Deuteronomio 8 - New Testament with Old Testament portions

Shuarka ima yurumkanak yusagka pujumaitsui tusa timau

¹ Moisés ataksha ni shuar ainan chicharuk: “Atum ainatirmin chicham umiktin ainan pachisan yamai ujajrum nu metek umiktarma. Tumakrumka ina uuntri ainan Yuus nekas nugkan susatjarme tusa anajmatawa nui pujustinaitrume. Tumarum jatsuk pujusrum nukap pampagtinaitrume.

² Egipto nugkanam pujarmin Yuus jiirmar cuarenta uwí aya nugkanmag uwe uwekatmakua, imajai itarmawaitrum nu kajinmatkirpa. Iman uwí uwekatmasua nunaka, wina chichamrun umirtumainash aina tusa nekapramas iirmastasa turutmawaitrume.

³ Nukap tsawan tsukai waitakrumnasha atum wainchatain, tura atumi uuntri ainasha wainu jakchamun maná tutain Yuus nayaimpinmayan akupturmakmatai yuawaitrume. Ni nuna turawa nunaka shuarka ima yurumkanak yusagka pujuschatnaiti, antsu ima Yuus chichamun antak iwáku pujustinaiti tusa turawaiti.

⁴ Aya wekataik cuarenta uwí ejénaitrume. Iman tsawan yujakrumsha, atumi jaanchri ainaka mamurcharuiti, tura atumi nawe ainaksha eakcharuiti.

⁵ Shuar nina uchirin pegkeran unuimarti tusa jintinna numamtuk, Yuus atumin anenmau asa, pegker arti tusa jintintramuk waittan suramsauwaitrume.

⁶ Tuma asamtai, Yuus arantusrum iiyakrum chicham umiktarma tusa turamnaitrum nu metek umiktarma.

⁷ Atumnaka nugka shir pegkeran, nainnum, tura nugka pakanam entsa aina irunun, ashints aina, tura entsa pukuni jinin aina irunun Yuus suramsattarme.

⁸ Nu nugkanmagka trigo aina, cebada tutai aina, uva ajanam arakmau aina, higo tutai aina, munchi aina, olivo tutai aina tura napa yumiri ainasha nukap irunui.

⁹ Nu nugkanmagka atum ainatirmeka atsumtsuk yuatnaitrume, tura chikich warí aina nusha atsumchatin ainarme. Tura kayanmaya aina hierro tutai aina waintinaitrume, nuiyasha nainnum tairum cobre tutai aina jutinaittrume.

¹⁰ Turasha yutai aina nu yuarum ejemarum shir aneasrum pujakrumsha, nugkan pegkeran suramsau asamtai kajinmattsuk, maaketi tusarum Yuus titin ataarma”, tusa Moisés ni shuar ainan tinaiti.

Yuus kajinmatkitin airpa tusa timau

¹¹ “Yuus kajinmatkirpa, tura nina chichame umiktarma tusan yamai atumin jintinjarum nusha kajinmatkitin airpa.

¹² Turasha yutai yuarum ejemarum shir aneasrum pujakrumsha, atum jea pegker jeamkamunam shir pujakrumsha,

¹³ atumi ovejari aina, vaca aina, oro aina, jiru plata tutai tura chikich warí ainasha nukap arutramainakaisha,

¹⁴ nu iman arutramainakaisha emematsuk, Yuus atumin Egipto nugkanam inaku waitkatai pujarmin jiirmarua nu aneaku atin ataarma.

¹⁵ Atumin aya nugkanmag tsumainnum nápi asai magkartin aina irunmaunam, tura titig aina irunmaunam uwekatmasua nuisha umitmakchau ainarum nu kajinmatkitin airpa. Entsa atsamunmayan muchignumian entsan jimtai umaru ainarum nu kajinmatkitin airpa.

¹⁶ Aya nugkanmag pujarmin, wina chichamrun umirtumainash aina tusa atumin yutai maná tutain, atumi uuntri ainasha wainujakchamun nayaimpinmayan Yuus akupturmakmatai yuawaitrum nu kajinmattsuk aneaku ataarma. Nunaka atumin pegkernum yainmaktasa turutmawaitrume.

¹⁷ Ashi atum atsumamu aina arutramainakaisha, ina senchirinkiapi takasar imajtikajia tuka enentaimsatin airpa.

¹⁸ Nuka tu enentaimtsuk Yuus ina uuntri ainan nekas turatnaitjai tusa anajmatawa turusag, inka senchimtikramkai takasar ju ainaka ashi jukijia tu enentaimratin ataarma.

¹⁹ Yuus kajinmatkurum chikich shuar yuusrimtai aina nu eme anentsa iiyakrum emematkurminka ashi ijitmatnaitrume. Nuka nekas uminkatnun tajarme.

²⁰ Nu tumachkurmeka atumi shuari ainan Yuus ijinatna turusag atumnasha Yuus ijitmatnaitrume”, tusa ni shuar ainan tinaiti.