Deuteronomio 4 - New Testament with Old Testament portions

Moisés ni weantu ainan chicham pegkesha kajinmattsuk umiktin ataarma tusa timau

¹ Moisés ni shuar ainan chicharuk: Chicham umiktin ainan pachisan wii tuke jintinjarum nu metek umiktin ataarma. Nu turakrumin Yuus ina uuntri aina umiru jakmauwa nu, atumin nugkan suramsattarme.

² Chicham umiktinan jintintajrum juka nu nukap iwakarum aartin airpa, nuiyasha asakartin airpa. Antsu nuka turutsuk chicham umiktarma tusa Yuus ina turamna turusrumek umiktin ataarma.

³ Mura Baal-peornum, yuusrimtai Baal tutain ii weantu aina ujumak shuar emematiaru asarmatai, ina Yuusri tuke pujuwa nu, nitan nu muranam ijinawa nuka atumsha wainkau ainarme.

⁴ Turasha atum ina Yuusri tuke pujuwa nuna chichame metek umiku ainatirmeka iwáku pujarme.

⁵ Ina Yuusri turutmaun chicham umiktin ainan pachisan wii atumin jintintawaitjarme. Nunaka nugka atum pujustinnum jearum pujakrumsha metek umiktin ataarma tusan turawaitjarme.

⁶ Wii tajarum ju metek umiakrum tura metek takákrumnaka, nu nugkanmaya shuar aina atum jintinkartamun antukar atumin pachitmasar chichainak: “Nitaka shuar yacha, shir pegker tura pegkernasha tura pegkerchauncha nekainawai”, tusar enentain jeachartin ainawai.

⁷ Chikich nugkanmaya shuar aina shir pampagkaru ainakaisha, ina Yuusri ii atsumamu pachisa seam, ina pegkernum yainmaj imatika yaimainka nita yuusrigka pegke atsawai.

⁸ Nuiyasha chikich shuar aina shir nukap pampagkaru ainaksha, ii chicham umiktin shir pegker aina jukinaitaj imanun jukinka pegkesha atsawai.

⁹ Tuma asamtai eke jatsuk pujakrumka Yuus atumin iwainturmakai wainkauwaitrum nu, tura chicham umiktin ainan jintintawaitjarum nusha pegkesha kajinmattsuk aneakuk pujakrum, atumi uchiri aina, tura atumi tiragke ainasha, nu pachisrum jintintatin ataarma, tusa Moisés ni weantu ainan tinaiti.

Nain Sinaí tutainam Yuus wantinkauwa nuna Moisés nina patai ainan anemtikramu

¹⁰ “Nugka Sinaí tutainam pujarmin, Yuus wina chichartak: ‘Ame weantu aina irumrata, wii chichakai antukar unuimarar kashi kashinig uminak, nita uchiri ainancha nita pegkeran takámun jintintaawarti’ ”, tusa turutnaiti.

¹¹ Tusa turutkai atumin ujakuitjarme, turam atum ainatiram Sinaí naintri taritkamunam iruuntramiarme. Tumakrumin Sinaí naintrin jiya numamtuk senchi keek yaki jas yuragkim najanar káshi jasmiayi.

¹² Nu jiya numamtin keamunam pachitkau Yuus chichamu antuku ainarme. Turasha ni chichamuri antakrumsha nakumka najanamuksha wainkachu ainarme.

¹³ Ni chicham umikmaun atumin nekamtikramawaitrume. Tura kaya tablaya numamtin jimar najanamunam chicham atum umiktin ainan diez aarmaun suramsauwaitrume. Turak nu chichamka umiktarma tusa turamnaitrume.

¹⁴ Chicham umiktin aina pachisam ame shuar aina jintintawarta, turamu asar nita nugkan jukiartata nui pujuinaksha chicham umiktin aina nuna metek umikartin arti tusa Yuus mura Sinaínam wina turutnaiti, tusa Moisés ni shuar ainan tinaiti.

Shuar najankamu yuusrimtai aina nuka ememattin airpa tusa Moisés timau

¹⁵ Nain Sinaí tutainam jiya numamtin keamunam pachitkau Yuus atumin aujtamsauwa nuisha yuus atii tusa najanamuka wainkachu ainarme. Tuma asarum

¹⁶ yuus atii tusarum aishmag iimtin, tumachkusha nuwa iimtinkisha najanarum emematkurum tunau takasairpa.

¹⁷ Ashi kuntin aina: “Nugka wekain aina, nanamtin aina,

¹⁸ japinas wekain aina turachkurmesha namak ainaksha yuus atii tusarmeka najanarum ememattin airpa.

¹⁹ Etsa, nantu, ya aina nukesha wainkarum ima pegker ainawa, tusarmeka eme anentsarum iistin airpa”. “Nu aina nunaka chikich shuar aina ju nugkanam matsataina nu emematiartin ainawai, tusa ina Yuusri najankauwaiti”.

²⁰ Antsu atumnaka Egipto nugkanam shir senchi waitakrum tura jinattakrum pujarmin Yuus ninu amajtamsattsa jiirmaruitrume. Turamu asarum yamaika ninu ainarme.

²¹ Turasha atumin iturchatrinig Yuus winaka kajertukuiti. Turuta asa entsa Jordán amainka katigchattame, tura nugka pegkeran nitan susartajai tusa tinaitaj nuisha jeashtinaitme, tusa Yuus turutnaiti.

