti, tura pan napa yumirijai pachimramu yumina numamtin ajakuiti.

³² Moisés Yuus timaun israelita ainan ujak: Egipto nugkanam pujuinan jiiran aya nugkanmag ewekasan, yutai maná tutain ayurawaruitaj nuna, nita weantu nekawarat tusar inaktustinan dos litron jukiar ikusarti, tusa Yuus turamrume tinaiti.

^33-34 Nuiyasha Moisés Aarónkan chicharuk: Yuus manán ina ayurtamawaitaj nuna ii weantu aina nekawartin, maná dos litros jukim chikichik ichignanam egkeata. Turam Yuus chicham umikmau egkeamu arca puja nui apujsata, timau asa Aarón turusag umikuiti.

^35-36 Yutai maná tutain yusa yujasar, cuarenta uwí ejéniar nita pujustinnum Canaán nugkanam jeawaru ainawai.