Daniel 9 - New Testament with Old Testament portions

Daniel ni shuar ainan pachis Yuusjai chichasmau

¹ Medonmaya shuar Asuero ajakua nuna uchiri Darío apu jas Caldeo ainan inak pujujakuiti.

² Yaakat Jerusalénkan pachis Yuusa chichamen etserin Jeremías aarmaun: Darío apu jasmauri chikichik uwí ején ai Daniel aujsauwaiti. Turukma yaakat Jerusalénka yumpugkam setenta uwí ejétnaiti. Tumamtai shuar achira yaruakmau ainaka waketar Jerusalénnum pujusartin ainawai, tusa tu aarmaun nekawaiti.

³ Tura wake mesemar pujaku nugkutain nugkur yurumkan yutsuk yukunam pujus ni shuar ainan enentaimtus Yuusan aujuk:

⁴ Yuusru, ameketme apumka, tura ameketme senchirtinmeka. Iman asam amina anenmainak chichamrumin metek uminaka amesha wait anennaitme. Ame turatjai tusa timaurmeka tuke uminaitme.

⁵ Ika tunau takau ainaji. Tura pegkerchau takasmausha aminigka iwainmamtsuji. Tumau asar chicham umiktarma tusam ame tinaitam nusha umikchau ainaji.

⁶ Tura amina chichamrumin etserin aina, amina chichamrumin ina apuri ainan, ina uuntri ainan, tura ii ainatincha, ame timaurmin pachis ujatmainakaisha ii ainatika umirkachu ainaji.

⁷ Yuusru, ameka pegkeraitme. Antsu judío ainati, Jerusalénnumia aina, israelita chikich ainasha, jeashtachu puju aina, jeashat puju aina tura amina chichamrum umikchau asaakrin jiirkarturam chikich nugkanam utsagkartukuitam nu enentaimsar natsaamainaji.

⁸ Tura ina apuri aina tura ina uuntri apuri ajaku aina nusha tunaun takasaru asarmatai nu aina enentaimsar ii ainatisha natsaamainaji.

⁹ Turasha Yuusru, ameka wait anenkartinaitme. Tumau asam ii ainati amina chichamrum umikchau akurincha tsagkurkartumainaitme.

¹⁰ Ina apuri Yuusa, amina chichamrumin etserin aina, amina chichamrumin etserainakaisha umirkachu ainaji.

¹¹ Yuusru, amina chichamrumin umirtamin Moisés aarmauwa nusha Israel shuar ainati umikchau ainaji. Tunau takasu asar waitat juinaji.

¹² Yaunchuk ashi nugkanam waitu jakchamu ame timau umiakum ii pegkerchau takasmaunam, tura ina apuri ainasha pegkerchau takasmaunam Jerusalénnum waitat shir ashammain sukartusume.

¹³ Ii pegkerchau takasmaunam waitat jukij nuka, Moisés yaunchuk aarua nu imanisag uminkayi. Nu tumakrisha ina Yuusriya, amina chichamrumsha umikchamji. Tura ina tunaurisha tsagkurkarturta tusarsha tutsuk ima pegkerchauk takainaji.

¹⁴ Ii pegkerchau takasmaunam waitat sukartusume. Yuusa ame turam nuka ashi pegker ainawai. Turasha amina chichamrumka umitsuk pegkerchauk takainaji.

¹⁵ Apu, yaunchukka ame etegkamu aina Egipto nugkanam matsatu amina senchirmijai ayamrukam jiiruitme. Nu ame turamua nuka yamaikisha pachisar aujmattaiyaiti. Turasha ii ainatika pegkerchau takasji.

¹⁶ Apu, ame wait anenkartinaitam nuka shir nekaji. Jerusalénnum pujusar tunaun takasu, tura ina untrisha tunaun takasaru asarmatai, shuar aina amina pachitmasar pegkerchaun chichartamainaji. Tura Jerusalén tsaikmauwa nunasha iisar wishikainawai. Tuma asamtai apu, ame wait aneasam ina tunauri tsagkurkarturta.

¹⁷ Apu, wii amina umirin asan tajam nu anturtukta: “Ame ememattasa iruuntai jea pegkera nu yumpuarmau tsainak wake mesemar jas a nu iista. Shuar aina ame senchirtinaitam nuna nekarmawarti.

¹⁸ Apu, wait aneasam anturkartukta. Ii waitamua nu tura ame ememattasa iruuntai jea yaaktanam a nuna yumpuararu aina nusha enentaimtusam iista. Apu, ina pujuti ima pegker asamtaigkisha pachimasar seamtsuk, ame wait anenkartin asaakmin seajme.

¹⁹ ¡Apu, ii pegkerchau takasmau akaisha wait aneasam tsagkurkarturta! ¡Apu, ame etegkamu ainatin, tura amina yaktaram enentaimtusam, nukap tsawan megkaatsuk yaigkratkata!” tusan tajame.

Setenta semanas atin pachisa etserkamu

²⁰ Daniel nina tunaurin pachis, nina patai Israel shuar ainan tunaurin tura yaakat Jerusalénnasha pachis Yuusan aujuk pujau.

²¹ Tuma pujai etsa agkuantai tagku maa epetia nuni ai nayaimpinmaya shuar Yuus akupkamu karanam yaunchuk wantintukua nuke Gabriel naartin tarun wainkauwaiti.

²² Nu chicharuk: “Daniel, amina chichaman shir ujaktasan winitjame.

²³ Yuus amina senchi anenmau asa, ame yama nagkamchakum aujsamam nui nagkamas anturtamkayi. Tuma asamtai shir antukta, ni turatnurin karanam iwainturmakmam nuna nekamtikattsan winitjame”, tusa tinaiti.

²⁴ Amina pataim aina Yuusan umirtsuk tunaun takasaru asar waittan jukiara nunaka, setenta semanas waitu pujuartatui. Tura yaakat pegker tsaikmauwa nusha tumasag setenta semanas atatui. Waittan imanik juinak enentaimtan jukiartinaiti, tura Yuus nita tunaurin tsagkuratnaiti, turamtai pegker takata nuka tuke atinaiti. Tura Yuus ememattasa iruuntai jea jeammaunam yaunchuk Yuusa chichamen etserin tesamu shir Pegker tutainam takajakarua imanuk ataksha atinaiti.

²⁵ Ju shir nekata. Yaakat Jerusalén tsaikmauwa nu iwarnartinaiti tamau chicham antukatna nu tsawanta nui nagkamas yamaram apu etegkamu wantinkatna nui siete semanas jeattawai. Jerusalénka jinti iwarmauka, tura tanishri pegmarmausha setenta y dos semana ashimnaktinaiti. Turasha nu tsawantinka senchi waitamu tura wake mesemar atinaiti.

²⁶ Sesenta y dos semana nagkamasmatai Yuus etegkamun apun maawartinaiti. Yaakat Jerusalénkan, tura Yuus ememattasa iruuntai jean apu chikich ekemtina nuna suntaari aina tsaikartinaiti. Nu tsawan uminmauka pachiachmaunam nujag nugkan amuwa numamtuk atinaiti. Tura maaniamu atinaiti tusa timauwa nuka imanisag uminak tsawan jeakai nagkankatnaiti.

²⁷ Tura chikichik semana inagnamua nui apu pegkerchau atina nu shuar ainajai chichaman umiktinaiti. Turasha jimapetuk semana weamunam shir pegkerchaun Yuusan chicharuk, tunau tsagkurnartasa tagku aina maa epeamun tura Yuusnau atii tusa suamuncha atsusti, tusa titinaiti. Tusa chichaman umikun, Yuus waittan susa maatnaiti.