Éxodo 11 - New Testament with Old Testament portions

Egiptonmaya uchi iwairi aina tura tagku yama nagkamchak akinkau aina jinattawai tusa timau

¹ Yuus Moisésan chicharuk: Faraónkan tura ashi egiptonmaya ainan waittan susartataj nu eke chikichik awai. Nu waitat susamka wearti tusagka ayatkika turamchattarme. Antsu ima nigki jiintrarum wetaarma, tumarmeka atak waketkirmeka tawairpa, tusa turamtatrume.

² Turasha eke Egiptonmaya jiintsuk israelita aishmag aina tura nuwa ainasha umintsarti tumainak, egiptonmaya aishmag ainan nuwa ainan nitajai irutkau pujuinan warí orojai najankamu ainan tura kuit tutaijai najanamu ainancha seawarti, tusa tinaiti.

³ Yuus egiptonmaya aina israelita ainan wait anentrarti tusa pegkernum enentaimtikrauwaiti. Nuiyasha faraónjai takau ainasha tura ashi egiptonmaya ainaka nitan nagkasau senchirtin Moisésan iisaruiti.

⁴ Moisés faraónkan atak waketkinka tashtatjai, tusa tinaitak faraón pujamunam ataksha waketki jeawaiti. Tuma faraónkan chicharuk: Yuus chichaak, chikichik káshi ajampek jasa ai ashi jea Egiptonam iruna nuna waintawartatjai turamui.

⁵ Wii jeanam wayakai chiki chikichik egiptonmaya uchi aishmag yama nagkamchak akinkau ainaka jinattawai. Faraónkan uchiri aishmag yama nagkamchak akina apu jastasa puja nu, nuwa inatai araka jigkai nekeetai ukurin puja nuna uchiri yama nagkamchak akinawa nusha jakattawai. Tura tagku aishmag yama nagkamchak akiinkaru aina nusha ashi jinattawai.

⁶ Nu tumakai egiptonmaya ainaka wake mesemar nekapenak shir senchi útiartatui. Yaunchuksha tumachmaun tura atakea nuisha tumachtinan shir senchi waittsartatui.

⁷ Tura israelita ainatirmeka egiptonmaya ainajaigka metekchau asaakrumin atumi uchiri aishmag iwairi ainaka tura atumi tagkuri aishmag yama nagkamchak akinkaru ainasha chikichkiksha jakashtatui. Tura chikichik yawagkesha jiakratkashtatui.

⁸ Apu shuar aina amijai takau aina pujuina juka nu tumakai wika tatsaig nitak tawar tikishmatrurar chichartuinak: Yamaika jui pujutsuk ame, tura amina pataim ainajaimak jiintrarum ashi shiaktarma tusa turutiartatui, tusa Moisés kajek faraón pujamunmaya jiinki wuwaiti.

⁹ Tuma nukap tsawan pujus Yuus Moisésan chicharuk: Apuka atum tusa ujamsha nekaspapita turamchattarme. Tumakai yaunchuksha wainkachmau ainan wii nitan iwaintukartatjai, tusa tinaiti.

¹⁰ Moisés Aarónjai faraón pujamunam wearu ainawai. Tuma jeawar, Yuus turatarma tusa timaun faraón wainai yaunchuksha wainkachmau ashammain ainan iwainakaruiti. Turasha faraónka Yuus enentaimkachu amajsamu asa israelita ainan jiintrar wearti, tusa tichauwaiti.