Daniel 4 - New Testament with Old Testament portions

Apu Nabucodonosor enentaimkachu jasmau

¹ Nuna tura pujus, apu Nabucodonosor chichaak: “Wika shuar nugkentin nitasha chichamtin aina nuka maanitsuk árak ainan arainak pegker pujusarti tusan wakerajai.

² Yuus ashi nagkakartakua nu wina wait anentra asa, ni iwainturka nu atumsha nekatarma tusan wakerajai.

³ Yaunchuksha wainu jakchamun Yuus iwainamu shir pegker aina nuka enentaimtakrisha pegke ejémaitsui. Nina inamtairiya nu tura nina senchiriya nusha imanisag atinaiti”.

⁴ Wina inamtairin pujusan atsumtsuk shir aneasan pujuyajai.

⁵ Tumai chikichik káshi karanam ashammainan wainkamiajai. Nuna enentaimtusan senchi ashammiajai.

⁶ Tura nuna nekatajkama tujinkan chichakun: Shuar yacha aina ashi yaruakrum utitarma. Wii karanam wainkaj juna pachis ujatkarti tusan timiajai.

⁷ Timatai weriar shuar nekamin ainan, yacha ainan wii pujamunam ashi itawaru ainawai. Turasha wii karanam wainkamu aina ujamsha nuka tumatin tu wainkaume tusagsha nekacharu ainawai.

⁸ Tura ujatkacharmatai pujai, wii yuusrimtaiya nuna naarin eme anentsan iiyakun Beltsasar anaikamiaj nu Daniel tamiayi. Tura Daniel yuus pegker aina nuna wakani aramun wii karanam wainkamun ujakmiajai.

⁹ “Beltsasar ameka ju shuar yacha iruna ju nagkasau nu yachaitme. Yuusa Wakaní amini pujurtama nuna wika nekajai. Ameka nekamainchau ainasha ashi nekauwaitme. Wii karanam wainkamur ainan ujaktatjam nu antukam urukatnunak tu wainkamaj nu ujatkata”.

¹⁰ Wina peakruin kanaran tepesan karanam wii wainkamuka juwaiti: Nugka ajapeentrin chikichik númi chikich numi ainan nagkasau shir yaki tsakaru wajamayi.

¹¹ Turasha nu númia nuka senchi tsakaki wea asa, nayaimpin antiastatuk jasmayi. Imanu asamtai ashi nugkanmaya ainasha wainiarmayi.

¹² Tura nuke ainasha shir pegker samek armayi. Tura ashi chikich ainasha yumainan shir nukap nerekuayi. Kuntin ainaka nuna wakenmarin mikintunam ayamiarmayi. Chigki ainasha nuna kanawe ainanam pasugmarmayi. Ashi nugkanmaya ainaka nuna neren yusar pujuarmayi.

¹³ Nuna ii wajai pachiashmau nayaimpinmaya shuar taarun wainkamjai.

¹⁴ Nu senchi chichaak: “¡Ju númia juka ajaktarma! Turarum kanawe aina tsupiratarma, tura nuke ainasha ashi utsagtarma. Tura nere ainasha akarum utsagtarma. Turakrum kuntin aina, tura chigki ainasha kanawen pasugmaina nusha ashi ishiaktarma”.

¹⁵ Antsu ajigkarigka kagkaptuk inaisatarma. Hierrojai tura broncejai cadena najanamujai jigkaarum ajanam nupa amaunam aipkitarma, turam sana kakeak inijam tepeti. Tura kuntin ainajaimak chirichirin yuati. Antsu wajamurigka nunumirpa.

¹⁶ Turasha nu númia nuna enentaimtairigka yapajinati. Tuma kuntina numamtuk enentaimtatui, tumasag pujusag siete uwí ejéti.

¹⁷ Nayaimpinmaya shuar aina tu waittan susatnayi. Nunaka Yuus ashi nagkakartakua nu ashi apu ainancha iin asa turatnaiti. Tura apu atinnasha ni wakeramu iis etegnaiti. Turusag chikichik nugkanam apu atinnasha etegka iwainaktasa shuar imanchauchin apu amajnaiti.

¹⁸ “Turutin asamtai shuar yacha ainan, tura nekamin ainancha ujatkarti tusan ashi untsukarmajai, turamsha nuka tumatin tu wainkaume tusagsha ujatkacharmayi. Turasha wika amina Beltsasar yuus ainan wakani aramua auwa ujatkattawa”, tusan tajame tinaiti.

¹⁹ Tusa tama Daniel nuna antuk enentaimuk chichatsuk wajakai wii chicharkun: “Beltsasara ashamrutsuk nuka tumatin tu kanarume tusam ujatkata tusan timajai. Wii tama Daniel chichartak: Apu ame karanam wainkaum nuka itursag amina shuarum aina nui uminka tu enentaimjai.

