Éxodo 14 - New Testament with Old Testament portions

Egiptonmaya aina israelita ainan patatukmau

¹ Israelita aina nugka Etam tutainam pujuinai Yuus Moisésan chicharuk:

² Israelita aina ishichik wakettsarag Migdol tutai nayantsajai iinias a nuna ajapeentrin yaakat Pi-hahirot yaakat Baal-zefónjai a nujai iinias nayantsa yantamen aakmar pujusarti tusam ujakarta, tusa tinaiti.

³ Nu tumakrumin faraón israelita ainaka nita wemainan nekainachu asampa aya nugkanmag wakar yujatai, tu enentaimrattawai.

⁴ Faraónnaka ni wakeramun turati timau asa atumin pataturmaktattrume. Turasha faraónnaka nina suntaari ainajaimak ashi ijinattajai. Nuna turamtai ashi egiptonmaya ainaka wii Yuus senchirtinaitaj nuna nekarawartatui, tusa tinaiti. Yuus timau asar israelita aina wakettrar nayantsa yantamen matsamsaruiti.

⁵ Israelita aina jiintrar shiakarai tusar faraónkan ujakaru ainawai. Tama antuk nijai takau ainajaimak wake mesekar chichainak: Israelita ainaka jiintrarum wetaarma tutsuk ina takartamkurum pujutarma tumain amajkauwaitji, tusar tiaruiti.

⁶ Nuna tusa faraón nina inatairi ainan chicharuk: Maanitai carrete aina shir iwaratarum, tusa tinaiti. Takai turusag iwararuiti, turawarmatai faraón carretenam egkemar nina suntaari ainajai wuwaiti.

⁷ Seiscientos carrete nekas pegker ainan tura nuiyasha Egiptonmaya carrete ainanka ashi yaruak, nu ainanam chiki chikichik suntara apuri aina egkemrar shiakaruiti.

⁸ Israelita ainan Yuus jiirtasa yaunchuksha wainkachmau ainan iwainakmaun nekayat, Yuus ni wakeramu turati timau asa, faraón nina suntaari ainajai patatukuiti.

⁹ Carrete ainajai tura caballo ainajaisha patatukaruiti, tumawar nayantsa yantamen yaakat Pi-hahirot tutaijai chikich yaakat Baal-zefón tutaijai iinias a nui aakmar pujuinan amaigkaruiti.

¹⁰ Tura israelita ainasha faraón egiptonmaya ainajai winaun wainkaru ainawai. Tumawar ijitmawartatji tusar senchi ashamainak Yuus yainmaktaji tusar aujaina.

¹¹ Tumaina asar Moisésan chicharainak: Egiptonam ikumatai iruna aig imajai aya nugkanmag jinati tusam jiikratkinaitme. ¡Jutikmain jutikartatsme! ¡Egiptonmayagka jiikratmainchau jiikratkinaitme!

¹² Ika junikar jinawaij tuina asar Egipto nugkanmag pujusar faraón takarkur pujusarmi jiikrattsuk inaikartusta, tusar timaji tuina.

¹³ Tusa tuinakai Moisés nitan chicharuk: ¡Sapijmakairpa! Yuus ina ayamrutmak agkanmamtikramattaj nu wainkattarme. Egiptonmaya aina yamai waintrum nuka atak awenarmeka wainkashtinaitrume.

¹⁴ Tuinakai Moisés nitan chicharuk: Tusarum sapijmakairpa Yuus inka ayamrutmaktatji, tusa tinaiti.

¹⁵ Yuus Moisésan chicharuk: Yainkata tusam turuttsuk, israelita aina chicharkum estarma tusam titá.

¹⁶ Tura nayants kanak muku jasmatai israelita aina katiararti tusam amina ushukrutairam nayantsanmani takuita.

¹⁷ Wii faraónnaka nina suntaari ainajaimak ni wakeramun turati timau asar, ijinami tusar atumin pataturmaktattrume. Tumainakai faraónkan, nina suntaari ainan, carretenam wenan tura caballonam wenancha wina senchirjai ijinattajai.

¹⁸ Nuna turamtai egiptonmaya aina wii senchirtinaitaj nuna nekarawartatui, tusa Yuus tinaiti.

¹⁹ Tura yuragmia numamtinnum nayaimpinmaya shuar israelita aina wetinnumani emak wea nita ukurin juak egiptonmaya ainan wainmamainchau amajsauwaiti.

²⁰ Israelita aina weamunmanigka tsaaptin jasuiti. Tumak egiptonmaya aina weamunmanigka yuragmia numamtin utsaana káshi jasu asa wainmamainchau amajsauwaiti. Turamu asar egiptonmaya aina israelita ainan káshi pata patatuinakua tsawainaksha amaigkacharu ainawai.

Israelita aina nayantsanam katiarmau

²¹ Tura Moisés ushukrutairin nayantsanmani inakmasuiti. Turamtai nasen etsa watainmaniyan akupkauwaiti. Turamu asa senchi nase nasenkauwa tsawaruiti. Tuma asamtai nayants kanak muku jasuiti.

²² Nayants kanak yantamenka mai kanasag mura numamtin jasuiti. Tuma ajapeen muku jasmaunam israelita ainaka nayants amain katiararu ainawai.

²³ Tura egiptonmaya aina caballonam entsatkau aina tura carretenam wenasha israelita ainan patatuk we wenakua nayantsa ajapeentrin jeawaruiti.

²⁴ Tumawar wenan Yuus yuragmia numamtinnum tura jiya numamtin keamunam pachitkau we jakua nu, tsawarai egiptonmaya ainan iisuiti. Turam nitaka imantrau ainawai.

²⁵ Tura carreteri ainasha kushatkaru ainawai. Tumawarmatai chikich aina chichainak: Israelita ainan Yuus ayamrak jutikramaji, tuma asamtai waketkiarmi, tusar tiaruiti.

²⁶ Turasha Yuus Moisésan chicharuk: Entsa waketuk egiptonmaya aina carretenam wenan tura caballo ainanam wenan ijinati tusam amina ushukrutairam nayantsanmani inakmasta, tusa tinaiti.

²⁷ Takai Moisés nina ushukrutairin nayantsanmani inakmasuiti. Turamtai nayantsaka yaunchuk ajakmaun metek jas tsawaruiti.

²⁸ Entsa waketuk Egiptonmaya suntar aina carretenam wenan tura caballonam wenancha yutua ashi ijinawaiti. Turamu asa chikichik suntarkesha iwákuka juakchauwaiti.

²⁹ Antsu israelita ainaka nayants kanak ajapeen muku jas mai yantamen entsa iruunar mura iman jasmaunam shir katiararu ainawai.

³⁰ Nu tsawantin israelita ainan egiptonmaya aina ijinattsa patatuinan Yuus tu ayamruk uwemtikauwaiti. Tura israelita aina egiptonmaya suntar aina jinaa nayantsa yantamen nanatainan wainkaru ainawai.

³¹ Tumawar Yuus nina senchirijai junaka jutikayi tusar nekaspapita tiaruiti. Tura Moisésnasha nekaspapita tiaru ainawai.