Éxodo 15 - New Testament with Old Testament portions

Moisés israelita ainajai kantamamu

¹ Moisés israelita ainajai kantamuk: Ina Yuusri kantamruawarmi, ina nepetturmak nina senchirijai ina shuari aina caballonam wininan nayantsanam ijinayi, tu kantamawaru ainawai.

² Yuuska ina ayamrutmaku asamtai kantamraji, niyaiti ina ichichmamtan suramuka tura niyaiti ina uwemtikramnuka, niyaiti ina Yuusrigka, tuma asamtai emematji, niyaiti ina uuntri ajakarua nuna Yuusrigka tuma asamtai emematji.

³ Yuuska maanitan yachaiti, nina naarigka Yuusaiti.

⁴ Yuus egiptonmaya apun suntaari aina carretenam wininan nayantsanam ijinayi. Tura suntara apuri ainancha turusag ijinayi.

⁵ Nayants waketuk yutuawaiti, turamu asar kaya numamtuk shir init wayawaru ainawai.

⁶ Yuusru, ameka senchirtin asam ina kajertamin aina ijinawaitme.

⁷ Amina kajertamin aina nuka, shir senchirtin asam amina senchirmijai ijinawaitme. Senchi kajerkaru asam nitaka ijinawaitme.

⁸ Ame nita kajerkau asam, nayantsan umpui akanak mura iman amajsati tusam nase akupkauwaitme.

⁹ Ina kajertamin aina chichainak: Patatukar amaigkarmi. Tura ijinar nita waríri aina yarurkar akantrar jukiarmi, tusar tiaruiti.

¹⁰ Turasha entsa waketuk ijinati tusam nase akuptukuitme. Turamu asa nase umpuam entsa waketuk nitanka nayantsa ajapeentrin plomo numamtuk init wayawaruiti.

¹¹ Wina Yuusru, chikich Yuus amea imauka atsawai. Ameketme pegkermeka tura ameketme senchirtinmeka. Yaunchuksha wainu jakchamu ashammain aina iwainakuitme. Tura asaakmin emematjame.

¹² Ame turatjai timaurmeka, amina senchirmijai egiptonmaya ainaka nugka uratim yutuam ijinawaitme.

¹³ Ame etegkamuram ainaka senchi anea asam, amina senchirmijai uwemtikauwaitme. Tura asam nita pujusartin nugka anajmatawaitam nui ejéttsam yarumme.

¹⁴ Ame nu turamun filisteo aina nekawar senchi sapijmainak kurainiartatui.

¹⁵ Tura Edomnumia suntara apuri aina, Moabnumia suntara apuri aina tura Canaánnumia ainasha senchi ashamkartuinak ashi kurainiartatui.

¹⁶ Apuru, amina ashamramainak muchitkashminu jasartatui. Tumawarmatai ame etegkamuram uwemtikauwaitam nu nagkamararti.

¹⁷ Apuru, ame nugka anajmakartuawaitam nui pujusarti tusam jukartukta. Nu nugkaka amek umikuitme, amina jem atincha nuig umikuitme.

¹⁸ Apuru, amina inamtairmeka tuke atinaiti, tusa Moisés Yuusan tinaiti.

María israelita nuwa ainajai kantamamu

¹⁹ Egiptonmaya apu suntaari caballo ainanam tura carrete ainanmasha israelita aina nayants jimapetuk kanaki muku jasmatai wenan patatukar wenan nayants ijinawaiti. Turasha israelita ainaka nayants muku jas amaunam katiararu ainawai.

²⁰ Tumawarmatai María Yuusa chichamen etserin Aarónkan umai ajakua nu chikichik panderetan juki kantamkai nuwa chikich ainasha nitasha tumasag kantamainak jantsemawaru ainawai.

²¹ María kantamami tusa nitan ipaa kantamuk: Ina Yuusri kantamruawarmi, ina nepetturmak nina senchirijai ina shuari aina caballonam wininan nayantsanam ijinayi, tu kantamawaru ainawai.

Entsa yapaun Yuus yumin amajsamu

²² Israelita aina nayantsanam katiarar aya nugkanmag Shur tutainmani wearuiti. Tumawar entsa pegkesha atsau asamtai umutsuk tres tsawan yujaina.

²³ Tuma yujasar entsa amaunam jeawaru ainawai. Turasha entsa yapau asamtai umarcharu ainawai. Tumawaru asar nu nugkan Mara anaikaruiti.

²⁴ Tumawar kajekar Moisésan chicharainak: ¿Isha yamaisha wari umartatji? tusar tiaru ainawai.

²⁵ Tuinakai yainkata tusa Moisés Yuusan aujsauwaiti. Turam Yuus chikichik númi wajaun inaktusuiti, tura chicharuk: Ju tsupikam entsa yapauwa nui egkeata, tusa tinaiti. Takai numin tsupik entsanam egkeawaiti. Turamtai entsa yapauwaitiat yumin jasmatai umararu ainawai. Nu nugka nuig israelita ainan nekapsattsa chicham umiktin ainan Yuus susauwaiti.

²⁶ Tura nitan chicharuk: Atum chicham umiktinan yamai suajrum nu nekaspapita tusarum metek umiakrumnaka, egiptonmaya ainan waittan susarmiaj turanka atumnaka waittanka susashtinaitjarme, antsu wii atumi Yuusri asan, atum jakrumnasha pegker amajtinaitjarme, tusa tinaiti.

²⁷ Nuna tusa inagnakmatai shiakar Elim nugkanam doce entsa pukuni jiinu irunmaunam, tura setenta kampanak irunmaunam jeawar nui matsamsaru ainawai.