²⁰ Númi uun nayaimpin antiastatuk yaki tsakarun ashi shuar nugkanmaya aina jeashat pujuinasha wainaina apu wainkaum nuka,

^21-22 nuna nukegka samek pegker tura shir nukap nereku. Tuma asamtai, ashi nugkanmaya ainaka nuiyan yuinak matsataina, tura kuntin ainaka nuna wakenmarin mikintu asamtai matsamas ayamaina, tura chigki ainasha nuna kanawen pasugmaina karanam wainkaum nuka ame ashi chikich ainasha nagkasau jasum nu wainmamkaume. Tura amina imantrumea nuka nayaimpinmasha wantinkayi. Nuiyasha ame inammaunka ashi nugkanam nekainawai.

²³ Tura nuiya nayaimpinmaya shuar winis chichaak: Númi waja nu ajaktarma. Turarum numirigka cadena hierrojai najanamu tura cadena broncejai najanamujai jigkaarum ajanam nupa amaunam aipkitarma, turam sana kakeak inijam tepeti. Tura kuntin ainajaimak chirichirin yuati. Tuma tumakua siete uwí ejéti tusa tu chichaa karamam wainkauwaitme.

²⁴ Nu karanam wainkaum nuka Yuus ashi nagkakartakua nu amina waittan amastin tsawan uminturmaka nu tu wainkaume.

²⁵ Amina jeeminia jiirmakiarmatai siete uwí, tagku ainajai iruuntram chirichiri yuakum pujuttame. Tura sanasha inijtamtatme. Tumakum Yuus ashi nagkakartakua nuwapi apu ainan inawa, tura ni wakeramuri iisapi apu atinnasha etegnaita tu enentaimtatme.

²⁶ Ame númi ajigkari uwe ajapachmau wainkaum nuka: Yuuska nekas senchirtinapita, niimpapi ashi nugkanam apu aina matsata nuna Apurigka tusam, nu nekawakminka ataksha apu amajtamsatta nu tu wainkaume.

²⁷ Tuma asamtai wii titatjam nu apu metek umikta: Yamaika pegkera nu takákum pegkerchauwa nuka takasaipa. Pegkerchau takata nuka inaisata, tumakum shuar waitin aina nu yaigkarta. Turakmin Yuus tunaurumin tsagkurtamramtai, tura shir aneasam agkan pujuschainmeash”, tusa Daniel apun tinaiti.

²⁸ Daniel apu Nabucodonosoran ujakua nuka imanisag uminkauwaiti.

²⁹ Chikichik uwí nagkamasa ai, apu Nabucodonosor ni pujusa inamtai jea tuntupen iimuk weká.

³⁰ Tuma senchi chichaak: “¡Atumsha yaakat Babilonia shir unta au iistarma! ¡Aunka ai pujusan inamratnun, shuar chikich nugkanmaya ainan iwaintuktasan wina senchirjai umikjai!” tusa tinaiti.

³¹ Tusa tu chicha pujai, nayaimpinmaya chichamu antukauwaiti. Tura ni chicharuk: “Apu, ameka yamai nagkamsamka apuka achattame.

³² Ameka shuar ainajaigka iruuntramka pujuschattame. Antsu tagku ainajai iruuntra pujusam siete uwí, chirichiri yuakum pujuttame. Tura sanasha inijtamtatme. Tumakum Yuus ashi nagkakartakua nuwapi apu ainan inawa, tura ni wakeramuri iispapi apu atinnasha etegnaita tu enentaimrattame”, tusa tinaiti.

³³ Nuna chichaman antamuik apu Nabucodonosor enentaimkachu jasuiti. Tumamtai nina pujusa inamtairinia jiiki jukiar vaca matsatmaunam apujsaruiti. Turam nui pujus vaca numamtuk chirichiri yuak pujau, tuma pujaun yumi yutak inija jakuiti. Tura ukukui ureya numamtinan wichruruiti. Nanchikisha pinchu nanchikiya numamtin jasuiti.

Nabucodonosor enentaimkachu jas pujamu pegker jasmau

³⁴ Wii waitamu tsawan nagkatukmatai nayaimpin pagkai iismajai. Tuman wii enentaimkachu jasan waitu pujamun pegker jasan Yuus ashi nagkakartakua nuna emematmajai.

³⁵ Yuus iismaka shuar ainatika nagkamas ainaji. Yuuska nayaimpinam, nugkanmasha ni wakera turusag umiawai Yuusjai tunaimainka atsawai. Nuiyasha urukamtai aitkam tusa nijai tunaimainka pegke atsawai tusan timiajai.

³⁶ Tusan Yuusan emematin nagkanai enentaimkachu jasa pujamunka pegker jasmiajai. Tuman ataksha inamrattsan nagkamamiajai. Tumai chichamnum wina yaintu jaku aina, chikich apu ainajai ashi kaunawarmiayi. Tumawarmatai nitajai iruuntran yaunchuk apu pujuyaj imanisnak pujusmiajai.

³⁷ Tura chichakun: Wika Yuus nayaimpinmayan, ima senchirtina nuna, tura ni timaurinka metek uminaiti, tura ni takamurigka nekas pegkeraiti. Tuma asamtai yamaika Yuusan emematjai. Shuar wiyaitjai imannaka tusa eme enentaimtumauka waittan jukitnaiti tusan timiajai.