Deuteronomio 13 - New Testament with Old Testament portions

¹ Atum ainarum nuiya chikichik shuar Yuus timaun etserjai tinu, tumachkusha karanam wainkamun etsernaitjai, tusa tinusha artinaiti. Nu chichaak: Yaunchuksha wainujakchamu nagkamartata nunasha nekauwaitjai, tusa timauri

² metek uminkai atumin chichartamuk: ¡Atum nekashtai chikich yuus aina nu emematiarmi! tusa turamiartinaiti.

³ Tusa turamainakaisha umirkatin airpa. Nunaka ina Yuusri nekas winash anentaina, winigkiash enentaimas pujuina, tura pegker aina nunak umikartaspash enentaimas pujuina tusa nekapramas iirmastasa turutmatin ainarme.

⁴ Atumi Yuusri umirkurum nigki arantusrum iistin ataarma. Tumakrum chicham umiktarma tusa Yuus turamna nu, tura chichame antukrum ima nigki umirkatarma. Nu tumakrum nijai irutkau pujuttarme.

⁵ Yuus timaun etserjai tinu tumachkusha karanam wainkamun etserjai tusa nekau aina nuka, atum Egipto nugkanam aantra inaku waitkatai pujarmin Yuus jiirmar agkanmamtikramawa nujai shuarmamtikramattsa turamaina asamtai maatin ataarma. Nu shuar ainaka atumin Yuus chicham umiktarma tusa turamna nuna inaimamtikramsattsa turamtinaitrume. Tumau asarmatai atumin shuar tumau aina pujuina nuka ashi ijinatin ataarma. Nu turamka atuminka pegkerchauka atsutnaiti.

⁶ Amina yatsum, uchiram, nawantrum, nuwem tura amina amikrum chikich shuar aina yuusrimattsa nakumkamun ame nekashtai tura amina untrum ainasha nekajakchamu eme anentsa iismi tusa turamainakaigka,

⁷ atum pujamunam jeashtachu, nuna tumachkusha jeashat chikich nugka ainanmasha nita yuusrimtairi ainasha ashi irunkaisha,

⁸ nita anturkarum umirkairpa. Nuka pegkesha wait anentrairpa. Tura waittsai tusarmesha puyatrukairpa, nuiyasha ukairpa.

⁹ Nuka maatarma. Yama nagkamchakmeka amea kayajai tukuta, turawakmin nui chikich ainasha turusag kayajai tuku tukuinakua maawartatui.

¹⁰ Egipto nugkanam waitkatai pujarmin Yuus jiirmarua nuna umirtan inaimamtikramsattsa turamaina asarmatai, wait anentsuk kayajai tuka tukakuarum maitin ataarma.

¹¹ Nu turamun ii shuar chikich aina ashi antukar shir senchi ashammain ainawai. Tumaina asar chikich shuar aina yuusrimtairi ainanka eme anentas emematmainchau ainawai.

^12-18 (-)