Éxodo 12 - New Testament with Old Testament portions

Jiisat Pascua pachisa timau

¹ Moisésan Aarónjai eke Egipto nugkanam pujaun, Yuus chicharuk:

² Ju nantua juka uwí yama nagkamchak achiamunam atatui, tura nu nantutinka atum eme anentsa iiyakrum jiistamin atatrume.

³ Tuma asamtai israelita aina ashi chicharkum: Ju nantu diez tsawan tsawaarmatai, shuar jeentin aina chiki chikichik ovejan aishmagkun nuwerman pegkeran iis chikichik uwí aramun, tura nu atsakaigka cabra aishmag yama tsakan achikar nita jeen apujsarti.

⁴ Shuar nukap uchirtinchau asa, chikichik tagku maamun amumainchau akugka shuar nijai irutkau pujaujai iruunar tagkun maa namagken akantunaikar yuawarti.

⁵ Nu tagkuka chikichik uwí aramu aishmag pegker nuweram, oveja tsakat tumachkusha cabraksha atatui.

⁶ Iman iisrum etegkarum shir kuitamkarum apujsarum wii tajarum nuu nantutin catorce tsawan tsawarmatai etsa kiakai chiki chikichik uun ainatiram tagku maarum numpe jukitarma.

⁷ Nutika nita jeen iruntrar pujusar yuamun waitirin yantamen tura yakinisha tagku numpejai yakararti.

⁸ Nu káshi atata nuigka tagku namagken jinum pegka inaraamun, nupa yapau yutai ainajai tura pannasha levadurajai pachimtsuk inaraamujai yuawarti.

⁹ Tagku namagke painka inaraamu turachkusha unutakuksha pegkesha yuawairpa. Tagku namagkenka ashi mukesha makui aina tura ampuje ainasha jinum pegka inaraamu atatui.

¹⁰ Namag juakmataisha kashin tsawaku yuatin tusarka ikukcharti. Nunaka turutsuk namag juakmataigka ekemaktarma.

¹¹ Jaanchin nugkurar, zapaton weamakar, tura ushukrutaincha takusar wári yuawarti. Nuka jiisat Pascua asamtai wina ememattruinak tumawarti.

¹² Nu Pascua tsawantin káshi ajampek jasmatai, egiptonmaya ainan jeen wii wayakai uchi aishmag iwairi aina, tura tagku aishmag yama nagkamchak akiinkaru ainasha jinaattawai. Nuiyasha egiptonmaya aina yuusrimtairi ainancha ashi tsaiktatjai. Nuna taja nunaka wii Yuus asan turattajai.

¹³ Egiptonmaya ainan waittan suaknasha atumin jeen waitiri numpajai yakarmaun wainkan waitsuk nagkamaktatjai.

¹⁴ Nu tsawanka pegkesha kajinmattsuk uwíjai metek tuke jiistamtinaittrume. Tura atumin uchiri ainasha tuke jiistamiartin ainawai.

¹⁵ Tura nu jiistamkurum levadurajai pachimtsuk pan najanamu yusa pujusrum siete tsawan ejétinaitrume. Jiisat Pascua tutai tsawan tsawakaigka pan levadurajai pachimra najanamu akaigka yutsuk ajapatin ataarma tusam ujakarta, tusa Yuus Moisésan tinaiti.

¹⁶ Nu tsawanka pegker asamtai ashi israelita ainatirmeka jiisat Pascua atin tsawarmataigka tura jiisat inagnamu tsawantincha wina emematrakrum tuke iruntsarmeke atinaittrume. Nu tsawantinka pegkesha takastin airpa, antsu jiistamkurum pujusrum yuatna nuke inareakrum takastin ataarma.

¹⁷ Egipto nugkanam pujarmin nu tsawantin atumnaka jiirmiajrume, turamu asarum atumka tuke jiistamtin ataarma. Juka atum ainatirmesha tura atumi uchiri ainasha tuke jiistamiartin ainawai.

¹⁸ Chiki chikichik uwítin yama nagkamchak nantun achiakaigka pan levadurajai pachimtsuk inaraamu yutai tsawan catorcetin etsa kiarai nagkamarum veinti uno tsawantin etsa kiarai inagnatarma.

¹⁹ Jiistameakrum siete tsawan pujuttarum nuigka atumi jeenka levaduraka atsuttawai. Nu tsawantin chikich shuarkesha tumachkusha israelitaksha pan levadurajai pachimra najanamun yuakka jiiki ajapeam atatui.

²⁰ Turam aij takurmeka atum tui pujusrumek jiisat Pascua jiistamatnuk ainarum nuigka levadurajai pachimra najanamuka yuatin airpa, tusa Yuus tinaiti.

Jiisat Pascua tsawarmau

²¹ Moisés shuaran israelita apuri aina ikankata tusa akupkauwaiti. Turam ikankamtai Moisés nitan chicharuk: Wetarma, tumarum ashi uun ainatiram chiki chikichkitiram chikichik cordero turachkurmesha cabra aishmag tsakat akanka juki atumi jeen apujsamu jukirum itatarma. Turarum Yuus numpajai shuar ainatin uwemtikramratin asamtai, etsa kiarai jiisat Pascuatin yuatin maatarma.

²² Turakrum tagku numpegka tazónnum jukitarma. Turarum númi hisopo tutai kanawe aina jukirum numpanam ajugkrum numpa amajsarum waiti yantame ainaka ashi yakartarma. Nu kashi atata nuigka eke tsawatsaigka chikichkitirmeksha aagka jiinkirpa.

