Daniel 6 - New Testament with Old Testament portions

León aina matsatmaunam wanam Daniel egkeamu

¹ Apu Darío nijai takastin ainan ciento veinte shuaran etegkawaiti.

² Nuiyasha apu ainan yaigtinan tres shuaran etegkawaiti. Nu tres shuar ajakua nui Danielsha pachitkau ajakuiti.

³ Turasha chikich ainan nagkasau Daniel ima yacha asa pegker taká asamtai, shuar ainan nigki ashi inati tusa apu Darío enentaimtau.

⁴ Nu turamun apu chikich aina nekawar, Danielan kajeraina asar, ni makumamainan eataina. Turasha nigka pegker taká asamtai makumamaintrinka pegkesha waitkacharu ainawai.

⁵ Tumawar chichainak: “Daniel shir takatsui tusa makumaintrinka pegkesha waitkachji. Antsu Yuusan umirnaitjai tusa ta nui iturchat apujtusmi”, tusar tuina.

⁶ Tusa tuina asar chichaman umikar, apu Daríojai chichasmi tusa shiakaruiti. Tuma jeaa chicharainak: “¡Apu nukap uwí pujustin atá!

⁷ Apu, chicham umiktina nu papi uminkati tusar amijai takau ainajai chichasji. Nu chicham umiamunam chikichik nantua nui yuusrimtai ainan, tura shuarkesha emematmauka pegke atsusti. Antsu apu, ima aminak emematramiarti. Tura shuar nuna umiachuka león matsamtainam egkeamu atii.

⁸ Nu papi umikmau ame firmamawakminka chikichkiksha yapajimainchau ainawai. Nu papi uminka nuka Medianam tura Persianmasha tu umikmauwaiti”, tusa tiaruiti.

⁹ Tusa tuinakai nu papi umikmaun apu firmamawaiti.

¹⁰ Nu turamun Daniel nekawaiti. Tuma nina jeen pujus Yuusan aujsattsa waketkinaiti. Tuma jea tanishrin iimsatin chigkaimunam Jerusalénnumani iimas tikishmar pujus chikichik tsawantin tresa imani Yuusan auju jakuiti.

¹¹ Tumau asa Daniel Yuusan aujuk pujuttamaun chichaman umikaru aina wainkaruiti.

¹² Turawar Danielan makuartasa apu Daríon ujakartasa weriaruiti. Tuma jeawar chichainak: “Apuru, chicham umiktin ii ainati iruuntramunam ame najankum, yamaika yuusrimtai aina, tura shuarnaksha ememattsuk, ima winak emematruinak chikichik nantu pujusarti. Nuna turachuka wa uunnum león chumpira nui egkeam atatui tusam timame tusar tiaruiti. Tuinakai apusha nitan chicharuk: Ee nuka nekasaiti. Medianam, Persianmasha chichamka tu umikmauwaiti. Tuma asamtai pegkesha yapajimaitsui”, tusa tinaiti.

¹³ Takai nita chichainak: Tumau aisha urukamtai judío shuar aina achira yaruakmauwa nuiya Daniel ame timaun umitsuk, tura eme anentas iirmatsuk, tresa imajnia nina Yuusrin aujas kintamui tusar tuina.

¹⁴ Turam nuna apu antuk senchi wake mesekuiti. Tuma asa Danielan uruk uwemtikrajag tusa senchi ene enentaimkauwa kintamu.

¹⁵ Turasha nu shuar aina apu pujamunam ataksha jeawaru. Tumawar apun chicharainak: “Apu, Medonmaya apu tura Persianmaya apujai chicham umiktin najanamua nuka pegkesha yapajimaitsui tusa timaj nuka ameka nekame”, tusar tiaruiti.

¹⁶ Tuina asarmatai etsa kintamai apu chichaak: Daniel achikrum león matsatmaunam egkeatarma, tusa tinaiti. Timatai Danielan waanam egkeawartasa juinakai, apu chicharuk: “Amina Yuusrum chichame metek umirmau asa, ayamrutmakti”, tusa tinaiti.

¹⁷ Takai Danielan león matsatmaunam egkeawaruiti. Turawar kaya unjai nukukar inaisaruiti. Turawamartai nu wa waitirin apu nina sellorin tura chikich apu ainasha Daniel jinkishti tusar nitasha sellorin apujtuawaruiti.

¹⁸ Danielan apu anea asa, turawarmatai yurumkancha yuachuiti. Tura káshisha kanutsuk tsawaruiti. Tumachkusha kantamkurmin antuktajai tusasha tichauwaiti.

¹⁹ Tuma asa león matsatmaunam waanam Danielan iistajai tusa káshikmas nantaki wári wuwaiti.

²⁰ Tuma wanam jeattak wesa wake mesek untsuak: “¡Daniela iwákmek! ¿Yuus ame umirnaitam nusha yainmakumek?” tusa tinaiti.

²¹ Takai Daniel ayak: ¡Apu ameka nukap uwí iwáku pujutin atá!

²² Wii pegkerchau takaschau asamtai, wina Yuusur akupkamu nayaimpinmaya shuar taa león ainan wenen epetkamai. Turamu asar yuruacharai, tusa tinaiti.

²³ Tusa timatai apu Darío shir enentaimsauwaiti. Tuma chichaak: Daniel jiiktarma, tusa tinaiti. Takai jiikiaruiti. Turawarmatai león asaichiash tusar iyashin ashi iirsar pegkesha asaichmaun wainkaruiti. Nunaka Yuus ni umirmau asa kuitamkauwaiti.

²⁴ Daniel jiinkimtai shuar aina, Danielan maawartasa wakeniarma nu ikankatarma. Turarum, león matsata nui egkeatarma tusa apu tinaiti. Timatai nu shuar ainan, nuwentuk tura uchirtuk león chumpirmaunam egkeawaruiti. Turasha nitanka wanam eke nugka iyaachunak león aina ashi yuawaruiti.

²⁵ Nuna turawarmatai apu Darío shuar chikich nugkanam matsamin ainan tura nitasha chichamtin ainan papiin aar akuptak: Ashi atum ainatirmin amikmajrume.

²⁶ Wii apu pujaj jui nagkamsarmeka Danielan Yuusri ememattarma. “Yuusaiti pujutan sukartinka, tura nigka tuke pujuwaiti. Nina inamtairiya nuka tuke atinaiti, tura nina senchiriya nusha pegkesha nagkankashtinaiti.

²⁷ Yuusaiti uwemtikartin, tura agkanmamtikartinaiti. Tura nayaimpinam tura nugkanmasha wainchatai pegker ainan iwainauwaiti. Tura Danielnasha león yuawai tusa ayamrukuiti” tusa tinaiti.

²⁸ Danielka apu Darío, tura apu Ciro puju jakua nuisha chikich ainan nagkasau eme anentu jakmauwaiti.