Deuteronomio 9 - New Testament with Old Testament portions

Yuus israelita ainanka nepetmakti tusa yaigtinaiti timau

¹ Moisés ni shuar ainan chicharuk: ¡Wii shuar ainata antuktarma! Atum ainatirmeka nukap arutsuk entsa Jordán amain katigtattrume, tumarum nu nugkanmaya shuar aina nu jiirtatrume. Nu shuar ainaka atumin nagkatamsau kakaram ainawai, tura nita yaaktari ainasha pegmara shir takasmau uun ainawai.

² Nu nugkanmaya shuar ainaka nayau, Anac weantu shir esaram ajakarua iman aina pujuinawai. Tuma asamtai Anakita shuar weantu ainajaigka maanimain ainatsui tusa tamauka, atumka antuku ainarme.

³ Turasha atumka Yuus yainmasmatai wearum nuka nekarme. Nigka ji keek ekemak emegkaina iman asa, atumsha wainmaunam nitanka ijinattawai. Yuus turatnaitrume tusa atumin turamnaitrum turusag atumin yainmak nitan kakakchau amajsamtai nukap arutsuk jiirum ijinattarme.

⁴ Yuus atumi shuari ainan atum wainmaunam jiir utsak nugkan suramsamtaisha, maaketi ii ima pegker ainaj nui Yuus juna nugkan suramsaji titin airpa. Yuuska nu shuar ainanka nita pegkerchaurin jiirtinaiti.

⁵ Nuna Yuus turatna nunaka atum ima pegker asaakrumin turashtinaiti. Antsu nunaka nita pegkerchaurin, tura nuiyasha atumin uuntri Abraham, Isaac tura Jacob nu ajakarua nuna nekas umiktinaitjai tusa tina turusag umiak turatnaiti.

Israelita aina mura Sinaínam Yuusa chichamen umikchamu

⁶ Atum ainatiram shir nekamainaitrum nuka juwaiti: Yuus atumin nugka pegkera nuna suramsattarme. Nunaka atum ima pegker asaakrumin turutmashtatrume, atumka Yuusa chichamegka wakerusrumkesha umiktasrumka wakeratsrume.

^7-8 Egipto nugkanam pujarmin jiirmarua nui nagkamas Yuus, aya nugkanmag pujusrum, tura yamai pujarum juisha, tura nugka Sinaí tutainam pujusrum ni umirkachu asarum senchi akajkauwaitrume. Turamu asa ashi ijitmattsa wakerutmakuitrume, nu kajinmattsuk aneaku atin ataarma.

⁹ Sinaí nugkanam Yuus ijai chichaman umikua nuna kaya tablaya numamtinnum aarmaun jukittsan Sinaí naintrin wakauwaitjai. Tuman nu nainnum ijarman cuarenta tsawan, tura cuarenta káshi pujusuitjai.

¹⁰ Nui pujai Yuus kaya tablaya numamtin ainan jimaran surusmiayi. Nu kayanmagka wii eke nainnum wetsuk atumjai nain taritkamunam pujai ji keamunam aujtamsamiaj nuna ima nigki aarmau amiayi.

¹¹ Nui cuarenta tsawan tura cuarenta káshi ején pujai, kaya tablaya numamtin jimarnum chicham umikmau aarmaun Yuus nunaka surusuiti.

¹² Tura wina chichartak: Wii shuar aina Egipto nugkanam pujuina jiirmam nu wina chichamrun umirtutsuk tunau shir pegkerchaun takainak, jiru ainan jinum jia imintrar najanawar ina yuusri atii tusar eme anentas iiyainak emematainawai, tumaina asarmatai wári waketkita, tusa turutnaiti.

¹³ Nuiyasha Yuus chichartak: Ame weantu aina chichaman umichu aina nunaka shir nekajai.

