Eclesiastés 3 - New Testament with Old Testament portions

Ju nugkanam iruna nunauka tsawantri ashi aruinawai

¹ Ju nugkanam iruna nunauka, nutin tumati tusa timau tsawantri ashi aruinawai.

² Nutin akinati tusa timau tsawan jeamtai akinji. Tura nutin jakati tusa timau tsawan jeamtai jainaji. Árak aratnusha tsawan awai, tura árak juuktincha tsawan awai.

³ Tsawantri jeamtai maaninak magkartuinawai, tura tsawan jeamtai shuar jancha tsuwainawai. Tsawantri jeamtai yaaktan yumpuinawai, tura yaakat yumpuarmaun ataksha iwaraina nunaka tsawantri jeamtai turuinawai.

⁴ Utku pujustincha tsawan awai, tura wishirtincha tsawan awai. Wake mesemar pujustincha tsawan awai, tura jiistamku pujustincha tsawan awai.

⁵ Kaya utsagtincha tsawan awai, tura kaya utsagmau yaruakar irumratnusha tsawan awai. Shir anennaiyaku pagkunaiktincha tsawan awai, tura kanarnaikitnusha tsawan awai.

⁶ Takáku kuit juamusha tsawan awai, tura takatsuk pujustincha tsawan awai. Warí aina shir kuitamsa ikustincha tsawan awai, tura warí aina shir kuitamsa ikutsuk pujustincha tsawan awai.

⁷ Jaanch jaaktincha tsawan awai, tura jaanch jaakmau apartincha tsawan awai. Chichatsuk pujustincha tsawan awai, tura chichaktincha tsawan awai.

⁸ Anenaisa pujustincha tsawan awai, tura kajernaikatnusha tsawan awai. Maanitsuk agkan shir pujustincha tsawan awai, tura maaniaku pujustincha tsawan awai.

⁹ ¿Shuar senchi takak waitaksha wari pegkerna juawa?

¹⁰ Shuar ainatin takainak pujusarti tusa takat ainan nukap Yuus suramsauwaitaj nuna enentaimsan iismajai.

¹¹ Yuus nugkan najankugka ashi pegker ainan najankauwaiti. Nuiyasha shuar ainatinka yaunchukia ainancha, yamai iruna nuna tura atak atina nunasha tuke aneakuk arti tusa suramsauwaitji. Turasha ashika nekainatsji.

¹² Shuartika eke iwáku pujakrika shir aneasar pujumainaitaj nuna nekajai.

¹³ Tura nuiyasha Yuus turati tusa turamin asamtai, ii takasmau aina nuiya yutai ainasha yuinaji, tura umutai ainasha umuinaji.

¹⁴ Yuus najankamu aina nuka nuiya ekekrika najanmaitsu nuna, tura nuiyasha emegkatkesha emegkamaitsu nunasha nekajai. Yuus nuna turawa nunaka senchirtinapita tusa turutiarti tusa turawaiti.

¹⁵ Yamai iruna nuka, yaunchuk nagkamas ashi ajakuiti. Tura atak atin atii tusa timauka, yamai iruna nuwaiti. Nunaka Yuus ataksha awena tumati tusa timau asa tumawai.

Shuarsha tura kuntincha jakar nugka jasartinaiti tusa timau

¹⁶ Ju nugkanmagka apu chichaman iwarin aina chicham akaisha iwarartatua tusa enentaimtamsha chichaman metek iwarainachu asarmatai shuar aina waitainan wainkamjai.

¹⁷ Turasha tsawan jeatna nui Yuus shuar pegkeran takasu ainan, tura pegkerchau takasu ainancha etegkatna nu tsawan jeatnaiti. Nuna tu enentaimsan pujajai.

¹⁸ Tura nuiyasha shuar ainatika: Kuntinjaigka metekea ainajia tusar nekamawarti tusampa Yuus nekamtikramjia tu enentaimjai.

¹⁹ Nekas isha kuntinjai metek ainaji. Tumau asar nase mayattsar iwáku pujuinaji. Jakrisha kuntin ja tumasrik jainaji. Tuma asar ika nagkamsaria pujuinajia tu enentaimjai.

²⁰ Shuar ainati jakrisha, tura kuntin aina jainaksha chikichik nugkanmag wenaji. Nugka juyujuyuntu juki najanamu asar, jakrisha ashi metek nugka juyujuyuntu wenaji.

²¹ Shuar jainak wakani nayaimpinam wenawash, tura kuntin jainaksha wakani nugka init wenawash, nunaka chikichkiksha nekainatsui.

²² Shuarti jaka arin ataksha inantamki atak nagkamaktina nuna iwainturmamainka chikichkiksha atsawai. Ika takak pujusti tusa timau asar, ii takasmaunmaya aina nuiya jukir yuakur shir aneasa pujumainaitji.