Deuteronomio 12 - New Testament with Old Testament portions

Yuus ememattasa iruuntai jea jeamkamu

¹ Yuus ina uuntri umiru jakmauwa nu nugkan suramsamtai nui pujusar, ii chicham umiktin aina nuka ju ainawai:

² Nu yaaktanam atum wayarum shuar aina nepetkattarme. Tumarum nita wear pujusa yuusrimtai ememattairi aina, ikam ainanam, nain ainanam, tura númi uun aina nuna ajigkari iruna nujaimak ashi yumpugkrum utsagtarma.

³ Nita tagku aina maa patasa epetairi ainasha yumpuntratarma, kaya ainasha tsairatarma tura nita yuusrimtairi numi ajigkari ainasha ekematratarma. Nuiyasha yuus atii tusa najankamuri ainasha yumpuntratarma, nu turamu asa chikichkiksha atsuti.

⁴ “Atum ina Yuusri eme anentsa iiyakrumsha chikich shuar aina nita yuusrimtairi ainan yainkata tusa aujsartasa iturainawa tuka turawairpa”.

⁵ Ii doce tribu ainaj nuna nugke aina nuiyan chikichik tribu nugken ina Yuusri etegkattawai, nuna turamtai nu nugkanam nijai igkuniaktatji. Tura nui werum eme anentsa iiyakrum ememattarma.

⁶ Nu nugkanam tagku aina maarum ashi epeatin, tura tagku aina maarum ajamnaisatin aina jukirum ejétnaitrume. Tura atum takasa jukimu aina nuiya dieznumia chikichik akankarum jukirum wetaarma, susatjai tusa timauka susata, amek enentaimsam juna Yuusan susatjai timauka susata, tura nuiyasha vaca uchiri yama nagkamchaku petsakmau aina, tura oveja uchiri yama nagkamchaku petsakmau aina nu jukirum wetatrume.

⁷ Tuma nui jearum yutai aina Yuusa emtin atumi jeen pujuinajaimak yuattarme. Tumarum ina Yuusri pegkernum yainmak árak ainan tagku ainancha ii takasmaunam nukap suramsaji tusarum shir anettarme.

⁸ Nu nugkanmagka jui yamai chiki chikichik atum wakeramu takarum turashtin ainarme.

⁹ Turasha atumin nugkan amastatrum nuigka waitkascham shir pujusrum Yuus ememattattrum nuigka eke jeatsrume.

¹⁰ Yuus nugkan suramsatta nui entsa Jordán amain katigkrum pujuttarum nuigka jeashtachu atumi shuari pujuinakaisha atumin waitkascharti, tusa Yuus timau asar waitkarmaschartin ainarme. Antsu nuigka atumka sapijmatsuk pujustin ainarme.

¹¹ Ina Yuusri timaun wii yamai ujajrum juka nijai atum igkuniaktinan nugkan etegkatta nui metek umiktin ataarma. Turakrum tagku aina maarum ashi epeatin, tura tagku aina maarum ajamnaisatin aina jukirum ejétnaitrume. Atum takasmaunmaya dieznumia chikichik akankamu aina, amek enentaimsam juna Yuusan susatjai timau aina, tura susatjai tusa timau aina jukirum, tura warí shir pegkera juna susatjai tusa timauram jukirum nui Yuus ejétitin ataarma.

¹² Nu turarum atumi uchiri ainajai, atumi inatairi ainajai, tura wina untur Leví weantu aina pampagkar atumjai pujuinajaimak nitaka nugkan jukicharu asarmatai, nitajaimak iruuntrarum, Yuusa emtin jiistamatin ataarma.

¹³ “Yuus jui tagku aina maarum epeatarma tusa nugkan etegkachmaunam antrarum wekasarum tagku aina maarum epeawairum, kuitamamatarma.

¹⁴ Atum once tribu ainarum nuna nugke aina nuiyan chikichik nugkan Yuus etegkattawai, nuna turamtai wii tajarum nuka metek umiktin ataarma”.

¹⁵ “Antsu atum ainatirmin ina Yuusri yainmasmatai, kuntin ikamia ainan, nuna turachkusha tagku ainankesha suramsatta nuka Yuusjai igkuniaktasrum weakrumka tumatarma tusa timauwa nuka turutsuk, atum tuig pujutarum nui pujakrumsha iturchat enentaimtsuk atum wakeramu yuatin ataarma.

¹⁶ Antsu numpa aina nuka entsa nugkanam ukatia numamtuk, yutsuk ukara ajapatin ataarma”.

