Daniel 7 - New Testament with Old Testament portions

Daniel karanam wainkamu

¹ Belsasar apu jas chikichik uwí Babilonianam inamuk pujai Daniel karanam wainkauwaiti. Tuma shintar ni karanam wainkamurin aaruiti.

² “Nayaimpinmaya senchi nasentuk nayantsan shir senchi tsukatmamtikmayi,

³ imaniamunmaya pachiachmau cuatro kuntin wainchatai shir uun nisha iimtin aina jiniarmayi.

⁴ Yama nagkamchak jinna nuka leónka numamtinayi, tura nanapegka pinchu nanapea numamtinayi. Tura nuna iiya wajai nanape ainan tsupirkarmayi. Tura awajkimka shuarjai metek wajamayi. Tura shuarjai metek enentaimun wainmajai.

⁵ Tura chikichka chaiya numamtinayi, nina pae chikich yantamnum ima nukap jitkauwayi. Tura nina wenen, paenmayan tres ukunchin asai amayi. Tura nuna chicharainak: ¡Wetá, tumam namag aina shir nukap yuata!” tusa tiarmayi.

⁶ Tura chikichka uun yawajai metekmamtinayi, nunaka tuntupeen chigki nanapea numamtin cuatro arimayi. Tura cuatro muuke arimayi. Tura nuna apu jas shuar ainan inarti tusa senchimtikainan wainmajai.

⁷ Nuna wainkan nu karanmag iimkaman, cuatrowa junasha kuntinan wainkamjai. Nuka ashammain, tsumain shir senchirtin, nai ainaka hierro atsakamua iman armayi. Tumau asa ni wainmaunka ashi amuak chikich juaku ainanka najatar tsaimayi. Nuka kuntin aina yama nagkamchakun wainkauwaitaj nujaigka pegkesha metekchauwayi. Tura kachuri ainasha diez arimayi.

⁸ “Nuna kachuri ainan ii wajai pachiachmau chikich kachuri shikapach jintimayi. Tumamtai kachuri uun ainan tres ukuitkamayi. Kachuri yama tsapaina nuna jiigka shuara jiya numamtinayi. Tura chichaksha ememas chichamayi”.

Yuus kuntin uun ainan waittan susamu

⁹ Tumakai ii wajai, apu ekemtai ainan apujsarmayi. Nui chikichik shuar chichaman iwarin nukap uwí aramu ekeemsamayi. Nuna janchrigka uruch pujua imanuayi. Iyashisha lana pujua imanuayi, tura ekeemtairi kagketairigka jiya numamtuk keemai.

¹⁰ Tura ni eketmau emtinka ji entsa numamtin jiinu amayi, nu shuar nukap uwí aramu eketun nukap shuar aina emematiarmayi. Tumainai chikich shuar aina nu nukap pegkesha nekapmamainchau jeantar pujuarmayi. Tumawarmatai nu shuar nukap uwí aramu nita takasmaurin iis waittan susattsa, shuar aina takasmauri attai papi ainan urarmayi.

¹¹ Nu kuntin yamaram kachuri tsapaina nu ememas chichakai ii wajatmajai. Tumai nu kuntinan maa tsupirar ji keamunam egkeawarmayi.

¹² Nuiyasha tres kuntinan kakarmachu amajsarmayi. Turasha tsawan jeati tusar matsuk inaisarmayi.

¹³ “Nuna karanam ii wajamjai, tumai pachiachmau yuragminam pachitkau shuara numamtin nugkanam tarun wainkamjai. Tumamtai Uun nukap uwí aramu eketmaunam jukiar ejéntarmayi”.

¹⁴ Turawarmatai chikich ainan nagkasau ni apu atii tusa etegka apujsamayi. Turamtai ashi shuar nugkanmaya aina nina umirainak emematiarmayi. Tura ni inammaurigka shir senchi eme anentsa iitai atinaiti. Tura nina senchiriya nusha pegkesha nagkankashtinaiti.

¹⁵ Nu ainan wainkan senchi ashamakun kuraimiajai.

¹⁶ Tuma asan shuar iruunar matsatmaunam jean chikichik shuaran ju aina nu pachisam winasha ujatmaitsumek tusan timiajai. Tusa tama chichartak:

¹⁷ “Ju cuatro kuntin uun aina nuka cuatro shuar apu jasar ashi nugkanam inamrartina nuna iwainawai.

¹⁸ Turasha nu nagkamakmatai, Yuus ashi nagkakartakua nu ni etegkamuri aina apu jasar atakea nuisha tuke inama pujuartinaiti”, tusa turutmayi.

¹⁹ “Turutkai shir nekattsa wakera asan, chikich kuntin ainajai metekchau tsumain, nai ainasha hierro, nanchikisha bronce ni wainmaunka ashi amuak chikichnaka najatar tsaik ikua ausha urukamtai aitka, nuna nekattsan wakerajai”, tusan timajai.

²⁰ Nuiyasha diez kachurtina nusha, tura kachuri shikapchich yama tsapaina nuna ji ara nusha urukamtai annaita, tura chichaksha ememas chicha nusha, kachuri yamaram tsapaina nu shikapchitak chikich kachuri uun ainan nagkasau tsakakai kachuri ainan tresa imajin ukuitkarma, nunasha urukamtaig tumama nuna nekattsan wakerajai, tusan timajai.

²¹ Tura nuiyasha kachuri yama tsapaina nu Yuus etegkamu ainajai maanimai, turak nitan nepetun wainmajai.

²² Turasha tsawan jeau asamtai Uun taa Yuus etegkamu ainan ayamruk apu amajsarmayi.

²³ Tura chichaak: “kuntin inagnamu cuatro wainkaum nuka cuatro apua nu ashi nugkanam inamratna nuwaiti, turasha nuka chikich ainajai metekka achatnaiti. Ashi nugkanmaya ainanka shir senchi waitkastinaiti”.

²⁴ Diez kachua nu tsawan jeamtai apu jasar inamrartin aina nuna iwainawai. Tumawarmatai chikich apu atinaiti. Nuka yama nagkamchak ajaku ainan nagkasau atinaiti. Tura tres apu ainan nepetak maatnaiti.

²⁵ Nu apua nuka Yuus ashi nagkakartakua nuna pegkerchau chichartinaiti. Tumak Yuus etegkamu aina nujai maanitnaiti, tura Yuusa chichame umiktin aarmauwa nuna, tura Yuus ememattasa iruuntai tsawan etegkamua nunasha yapajinati tusa titinaiti. Turak Yuusnau ainanka tres uwí nagkaiki inak waitka pujutnaiti.

²⁶ Turasha nu apua nuka waittan jukitnaiti. Tura nigka arumaisha apuka achatnaiti.

²⁷ Tumamtai Yuus etegkamu aina apu jasar ashi apu ainanka inartin ainawai. Tura nita inammaurigka atakea nuisha tuke atinaiti. Ashi nugkanmaya shuar ni etegkamu ainaka nina eme anentas iiyainak umirkartin ainawai. Tura Yuuscha ni umirmau asa nitainka tuke inamratnaiti.

²⁸ Wii karanam wainkamun aujmattsaj nuka nuwaiti. Karanam wainkan ashamakun yapiruigka puju jasmiajai. Turasha nuna pachisnaka chikichik shuarnaksha ujakchamiajai.