Daniel 5 - New Testament with Old Testament portions

Yuus tanishnum aarmaun Daniel nekaamu

¹ Belsasar apu jas jiistan chichamrukuiti. Nijai takau ainan, tura eme anentsa iitai ainan mil shuaran ipaawaiti. Tura kaunkarmatai jiistamuk, vinon nukap umaruiti.

^2-3 Tuma asa nampek chichaak: Jerusalénnum Yuus ememattasa iruuntai jeanmayan shikika umutai orojai najankamu ainan, tura kuit tutai ainajai najankamu ainan, wina apar Nabucodonosor ajakua nu, yaruaka ikaankamu iruna nu jui itaatarma, tusa tinaiti. Nuna tusa takai yaruakar itarawaru ainawai. Turawarmatai nu ainajai ni ipamu aina, nina nuwe aina tura nuwa inatairi ni nuatramuri ainajaimak vinon shikikar umararu ainawai.

⁴ Tura namperar nita yuusrimtairi orojai, kuit tutaijai, broncejai, hierrojai, tablajai tura kayajai najankamu ainan emematainak pujuina.

⁵ Tuma pujuinai apu pujusa inamtai jeanam tanish pujujai pintamamunam ji keek tsaaptin jas amaunam shuara uwejea numamtin pachiachmau wantinkauwaiti. Tuma tanishnum aittamaun apu Belsasarsha wainkauwaiti.

⁶ Tura ashamak senchi kurak yapigka puju jasuiti.

⁷ Tuma asa Babilonianmaya nekamin aina, iwishin aina itatarma tusa senchi chichakuiti. Tura kaunkarmatai yacha ainan apu chicharuk: Ju chicham aarmau warina takun ta nuna taku tawai tusa ujatkaunka jaanch pegkeran yamakaitkaun anugkrattajai. Tura nuiyasha orojai najanamun kuntejnum anugkrattajai. Tura apu chicharkartin eme anentsa iitai aina nuna nagkasau ima senchi eme anentsa iitai atii tusan anaikattajai tinaiti.

⁸ Tusa timatai nekamin ainan ashi untsukar chicham aarmau amaunam utsawaruiti. Turasha waritak aarmauwait nunaka pegkesha nekacharu ainawai.

⁹ Tumawarmatai apu Belsasar nu senchi kuntuts enentaimar yapigka puju jasuiti. Tumakai nijai takau ainasha wake mesemar nekapena.

¹⁰ Tuma apu Belsasar ni ipamu ainajai senchi chichainamun nukuri antukuiti. Tuma apu yurumak iruuntra yutainam wayawaiti. Tura chicharuk: “¡Apu nukap uwí iwáku pujutnaitme! ¡senchi ashamakum kuntuts enentaimipa!

¹¹ Apu ina nugken chikichik natsa Yuus pegkera nuna Wakaní jintintai yacha pujawai. Amina apa Nabucodonosor ninka shir nekajakuiti. Tura asa yacha ainan, iwishin ainan, apuri amajas apujsamua nu pujawai.

¹² Nuka Yuusa Wakaní yayámu asa, karanam wainkamuncha shir etsermainaiti. Amina apa Nabucodonosor Daniel naartinan chikich naari Beltsasar anaikamu puja nu untsukam iniasta. Turamka nigka warituk aarmauwait nuna pachis ashi ujatmaktatui”, tusa tinaiti.

¹³ Tusa takai Danielan taati tusa untsukuiti. Turam Daniel taamtai apu chicharuk: “¿Ame nekas Danielkaitam? ¿Aminak wina apar Judá nugkanam pujamin achirmak itarmawait?

¹⁴ Amina pachitmas ujatainak wakan jintintiamu asa, yachaiti tamaun antukjai. Tumau asa nigka karanam wainkamuncha etsernaiti tusa turamainawai.

¹⁵ Tura ame tatsminig shuar yacha ainan, iwishin ainan ikankan ju aarmauwa jusha wari takug ta nu aujsarum ujatkatarma tusan timajai. Turasha chikichkiksha nekacharmayi.

