Éxodo 10 - New Testament with Old Testament portions

Egiptonmaya ainan manchi ishitka waitkasmau

¹ Yuus Moisésan chicharuk: Faraón pujamunam wetá, tumam jeam chicharkum, Yuus chichartamuk yaunchuksha wainkachmaun iwaintuktasan wii ninka nijai takau ainajaimak enentaimkachu amajsajai.

² Egiptonmaya ainan wishikiakun yaunchuksha wainkachmaun iwaintakun wii uruk waitkasjak nuna pachis nita uchiri ainan tura tiragke ainancha ujakartinaiti. Turamu asar YUUS TUKE PUJU tutaiyaitaj nuna nekarawartinaiti, tusa Yuus turamui titá tinaiti.

³ Tusa takai Moisés Aarónjai faraónkan aujsartasa wearuiti. Tuma jeawar faraónkan ujainak: Israelita ainati umirtai Yuus chichartamuk, nigki eme anenmamtsuk wina umirtukti, tumak wii etegkamu ainan jiir akupkati. Turawaram wina emematriarti.

⁴ Antsu jinar shiakti tusam tachakminka kashin Egipto nugkanam manchi ainan ishitkattajme.

⁵ Nu aina kaunkar Egipto nugkanka enetak wainmainchau amajsattawai. Tumawar micha uun aina kakeak arakan ashi ijinachmau ainan, tura númi ainancha nuken ashi amutkartatui.

⁶ Tumak nina pujusa inamtai jeanam, nijai takau ainan jeen tura ashi egiptonmaya ainan jeencha utsaanawartatui. Nuka nina apari tura apachri ainasha tumachkusha yamaiya juisha wainkachmaun wainkattawai, tusa Yuus turamui tusam ujakta timau asa, israelita ainati umirtairi Yuus turamui, tusa Moisés faraónkan ujakuiti. Tura Moisés Aarónjai jiinkiar wearuiti.

⁷ Tumawarmatai nijai takau aina faraónkan chicharainak: Apu au shuar aina nuka waittan suramas senchi waitkarmainaji. Tura Egipto nugka pegkerchau jasa nusha nekame. Tuma asam nita umirtairi Yuusan emematiarti tusam jinar shiakti tusam titá, tusar tiaruiti.

⁸ Tuinakai Moisés Aarónjai untsukrum itatarma tusa shuaran akupkauwaiti. Turam itawarmatai faraón nitan chicharuk: Werum atum umirtai Yuus ememattarma. Turasha yaa ainajaimpa wetatrum nu turuttarma, tusa tinaiti.

⁹ Takai Moisés ayak: Ii ainatika ashi uchi aishmag aina, uchi nuwa aina, untach aina tura tagku ainasha yaruakar wetatji. Nu tumar ii ainatika nekas shir aneasar Yuus emematkur jiistamattaji, tusa tinaiti.

¹⁰ Turasha faraón nitan wishikiak: Ayu nuka nuniktarum Yuus atum umirtai uyuntamsati tusa turamchaintash tu enentaimsarum ¡waitru yujarme!

¹¹ Atum turattsarum wakera asarum, aya aishmag uun ainatirmek werum Yuus atum umirtai ememattasrum wakerarum nuka turatarma, tusa tinaiti.

¹² Turasha Yuus Moisésan chicharuk: Manchi aina kaunkar árak ainan, tura númi ainan micha uun aina kakeaku ijinachmau ainan amukarti tusam uwejem Egiptonmani inakmasta, tusa tinaiti.

^13-14 Takai Moisés ushukrutairin Egiptonmani inakmasuiti. Turamtai Yuus nasen etsa watainmaniyan akupkauwaiti. Turamu asa tsawaisha tura káshisha senchi nasenkauwaiti. Tuma kashin tsawak manchi ainan shir nukap ikaankauwaiti.

¹⁵ Imatma asa nugkanka wainmainchau amajsauwaiti. Tumawar micha uun aina kakeak ijinachmaun árak ainan tura numi nere ainan, Egipto nugkanam irununka ashi amukuiti.

¹⁶ Turawarmatai faraón Moisés Aarónjai untsukrum itaatarma tusa shuaran faraón akuptukuiti. Tura itawarmatai faraón nitan chicharuk: Wika Yuus atum umirtain tura atumnasha tunaun takarsajrume.

¹⁷ Turasha wina tunaur tsagkurturtarma tusan ataksha tajarme. Tura manchi aina arakan amuina nuna emegkarti tusarum, Yuus atum umirtai aujtursatarma, tusa tinaiti.

¹⁸ Takai faraón pujamunmaya jiinkinaiti. Tuma Moisés Yuusan aujsauwaiti.

¹⁹ Turam Yuus nasen etsa akaatainmaniyan akupkauwaiti. Turam senchi nasentuk manchi ainan nayants kapantu tutainam utsaawaiti. Turamu asa Egiptonmagka chikichik manchiksha juakchauwaiti.

²⁰ Turasha Yuus faraónnaka enentaimkachu amajsauwaiti. Turamu asa israelita ainan jiintrar wearti, tusa tichauwaiti.

Egipto nugka káshi jasmau

²¹ Nuna tumamtai Yuus Moisésan chicharuk: Egipto nugkanam shir káshi achitcha achimain jastii tusam ushukrutairam nayaimpinmani inakmasta, tusa tinaiti.

²² Takai Moisés ushukrutairin nayaimpinmani inakmasuiti. Turamtai Egipto nugkanam shir káshi jasuiti.

²³ Nuna tuma tres tsawan asauwaiti. Tuma asamtai chikichjai wainnaitsuk, tura wekaatsuk nuig pujuarmiayi. Turasha israelita aina pujuinamunmagka pegkesha tumachuiti.

²⁴ Tumamtai Moisés Aarónjai utitarma tusa shuar ainan faraón akupkauwaiti. Turam Moisésan Aarónjai itawarmatai faraón nitan chicharuk: Yamaika atumi uchiri yaruakrum werum, atum umirtai Yuus ememattarma. Turasha oveja ainaka tura vaca ainasha yaruakairpa, tusa tinaiti.

²⁵ Turasha Moisés faraónkan chicharuk: Nuka tutsuk israelita ainati umirtai Yuus, eme anentsa iiyakur tagku aina maa epeatnuka ame sukartustatme.

²⁶ Tura nuiyasha ina tagkuri aina nuiya etegkra maa epeakur Yuus israelita ainati umirtai ememattasa yaruaktatji. Tura Yuus eme anentsa iiyakur ememattinnum jeaarsha tagku ainasha urutmak maar epeataj nuka eke nekachu asar chikichik tagkuksha ikukchattaji, tusa tinaiti.

²⁷ Turasha Yuus faraónnaka enentaimkachu amajsauwaiti. Turamu asa jiintrar wearti, tusa tichauwaiti.

²⁸ Nuiyasha Moisésan faraón chicharuk: ¡Juiyagka jiinkim wetá! ¡Atak awenam takmeka mantamnattame! tusa tinaiti.

²⁹ Takai Moisés faraónkan chicharuk: “Nuka nekas turutme atakka tachattajai, tusa tinaiti”.