Deuteronomio 7 - New Testament with Old Testament portions

Moisés ni shuar ainan yuus atii tusa najanamu ainaka emematirpa tusa timau

¹ Moisés ni shuar ainan ataksha chicharuk: “Ina Yuusri, atum pujustinan nugkan suramsatta nui ejétama nuiya shuar siete nugka uun ainanmayan atumin nagkatamsau shir nukap ainan, tura kakaram ainan: Hitita ainan, gergeseo ainan, amorreo ainan, cananeo ainan, ferezeo ainan, heveo ainan tura jebuseo aina pujuina nuna atumsha wainmaunam Yuus jiirtatui.

² Yuus atumin nu shuar aina nuna nepetkarti tusa senchimtikramattarme. Turutmamtai nita aina wait anentsuk, nitajai chicham umitsuk nu nugkanmaya shuar ainaka ashi ijinatarma.

³ Nuiyasha atumi uchiri aishmag aina, tura atumi nawantri ainasha nuu shuar ainajaigka nuwemtikawairpa.

⁴ Nuu shuar ainajai nuwenawarka nitan umirainak Yuusa nuna eme anentsa iitan inaiyainak yuusrimtai aina nuna eme anenmain ainawai. Tumainakaigka Yuus ni umirchamu asa atumin kajertamak wári ijitmamainaitrume.

⁵ Antsu nuka turutsuk yuus emematji tusar tagku aina maawar patasa epetairi najankamu aina nu tsairatarma, turakrum kaya nita ememattairi aina nusha tsairatarma, tura númi uun tsupikmau aina Asera tutai najankamun ememataina nusha ekemartarma. Tura nuiyasha chikich nakumka najanamu aina nusha turusrumek ashi ekeemartarma.

⁶ Ii ainatinka Yuus winau arti, tusa chikich shuar aina nuiyatin etegtamrauwaitji”, tusa Moisés tinaiti.

Yuus etegkamu ainaji tusa Moisés ni shuar ainan timau

⁷ “Yuus ina etegtamawaitaj nunaka, chikich nugkanmaya shuar aina nuiya ika eme anentsa iishtai arinig etegtamawaitaj nunaka, ina ima senchi anenmau asa turutmawaitji.

⁸ Atum ainatirmeka Egipto nugkanam pujusrum, nu nugkanmaya apu aantra inaku waitkatai pujarmin Yuus atumin anenmau asa, atumi uuntri ainan anajmatawa turusag nina senchirijai jiirmaruitrume.

⁹ Nu turamu asarum Yuuska ima nigkiapita tusarum nekatarma. Shuar nina anenak nina chichamen metek uminanka, ni anajmatawa turusag nita weantu ainajaisha metek uminaiti tusarum titarma.

¹⁰ Turasha shuar nina nakitainak chichame umirchamka, nukap tsawan nakaa pujutsuk waittan suwaiti.

¹¹ Tura asamtai, atum ainatirmeka chicham umiktarma tusa ni timauwa nuna wii yamai ujajrum nuka metek umiktin ataarma”, tusa Moisés ni shuar ainan tinaiti.

Chicham umiktin aina nu metek umiakrumka shir aneasrum pujustin ainarme timau

¹² “Chicham umiktin aina ju atum ainatiram metek umiakrumnaka, Yuus ina uuntri ainan anajmatawa nunaka metek umiktinaiti.

¹³ Atum nina chichame metek umirmaka anenmatnaitrume, pegkernum yainmaktinaitrume, tura shir nukap pampagti tusa turamtinaitrume. Atumi uchiri ainancha shir aneasarti tusa pegkernum yaigtinaiti, trigo ainasha, vino ainasha tura aceite ainasha nukap ariarti, tusa yainmaktinaitrume. Ina uuntri ainan nugkan anajmatawa nui pujakrumin atumi vacari ainasha, tura ovejari ainasha nukap uchirmainak pampagkarti, tusa pegkernum yainmaktinaiti.

¹⁴ Atum ainatirmeka chikich shuar aina nu nagkasau pegkernum yaigmau atinaitrume. Nuwa ainaka chikichik nuwaksha uchin nijachuka atsutnaiti, aishmag ainasha chikichik aishmagkesha uchin akichuka atsutnaiti, tagku nuwa ainasha chikichkiksha uchin petsachuka atsutnaiti, tura tagku aishmag ainasha chikichkiksha uchin akichuka atsutnaiti.

¹⁵ Atum ainatirminka jatan achiimak jainak waittsarti tusagka Yuus pegkesha tsagkamramkashtinaitrume. Atum ainatirmin kajertamainaka Egiptonmaya aina waittsarua tumasag nitasha waittsartatui. Turasha atum ainatirmeka tuka waitsashtin ainarme.

¹⁶ Chikich shuar aina nu ijinatarma tusa Yuus nina senchirijai yainmak nugkan suramkaigka, wait anentsuk ijinatin ataarma. Nita yuusrimtai aina nukesha eme anentsa iiyakrum emematirpa, antsu nu eme anentsa iiyakrum emematkurmeka atumsha ishichik ja jakuarum ashi jinatnaittrume.

¹⁷ Nu shuar aina ina nagkatamsau shir nukap ainawai, tura ina nagkatamsau kakaram ainawai, tumau asarmatai ika nitaka nepetkar jimaitsuji tu enentaimrume.

¹⁸ Turasha nitaka ashamkairpa. Egiptonmaya apun, tura ni shuar ainajaimak Yuus waittan susauwa nu kajinmatkirpa.

¹⁹ Egiptonam pujarmin atumin jiirmartasa atumsha waintrumin wainchatai ainan Yuus nina senchirijai nukap iwainarua nu aneartarma. Tura atumi shuari aina nukap asarmatai nita ashamarum nunasha turusag Yuus wainchatai ainan nina senchirin iwaintuktatui.

²⁰ Atumi shuari aina atum ijiniam tsekegki uumak uwemrau ainancha, ijurar ijinati tusa éte ainan Yuus ishitkattawai. Chikichik shuarkesha waittan jukij tusa tsekegki uumak uwemrauka atsuttawai.

²¹ Ii umirtai ina Yuusri senchirtin ashammaina nu ijai pujau asamtai, atumi shuari ainaka ashamkairpa.

²² Kuntin yukartin aina nukap pampag nu yaaktanam kaunkar atumin amutmamain asamtai, atumi shuari ainaka ju tamauwaikka ijinmain ainatsrume. Antsu Yuus chiki chikichik yaaktanmaya shuar ainan ujumak jiya jiyakua ashi jiirtinaiti.

²³ Nu shuar aina nunaka nita nepetkarti tusa Yuus atumin yainmak kakamainchau amajsarmatai nitaka ujumak maa makuarum ashi ijinattarme.

²⁴ Turamu asar nita apuri ainaka atumin tawartatui, tumawarmatai atakea nuisha anearchatin chikichkiksha ujutsuk ashi ijinarum emegkartinaitrume.

²⁵ Tura nita yuusrimtairi aina nusha ekematkatin ataarma. Nu turakrumsha yuusrimtai orojai, tura kuitjai najanamu ainasha jukirpa, nu juakrumka eme anentsa iiyakrum turumain ainarme. Nu turamunka Yuus pegke nakitawai.

²⁶ Nu ainanka Yuus nakita asa ekemarta tusa tinaiti. Tusa tinu asamtai atumsha nu ainaka nakittsa iistarma, atumin jenkesha jukirpa. Nu aina juakrumka nujaimak ekeemam atinaitrume”, tusa Moisés ni shuar ainan tinaiti.