²³ Nayaimpinmaya shuar Egiptonmaya uchi aishmag yama nagkamchak akiinkaru ainan ijinkusha atumin jeen waitiri numpajai yakarmaun wainak waitsuk yakig nagkamaktatui.

²⁴ Nu tsawanka pegkesha kajinmattsuk uwíjai metek tuke jiistamtinaittrume. Tura atumin uchiri ainasha tuke jiistamiartin ainawai.

²⁵ Yuus atum pujustinan nugkan anajmatramawa nui jearum pujakrumsha, ju jiistaka tuke inagkaitin ataarma.

²⁶ Atumi uchiri aina chichainak: ¿Ju jiistatincha urukamtai tagku maarsha yuaji? tusa ininmainakaisha,

²⁷ atum ayakrum: Ju tagku maar yuaj juka numpajai Yuus uwemtikramrau asamtai, nu enentaimtuinakur jutikaji. Nayaimpinmaya shuar Egiptonmaya uchi aishmag yama nagkamchak akiinkaru ainan ijinkusha israelita ainatin jeen waitiri numpajai yakarmaun wainak waitsuk yakig nagkamakna nuu tsawan asamtai Yuus emematkur juniaji, tusarum titin ainarme, tusa tinaiti. Nuna antukar israelita aina Yuusan emematainak tsuntsumawaru ainawai.

²⁸ Moisés Aarónjai israelita apuri ainan Yuus timaun ashi ujakaruiti. Turawaram timaun metek uminak, tsawan jeaamtai chiki chikichik jeentin aina, tagkun maawar nuna numpejai jeen waitirin yakararuiti.

Uchi iwairi aishmag aina tura tagku aishmag yama nagkamchak akiinkaru aina jinaamu

²⁹ Egiptonmaya uchi aishmag iwairi ainan, faraónka uchiri aishmag iwairi apu jastasa pujaun, shuar cárcelnum egketun uchiri aishmag iwairin tura tagku aishmag yama nagkamchaku petsakmau ainancha ijinati tusa, ni turatin tsawan jeamtai nayaimpinmaya shuaran káshi ajampek, Yuus akupkauwaiti. Turam Egipto nugkanam jea waitiri numpajai yakarchamu ainan iis, wayaa uchi iwairi ainan, tura tagku yama nagkamchaku petsakmau ainancha ijinawaiti.

³⁰ Turamtai nu kashitin faraón, nijai takau aina tura ashi egiptonmaya ainajaimak nantarar wake mesemar nekapenak útainak senchi pampaina. Egiptonmagka uchi aishmag iwairi ainaka chikichik jeanmayagsha juakchauwaiti.

³¹ Tumainakai faraón tura nijai takau ainajai, nu káshia nuig shuaran Moisés Aarónjai utitarma tusa akupkauwaiti. Turam juki itarmatai faraón nitan chicharuk: Yamaika nuwartuk, uchirtuk, wári jiintrarum wetaarma. Tumarum atum timarum turusrumek Yuus atum umirtai ememattarma.

³² Nuiyasha atum wakerimarum tumasrumek atumi ovejari aina, vaca aina tura burro ainasha yaruakrum wetaarma. Tumakrum winasha Yuus aujtursatarma, tusa tinaiti.

³³ Egiptonmaya aina israelita ainan ina nugken pujuina nuna wári jinar wenachkaigka ashi jinawaij tusar ashamaina asar, jiintrarum wári wetaarma tusar imatruina.

³⁴ Israelita aina harina nanekmau levadurajai pachimrachmaun, harina egkea namutaijai irumar jaanchrijai pempearar yanakiar jukiaruiti.

³⁵ Tura nuiyasha Moisés turatarma timau asar, egiptonmaya ainan: Warí orojai najanamu ainan, kuit tutaijai najanamu ainan tura jaanch ainancha seawar yarutkaru ainawai.

³⁶ Yuus egiptonmaya ainan pegker enentaimtikrauwaiti. Turamu asar israelita aina warí ainan seamainakai suinak nitaka ishichik warijaig juakaru ainawai.

Israelita aina Egipto nugkanam pujuina jintramu

³⁷ Israelita aina yaakat Ramsésnum pujuina jiintrar nugka Sucotnumani wearu aina nuka, nuwa aina tura uchi ainasha nekapmatsuk aya untak nekapmaram seiscientos mil ajakaruiti.

³⁸ Israelita aina jiintrar wenakai, chikich shuar ainasha nitajai iruuntrar wenak, oveja ainan tura vaca ainancha nukap yaruakaru ainawai.

³⁹ Egiptonmaya aina nita nugkenia jiiki akupeamu asar, nita yumaintri yurumak inarmain tsawan atsursaru ainawai. Turamu asar harinan Egiptonmaya jukimujai tortan levadurajai pachimtsuk inarkaru ainawai.

⁴⁰ Israelita ainaka Egipto nugkanam cuatrocientos treinta uwí pujusaru ainawai.

⁴¹ Cuatrocientos treinta uwí ejeawaru aina nu tsawantinig israelita aina, Egipto nugkanam pujuina jiintraru ainawai.

⁴² Nu káshi asauwa nuigka Yuus israelita ainan Egipto nugkanam pujuinan jiirtin asa kuitamkauwaiti. Tuma asamtai atakea nuisha atumi uchiri aina tura nuna uchiri artina nusha nu káshia nuigka Yuus Egipto nugkanam pujarin jiirmaruitaj nuna enentaimtuinak kanutsuk tsawaitin ainawai. Turasha ukunchinka kupirkacharti.

^43-51 (-)