¹⁷ Tura trigo, vino, aceite aina nuiya dieznumia chiki chikichik akankamu ainaka, vaca aina tura oveja aina yama nagkamchaku petsakmau aina, susatjai tusa timauka susata, tura atum enentaimsarmek jusha Yuusnau atii tusa akankamu ainaka atumin jeen pujusrumka yuatin airpa.

¹⁸ Nu aina nuka ina Yuusri nugkan etegkatna nui ejérum, atumi uchiri ainajai, atumi inatairi ainajai, wina untur Leví ajakua nu weantu aina pampagkar atumjai pujuinajaimak nitaka nugkan jukicharu asarmatai, atum takasmaunam pegkernum yainmaku asamtai nukap suramsaji tusarum nitajaimak Yuusa emtin shir aneakrum jiistamatin ataarma.

¹⁹ Yuus nugkan suramsattarme, nui pujakrumsha wina untur Leví ajakua nu weantu ainaka yaitsuk inaisatin airpa.

²⁰ “Nugkan susatnaitjarme tusa Yuus turamnaitrum nui pujarmin nu nukap nugkan ekek suramsatnaitrume. Turutmamtai nui pujusrum kuntina namagke yuattsa wakerakrumka yuatin ataarma”.

²¹ Yuus ni iruuntra ememattai atin jean jeamkatnun nugkan etegkatta nu atum pujamunam jeashtaitkigka, Yuuska anajmattsuk, vaca aina, tura oveja ainasha maarum atum pujamunmag iruuntrarum, wii tajarum turusrumek atum wakeramu yuatin ataarma.

²² Yuusjai igkuniaktasa weakrumka nu turatarma tusa timauwa nuka turutsuk kuntin tagkuchu Yuus anajmatachmau asamtai iturchat enentaimtsuk yumainaitrum turusrumek atumi tagkuri aina maarum atum wakeramu yuatin ataarma.

²³ Turasha namag numpe ajaprutskeka yuawairpa. Numpa aramu asar ika pujaji.

²⁴ Antsu numpa aina nuka entsa nugkanam ukatia numamtuk, yutsuk ukara ajapatin ataarma.

²⁵ Nu numpa aina yuachkurmeka, Yuusa emtin pegker taká asarum atumi uchiri ainajaimak pegker pujustin ainarme.

²⁶ Susatjame tusa Yuus anajmatamurmeka turusmek susata. Tura junasha susatjai tusa anajmatamu aina nuka jukirum Yuus tuig nugkan etegkatnait nui jukirum ejétin ataarma.

²⁷ Nu turarum tagku aina maa patasa epetai amaunam atumi tunauri tsagkurnartin tagku aina maarum ashi epeatin ataarma. Tura tagku aina maarum ajamnaisatin aina jukirum ejétnaitrume. Nu tagku aina numpegka Yuus eme anentsa iiyakrum tagku aina maa patasa epetai aina nu ukatratin ataarma. Antsu namagkegka yuatin ataarma.

²⁸ “Wii tajarum ju shir antukrum metek umiktin ataarma, nu tumakrumka Yuusa emtin pegker taká asarum, atumi uchiri ainajaimak pegker pujustin ainarme”.

Chikich yuus aina nuka ememattin airpa timau

²⁹ Nuiyasha Moisés ni shuar ainan chicharuk: “Yuus nugkan suramsattarum nui jearum nuiya shuar ainajai maaniki maaniki weakrumin nugka akinki wetatrum nuigka Yuus iji ijinkauwa ashi ijinattawai. Nuna turamtai atum nu nugkanam pujustin ainarme.

³⁰ Tumakrumsha, nuiya shuar aina nitak yuusrimtairin najanawar eme anentas iin aina tumawairpa, Yuus nuiya shuar aina ijinawa turusag atumnasha ijitmamain ainarme. Nita yuusrincha uruk emematu jakaruit nuna nekattsa wakerajai tusarmeka tiirpa. Nu turakrumka yuusrimtai aina nu eme anentsa iiyakrum wakerumain ainarme”.

³¹ Chikich shuar aina nita yuusrimtairi ainan eme anentas iiyainak nita wakeramun takainawai. Tura uchi aishmag ainan tura nuwa ainancha epenak eme anentaina nuka Yuus iismaka shir pegkerchauwaiti. Tuma asamtai ina Yuusri eme anentsa iiyaakrumsha turatin airpa.

³² Chicham umiktinan jintintajrum juka nu nukap iwakarum aartin airpa, nuiyasha asakartin airpa. Antsu nuka turutsuk chicham umiktarma tusa Yuus turamna turusrumek umiktin ataarma.