¹⁶ Amina pachitmasar nekamainchau ainan nekauwaiti tura iturchat ainancha iwarnaiti tusa turamainamun anturkaujme. Ju chicham aarmau wari takug ta, nuna taku tawai tusa ujatkakminka jaanch pegkeran yamakaitkaun anugkrattajme, tura nuiyasha orojai najanamun suwenam anugkrattajme. Tura apu chicharkartin eme anentsa iitai aina nuna nagkasau ima senchi eme anentsa iitai atii tusan anaikattajai tinaiti”.

¹⁷ Takai Daniel apun chicharuk: “Warí aina jutancha, tura apu atancha nakitajai. Turasha Yuus nayaimpinam puja nu nekamtikrua asamtai, ju aarmauwa jusha warina takun ta nunaka ujaktatjame.

¹⁸ Amina apa Nabucodonosor ajakua nunasha Yuus ashi nagkakartakua nu apu amajas apujsauwaiti. Turamu asamtai ashi nugkanmaya shuar ainaka eme anentas ii jaku ainawai.

¹⁹ Nuiyasha ni shuar kajeramurinka main tura ni wakerakka matsuk inaiya jakuiti. Apu atii tusasha etegkin tura ni wakerakka eme anentsa iishtai amajas inain ajakuiti. Iman asamtai ashi shuar aina ashamajakaru ainawai.

²⁰ Turasha apu Nabucodonosor ni ima senchirtina iman anenmamuk ememak umirchamu asa, apu achati tusa Yuus inaimamtiksauwaiti.

²¹ Turamu asamtai kuntinjai iruunar chirichirin yuak pujusti tusar jiikiar kuntin pujuinamunam apujsaru ainawai. Tura sanasha inija jakuiti. Turam pujus Yuus ashi nagkakartakua nuwapi apu ainan inawa, tura ni wakeramuri iispapi apu atinnasha etegnaita tu enentaima jakuiti.

²² Nuka apu ameka shir nekame, tumayatam pegker takatka nakitame.

²³ Tuma asam, Yuus wishikiakum nina jeen shikika umutai aina yaruaka ikankamua nu, jukirum itartuatarma tusam takumin juki itawarmatai nujai chikich apu ipamu ainajai, vino shikikam umakum Yuus emematmaina nu ame yuusrimtai orojai, kuitjai, broncejai, hierrojai, tablajai, kayajai najankamu wainmachu, antichu tura nekachu aina nu emematnume.

²⁴ Tuma asaakmin, nayaimpinmayan uwejan ni akupturmakmau junaka aarai.

²⁵ mene mene tekel y parsin

²⁶ Ju aarmau aina juka tawai: mene ta nunaka ame apu asam inamam nu amukatnunka, Yuus tsawantan etegkayi taku tawai.

²⁷ tekel ta nunaka warí balanzanam nenaa iisam kijintri nukap ajaku, atak nenaa iiyam kijintri metekchau amaina numamtuk, aminka Yuus apu amajtamsa aig shir takaschauwaitme. Tuma asaakmin, yamaika ameka apu achattame taku tawai.

²⁸ Tura parsin ta nunaka ame apu jasam inamam nuna medo ainanmayan, tura persa ainanmayancha Yuus nitan apu amajsatta nuna taku tawai”, tusa Daniel tinaiti.

²⁹ Nuna nekamtai jaanch pegker yamakaitkau Daniel anugkratarma tusa inatairi ainan tinaiti. Tura suwenam nugkutaisha orojai najanamu anugkratarma, tusa tinaiti. Tura apu chicharkartin eme anentsa iitai aina nuna nagkasau ima senchi eme anentsa iitai atii tusan anaikattajai tinaiti.

³⁰ Nuna tusa kintamai nu kashitinig apu Belsasaran maawaru ainawai.

³¹ Turawarmatai medonmaya Darío naartin sesenta y dos uwí aramu apu jasuiti.