Daniel 2 - New Testament with Old Testament portions

Apu Nabucodonosor karanam wainkamu pachisa timau

¹ Nabucodonosor apu jas jimar uwí ejé pujus karanam ashammain ainan nukap wainkauwaiti. Tuma asa ni karanam wainkamurin senchi enentaimtak, pegkesha kanutsuk tsawaruiti.

² Tuma asa nina inatairin chicharuk: “Karanam wainkaj nuna ujatkarti, shuar yacha aina, nekamin aina tura iwishin ainasha utiarta”, tusa tinaiti. Tama weri yaruak apu pujamunam ejénaiti.

³ Turamtai apu nitan chicharuk: “Karanam wainkamurun nekaattsan senchi wakerajai”, tusa tinaiti.

⁴ Takai yacha aina apun arameo chichamjai chicharainak: “¡Apu nukap uwí inamratnaitme! Apu ame karanam wainkamu ujakratkata, turukratawakmin wari urukatnuk tu kanarum nu pachisa ujaktatjame”, tusar tuina.

⁵ Tusa tuinakai apu nitan chicharuk: “Wii karanam wainkaj nu, tura nuka tumatin tu kanarume tusarum ujatkachakruminka atumnaka ashi maakun, atumi jee ainancha ashi yumpunkattajrume tusan tajarme.

⁶ Turasha wii karanam wainkaj nu, tura nuka tumatin tu wainkaume tusarum ujatkakrumnaka, warí ainan nukap susattajrume, tura nuiyasha ashi shuar aina eme anentsa iitai amajsattajrume. Tuma asamtai wii karanam wainkamu pachisrum, tura nunasha urukatnunak tusha kanaraj nu pachisrum ujatkatarma”, tusa tinaiti.

⁷ Tusa takai shuar yacha aina apun ataksha chicharainak: “Apuru, wait aneasam ame karanam warimpa wainkaum nu ujakratkata, turawakmin nu tumatin tu wainkaume tusar ujaktatjame”, tusa tiaruiti.

⁸ Tusa tuinakai apu nitan chicharuk: “Wii turattsan wakeraj nu atumka antuku asarum, waittan wárimas suramsaij tusarum tu yujarme”, tusa tinaiti.

⁹ Tusa apu kajek nitan chicharuk: “Atumka waitrin ainarme, tumau asaakrumin waittan susattajrume. Antsu wii karanam wainkaj nu ujatkakrumnaka, nuka tumatin tu wainkaume tusampa ujatkartatua tusan tumainaitjarme”, tusa tinaiti.

¹⁰ Tusa takai shuar nekamin aina chichainak: “Apu ame karanam wainkamu pachisam tu kanarjai tusam tachakminka, nuna nekamainka ju nugka juigka pegke atsawai. Chikich apu ajakarua nuiyagka ame tame jutika shuar nekamin ainan, iwishin ainan tura yacha ainan iniasuka chikichkiksha atsawai.

¹¹ Apu ame nekattsam wakeram nuka ika nekamaitsuji. Antsu yuusrimtai aina nutsuk nekamain ainatai, turasha nitaka ju nugkanmagka pujuinatsui”, tusar tiaruiti.

¹² Tusa tuinakai apu nitan senchi kajerak, nina suntaari ainan chicharuk: “Ju shuar yacha Babilonianmaya aina juka ashi maatarma”, tusa tinaiti.

¹³ Babilonianmaya yacha aina ashi mantamnawarti tusa apu tinu asamtai, Danielan tura nina amikri ainajai maawartasa eaina.

Apu Nabucodonosor karanam wainkamun Daniel nekaamu

¹⁴ Suntar ainan apuri Arioc naartin ajakua nu, Babilonianmaya shuar enentaimas nekau ainan maattsa uminun Daniel nekawaiti.

¹⁵ Tuma asa Daniel Ariocan jeara shir pegkernum iniak: “Shuar yacha enentaimas nekau ainan tura iwishin ainancha ¿urukamtai maatarma tusasha apusha tawa?” tusa tinaiti. Takai apu timaun pachis Danielan ashi ujakuiti.

¹⁶ Turam nuna antuk Daniel apu pujamunam wuwaiti. Tuma apun jeari chicharuk: “Apuru, ame karanam wainkamurmin, tura nusha urukatnuk tu wainkaum nuna pachisan ujaktajme. Wait aneasam ishichik tsawan nakarsata”, tusa tinaiti.