²² Tusa turutin asamtai, wika Jordán entsanka katittsuk ju nugka juig pujusan jakattajai. Wii tumakaisha atum ainatirmeka Jordán entsa katitkarum nugka pegkera nu akinkarum pujustin ainarme.

²³ Turasha Yuus atumjai chichaman umikua nu kajinmatkitin airpa. Nuiyasha yuusrimtai aina emematirpa tusa Yuus turamnaittrum nu kajinmatkitin airpa, ina yuusri atii tusarmeka najanatin airpa, nuiyasha nakumtaksha nakumkatin airpa.

²⁴ Yuus anenmau asa winak eme anentrus iirainak umirtukarti tusa wakerinaiti. Tumau asa ni umirchamka ji keak aesa emegkaina numamtuk ijitmamainaitrume.

²⁵ Atum ainatiram nu nugkanam nukap uwí pujusrum, uchi aina akigkrum tura tiragkrumkarum, untach jasrum pujusrumkesha chikich shuar aina nita yuusrimtairi aina nuna emematainakai wakerumain ainarme, tumakrum ina yuusri atii tusarum najanarum, nu turachkurmesha nakumkarmeksha emematkurmeka shir pegkerchau takákrum tumamainaitrume. Nu tumakrumka Yuus akajeakrum tumatnaitrume.

²⁶ Entsa Jordán amaini katigkrum nugka jukirum pujusrum yuusrimtai nakumkamu emematkurmeka, nukap tsawanka pujuschatin ainarme. Antsu tumakrumka jinatin ainarme. Tusan tajarme nu metek uminkatta nunaka nayaimpin nugkajai shuara numamtuk antuinai tajai.

²⁷ Yuus atumnaka chiki chikichik nugkanam napamtamak ishitmaktinaitrume. Turutmamtai nu nugkanam pujusrum jinatnaittrume. Tumakrum ishichik shuartiram iwáku pujustin ainarme.

²⁸ Nui pujusrum nuiya shuar aina yuus atii tusa numijai najanamu aina, tura kayajai najanamu aina, wainmachu, antichu, yuchau tura mayattankesha mayatchau aina nu eme anentsa iiyakrum ememattin ainarme.

²⁹ Nu nugka ainanam tu pujakrumsha ataksha Yuus umirkattsa wakeruktinaitrume. Tumakrum ataksha nigki umirkattsa wakerusa pegker enentaijai aujmaka anturtamak wina umirtukarti tusa yainmaktinaitrume.

³⁰ Atum chikich nugkanam matsamsarum nakumkamu emematkurum waitu pujautiram inaiyakrum ataksha Yuusa chichame umirkurum ememattarma.

³¹ Yuuska wait anenkartinaiti. Tumau asa, nigka atumnaka inaitamsashtinaitrume, tura ashi jinati tusagka turamchattarme. Nuiyasha atumi uuntri ainajai chichaman umikua nunasha kajinmatkishtinaiti.

³² Yuus yama nagkamchak shuar ainan najanawa nu enentaimsa iistarma. Ashi nugkanam eaktarma. Chikich shuar ainasha wainchatai aina ii wainaj imaun wainkarusha ainawash, nu enentaimsarum iistarma. Chikich ainaka ii wainaj imaun wainkauka atsawai. Tura ii yamai antaj nuna antukuka atsawai. Nuka pegkesha tumachuiti.

³³ Jiya numamtin keamunam pachitkau Yuus chichamuka ima ik antuku ainaji. Atum ainatiram antuku akurmesha jakachu ainarum tumawaruka chikich shuar ainaka atsawai.

³⁴ Yuusa nuke shuar ainan winau arti tusa etegkawaiti, nuka ii ainaji. Chikich shuar aina yuusrimtairi aina nuka pegkesha turacharuiti. Inka Egipto nugkanam matsatutin jiirmak, nina senchirin iwainak pegkesha ii wainkachmau ainan iwainturmak, egiptonmaya ainan waitkasuiti. Yuus ina ayamrutmak egiptonmaya ainan senchi sapijmamtikauwaiti, tura suntar ainancha ijinawaiti. Nuna turawa nuka atumsha wainkau ainarme.

³⁵ Yuus nina senchirin atumin iwainturmakua nunaka, niya imauka chikich yuus atsau asamtai, wii nekas Yuusaitaj nuna nekawarti turamu asa turutmawaitji.

³⁶ Ina tunaun takachu arti turamu asa, nayaimpinam pujusag chichartamkauwaitji, tura nain keasha wainkau ainaji, nuiyasha jiya numamtin keamunmaya chichamusha antuku ainaji.

³⁷ Ina uuntri ajakarua nuna ane jaku asa, nuu weantu ainatin Egipto nugkanam pujarin nina senchirijai ina jiirmar agkanmamtikramawaitji.

³⁸ Ii wainmaunam chikich shuar shir nukap ainan, tura ina nagkatamsau kakaram ainan jiiruiti. Nu turamunam atum yamai nita nugke jukittsarum pujarme.

³⁹ Tuma asamtai, nayaimpinam tura nugkanmasha Yuusa nuka ima nigkiti, chikich atsa nu nekatarma. Tumarum kajinmattsuk aneaku ataarma.

⁴⁰ Tumakrum chicham umiktin ainan wii yamai ujajrum nu, atum ainatiram, tura atumi uchiri ainasha metek uminakaigka pegkernum yayám atinaitrume. Tura Yuus atumin nugkan anajmatramawa nui pujakrumsha nukap uwí pujustin ainarme tusa Moisés ni shuar ainan tinaiti.

^41-49 (-)