¹⁴ Tumaina asarmatai ameka nita ainaka pachisam chichamrukaipa. Wina umirtukcharu aina nunaka ijinawartatjai. Turan nitanu aina wainkur enentaimtumain aina nunasha ashi emegkatrattajai. Turasha aminka tura amee weantu ainanka apu amajsartatjai, kakaram artinaiti tura shir nukap artinaiti, tusa turutmiayi.

¹⁵ Tusa turutmatai nainnum ji keamunam pujaun tablaya numamtin jimarnum chicham umikmau aina aarmaun jukin waketkimiajai.

¹⁶ Tuman atum pujuinamunam tajkaman, Yuus tunau takarkurum, chicham umiktarma tusa turamna nuka umitsuk, wári kajinmatki inaiyakrum jiru jinum jiarum imintrarum chikichik vaca aishmag tsakat najana pujarmin wainkauwaitjarme.

¹⁷ Nuna tuman kaya tablaya numamtin jimar najanamun, yaki takuin atumsha waintrumin ajiaran tsairuitjai.

¹⁸ Nuna turan atum yaunchuk tunau takasakrumin Yuus atumin kajertamkamtai Yuus ememattasa iruuntai jeanam nina aujkun tepesan cuarenta tsawan nuiyasha cuarenta káshi yurumkan yutsuk, tura entsancha umutsuk pujusmiaj tumasnak Yuusan aujkun pujumiajai.

¹⁹ Atum tunau takasakrumin Yuus atumin senchi kajertamkau asa ijinattsan wakerajai tusa turutin asamtai, nitanka Yuusapi ijinattawa tusan shir senchi wika puyatkamiajai. Turasha atumin pachisan aujsamiajai, turam Yuus wii timaun ataksha anturtuk umirtukmiayi.

²⁰ Tura nuiyasha Aarónnasha turusag Yuus shir senchi kajerak maattsa wakerimiayi. Turakai nunasha turusnak wii aujtusmiajai.

²¹ Atum tunau takákrum, vaca aishmag tsakata numamtin orojai najanamun, jukin jinum epean minarmatai shir tsaikan juyujuyun amajsamiajai. Nuna turan naintia entsa tamunam nagkiman utsagmiajai.

²² Nuiyasha nugka Tabera, Masá, tura Quibrot-hataava tutai aina nui pujusrumsha Yuus akaju jakuitrume.

²³ Cadés-barnea tutainam pujarmin, Yuus atumin chichartamuk: Wii nugkan atumnau atinan anajmatawaitjarum nui wetaarma, tusa turamkaisha ninii nekaspapita tachau asarum, Yuus tumatarma tusa turammauka umirkachu ainarme.

²⁴ ¡Atumin wainu jakuitaj nui nagkamsan, atumka chicham umiktarma tusa Yuus turamna nuka umirkachu ainarum, nunaka shir nekajrume!

²⁵ Tumau asaakrumin Yuus atumin Sinaínam ijitmattsa wakerakai, Yuus iruuntra ememattai aaknum tepesan atumin pachisan chichakun cuarenta tsawan, tura cuarenta káshi pujusuitjai.

²⁶ Nui pujusan Yuusan nukape aujkun: Ame winau arti tusam etegkamuram aina Egipto nugkanam pujuina amina senchirmijai jiiruitiatam ijinawaipa.

²⁷ Amina umirtamin Abraham, Isaac tura Jacob nu aina anearta. Tumakum ju shuar aina chichaman umichu ainakaisha, tura nita tunauri ainasha tsagkuram wait anentrata.

²⁸ Nita ijinawakminka egiptonmaya aina chichartamainak: “Yuuska israelita ainan ina nugken pujuinan nitan kajera asa jiir ni nugkan anajmatawa nui ejétajkama tujintak aya nugkanmag uwekamas ijinayi tusar turamiartatui.

²⁹ Turasha amee shuar ainaka ame etegkamuram asar aminu ainawai. Amina senchirmijai wainchatai aina iwainaram Egipto nugkanam pujuina ayamrukam jiirmiame”, tusa Moisés Yuusan tinaiti.