¹⁷ Tama apusha ayu, tusa tinaiti. Timatai Daniel waketki ni pujamunam jeaa nina amikri aina Ananías, Misael, tura Azarías nu ajakarua nuna apujai chichasmaun pachis ashi ujakuiti.

¹⁸ Tura atumsha Yuus aujsatarma, apu karanam wainkamun shuar yacha aina nekachara nuna ni nekamtikramatji. Apu ni karanam wainkamuri ujachmaka Babilonianmaya shuar yacha aina nuna mainak incha mantamawartatji, tusar Yuusan aujsaru ainawai.

¹⁹ Nuna tumawar kanuinai karanam apu Nabucodonosor wainkamun Danielan Yuus ashi ujakuiti. Turam Daniel Yuusan emematuk,

²⁰ chichaak: “¡Yuuska tuke pachisar ememattai atin atii! Yuusa, ameka yachaitme tura ashi senchirtinaitme.

²¹ Tsawan yapajinaina nunaka Yuus turawai, Yuus shuarnaka apu amajeawai, tura nigki yapajinaiti, shuar shir enentaimkau aina nunaka nigki yachamatan suawai. Tura wári yachamamain aina nunasha nigki turawai.

²² Enentaimsa ejémainchauncha ni iwainauwaiti, tura uukmau akaisha nigki iwainauwaiti. Yuus pujamunmagka tsaaptinak awai.

²³ Wina untur ajaku aina nuna Yuusriya maaketi tusan emematjame. Yacha atii tusam, tura kakaram atii tusamsha turutnaitme, apu karanam wainkamu pachisar nekamtikartuata tusar ii seammaj nu antukam nekamtikartuame”, tusa Daniel Yuusan tinaiti.

Apu karanam wainkamun Daniel etserkamu

²⁴ Tuma tsawaar Babilonianmaya yacha ainaka maatarma tusa apu, nina inatairi Ariocan utsukua nuna Daniel jeari chicharuk: “Yacha aina, nekamin aina, iwishin ainasha ashi maata tusa apu turamchamkam, nuka turawaipa. Antsu apu pujamunam wina ejétita. Turutawakmin ni karanam wainkamun, tura nuka tumatin tu wainkauwaitme tusan ujaktajai”, tusa tinaiti.

²⁵ Tusa takai Arioc Danielan juki apu Nabucodonosor pujamunam ejeawaiti. Tura apun chicharuk: “Apu, ame karanam wainkamun ujatmaktinan Judánmaya shuar achika ikankamu pujuina nuiyan chikichkinak jukin itajai”, tusa tinaiti.

²⁶ Timatai Danielan Beltsasar anaikarua nuna apu chicharuk: “¿Wii karanam wainkamu, tura nuka tumatin tu wainkauwaitme tusamsha ujatmainkaitam?” tusa tinaiti.

²⁷ Tusa tama Daniel apun ayak: “Shuar yacha aina, nekamin aina tura iwishin ainaksha ame karanam wainkamun pachisarka pegkesha apu ujatmamain ainatsui.

²⁸ Turasha Yuus nayaimpinam puja nuwaiti nekamainchauncha nekamtikartinka. Ni aminka atakea nui atinan iwainturmakume. Ame karanam wainkamuka juwaiti:

²⁹ Apu, amina kanutairmin tepesam atakea nuisha urukatnukit tusam ene enentaimkuam kanaruitme. Nu tuma asaakmin Yuus nekamainchaun nekamtikartina nu karanam iwainturmakume.

³⁰ Turutma asa ujakti tusa winasha karanam iwainturkayi. Turasha nunaka chikich ainan nagkasau wii ima yacha asamtaigsha turutachai, antsu nunaka ame karanam wainkaum nunasha urukatnuk tu kanarum nuna ujakti turam nuna shir nekati tusa iwainturkayi.

³¹ Apu, chikichik shuar nakumka uun najanamu, winchamtin, tura tsumain wajau karanam wainkauwaitme.

³² Nuna mukegka aya orok najanamu, netsepe tura kunturi ainaka jiru plata tutaijai najanamu, wake tura makuisha jiru bronce tutaijai najanamu,

³³ kagkaji aina, nawe ainasha hierrojai tura nuwejai pachimra najanamu wajau wainkauwaitme.

³⁴ Nu wainkam ii wajatmin, shuarkesha shitashmaitiat chikichik kaya uun nainnumia kagkeak, nu nakumkamun nawenam atumtuk nawe tsairkam tepesu wainkauwaitme.

³⁵ Nu kaya uun nigki kagketuk atumtamuik hierro, nuwe, bronce, plata tutai tura oro nu ainaka tsainak juyujuyun jasmatai, nase trigo nuke kaakun umpui utsaamaina numamtuk ashi utsagmatai, kaya kagkeak nakumkamun tsaikuka chikichik nain uun jas, nugkan ashi enetkau wainkauwaitme.

³⁶ Apu, ame karanam wainkauwaitam nusha wari urukatnuk tu wainkauwaitam, nuna pachisan yamai ujaktajme.

³⁷ Aminka apu chikich aina nuna nagkasau atii turamu asa, Yuus nayaimpinam puja nu nina senchirin suramsauwaiti.

³⁸ Ame karanam shuar nakumkamu muuke orojai najanamu wainkauwaitam nuka, ashi nugkanmaya shuar aina apu artina nu nagkasau eme anentsa iitai, tura kuntin ainancha ashi ni iisti tusa amina inaiturmasa nu tu wainkauwaitme.

³⁹ Nuiyasha netsepe tura kunturi aina plata tutaijai najanamu wainkauwaitam nuka, amee weantu aina tura chikich nugkanmaya apu imanchauch artina nu tu wainkauwaitme. Wake tura makuisha broncejai najanamu wainkauwaitam nuka: Chikichik shuar apu jas ashi nugkanmaya shuar ainan inartina nu tu wainkauwaitme.

⁴⁰ Antsu hierrojai najanamu wainkauwaitam nuka: Hierrojai awati ashi tsaitia numamtuk, cuatrowa jui shuar senchirtin apu jas, chikich apu ainan nepetak ijinatna nu tu wainkauwaitme.

^41-42 Tura nuiyasha apu, ame shuar nawe hierrojai, tura nugkajai najatamu wainkauwaitam nuka, cuatrowa jui apu jastina nui shuar aina kanarartin aina nu tu wainkauwaitme. Nu apu artina nuka hierro katsurma numamtin senchirtin artinaiti. Tura apu senchirtichusha artina nu tu wainkauwaitme.

⁴³ Tura apu, ame shuar hierrojai, tura nuwejai pachimra tsara nawe aina najatamu wainkauwaitam nuka, kanatsuk irutkau armi tusar chikich nugkanmaya shuar ainajai nuwan sunaiyartina nu tu wainkauwaitme. Turasha nuna tumainaksha hierro nugkajai apatka anujkam tuke amaitsu numamtuk, chiki chikichik apurtin aina nuka pegkesha iruuntrashtin aina nu tu wainkauwaitme.

⁴⁴ Turasha nu tsawantin Yuus nayaimpinmayan apu atinan chikichik etegkatnaiti. Nunaka pegkesha nepetkachartin ainawai. Tura chikich apu ainanka ni ashi nepetak ijinatnaiti.

⁴⁵ Apu ame kaya shuar shitachmaitak kagkeak shuar najanamu wajaun atumtuk tsaiku wainkauwaitam nunaka chikich tsawantin nagkamaktinan Yuus iwainturmakai. Nu ame karanam wainkamun wii tajam nuka nekasaiti, tura nuka uminkatnaiti”, tusa Daniel tinaiti.

⁴⁶ Tusa takai apu Nabucodonosor Danielan ememattasa tikishmar nugkan antiastatuk tsuntsumruawaiti. Tura chichaak: “Daniel eme anentsa iiyakrum, tagku aina maa epeakrum kugkuin incienso tutaisha epeatarma”, tusa tinaiti.

⁴⁷ Tusa apu Nabucodonosor Danielan chicharuk: “Ju nekamainchauka ame nekame. Yuus atum umirtaiya nuka apu aina nuna Apuriyaiti tura nekamainchau ainancha juka taku tawai tusa nekamtikartinaiti. Tuma asamtai chikich yuus aina nuna nagkasau senchirtina nuna wika nekas nekaajai”, tusa tinaiti.

⁴⁸ Nuna tusa Danielan warí pegker akik ainan susauwaiti. Nuiyasha Babilonianmaya shuar ainan apuri tura shuar yacha ainan apuri amajas apujsauwaiti.

⁴⁹ Turam Daniel apun chicharuk: Sadrac, Mesac tura Abed-nego nu aina wina yaintin arti, tusa tinaiti. Tura Danielsha apujai takau aina pujuinamunam nisha nui pujujakuiti.