Amós 7 - New Testament with Old Testament portions

Amós manchi ainan arakan amuktinan wainkamu

¹ Arak araamu aina nerek tsamakmatai apu susatnun yama nagkamchak juuka inaisam ataksha nerek tsamakmatai nita yuatnun eke juwainatsaig manchi arakan kaketuk amuktin ainan Yuus ni umikmaurin iwainturkauwaiti.

² Tura nu manchi aina árak ainan tura nupa ainancha kaketuk amuinan wainkan Yuusan chicharkun: “¡Tsagkurkarturta! Israel shuar ainatika shir ishichik asar ju waitat imajua juka katsuntrar pujumain ainatsji”, tusan timajai.

³ Wii tusa tama Yuus wait anentramar chichaak: “Ame tame nuka pegkeraiti. Atumi arake ainan manchi amukarti tusanka ishiakchartatjai turutmayi”, tusa Amós tinaiti.

Amós ji kean wainkamu

⁴ Tura chikichnasha Yuus waittan suramuk aestamatnun ji kean akupkatnurin iwainturkamayi. Nu ji keakka ashi nugkan aesmayi, tura nuiyasha nayants kuna nunasha muku amajsamayi. Nuna turak árak ajanam irununcha ashi ekeemak ijinun wainkamjai.

⁵ Turasha wii chicharkun: “¡Yuusa wait aneasam auka aitkawaipa! Israelita ainatika shir ishichik asar ju waitat imajua juka katsuntrar pujumain ainatsji”, tusan timajai.

⁶ Wii tusa tama Yuus ina wait anentramar chichaak: “Ame tame nuka pegkeraiti. Jiin akuptuknaka atumnaka waitkaschattajrume turutmayi”, tusa Amós tinaiti.

Yuus naekan plomo neturmaun takus wajaun Amós wainkamu

⁷ Amós nina patai israelita ainan chicharuk: Kaya jean jeamin aina nekapma takatia numamtinan, yaakat pegkramunam naekan plomo neturmaun Yuus takaku wajaun wainkamjai.

⁸ Tura Yuus wina inintuk: “¿Amósa warina takakja?” tusa turutmayi. “Nuna tusa turutkai, wii ayakun, kaya jean jeamin aina metekeashit tusa nekapma takatia numamtin naek plomo neturmau takakme”, tusan timajai. Nu tusa tama ni chichartak: Ju takakaj jujai amina pataim aina pujuti pegkerash aina tusan nekapman iirsartatjai. Turan nita pujuti pegkerchauwaitkaigka yamaika tsagkurashtatjai.

⁹ Isaac eme anentsa iiyakur emematujakmau nain ainanam iruna nunaka yumpuartatjai. Tura amina pataim israelita nita yuusrimtairi ainan eme anentas iiyainak iruunar emematiartasa jea jeamkamu iruna nunasha yumpuntrartatjai. Turakun Jeroboam weantu ainanka ijinattajai.

Amós Amasíasjai kajernaikamu

¹⁰ Sacerdote Amasías yaakat Betelnum puju jakua nu Israel shuar ainan apuri Jeroboam ajakua nuna chichaman ujakti tusa chichaman etsernun akupeak: Apu, amina pachitmas, Amós israelita ainanam wekaas chichaman umirtamui. Tuma asamtai ika tu chicha wekaiti tusarka wakeratsji.

¹¹ Apuru, amina pachitmas chichaak: “Apu Jeroboamnaka maaniamunam nina shuari aina maawartatui. Nuna turuinak atum Israel shuar ainatirminka ashi achirmarar yarutmakartatui tu wekawai”, tusa tinaiti.

¹² Nuna tusa inaiyak, Amasías Amósan chicharuk: “Chicham etserkum yuamnum juigka pujutsuk Judá nugkanam wetá. Tumam chichamka ai etseru pujuta”, tusa tinaiti.

¹³ Turasha chicham etseram nuka yamai nagkamsamka juigka etserkaipa. Ju yaakat Betelnumka apu nina yuusrin eme anentas iiyak wayaa ememattai jea nu pujawai, tusa tinaiti.

¹⁴ Tusa tama Amós chichaak: “Wika Yuusa chichamen etsernuchuitjai, tura Yuusa chichamen etserin atasnaksha enentaimtsujai. Wika Yuusa chichamen etserkun kuitnaka juchauwaitjai, wika oveja ainan surakun tura higo ikamia ainan juukan surakun kuitnaka juwaitjai.

¹⁵ Turasha Yuus, ovejan kuitamkun pujai nuna inaimamtikrak, amina pataim Israel shuar aina wina chichamur ujakarta”, tusa turutmayi.

¹⁶ Nuna turutin asamtai, Yuus timaun etserkai antukta. Ame chichakum: “Wina pataar Israel shuar aina pachisam pegkerchau chicharkaipa, tura Isaac weantu ainasha pachisam pegkerchau chicharkaipa, tusam turutme.

¹⁷ Turasha amina Yuus chichartamuk: ‘Ju yaakta juig nina nuwenka akikar takasartatui. Uchiri ainan, nawantri ainancha shuari aina ijinawartatui. Nuna turawarmatai nina nugkenka chikich shuar aina jukiartatui. Ninka nugken ikumtikiar shuar pegkerchau aina nuna nugken maawartatui. Antsu israelita ainanka achirar chikich nugkanam jeashat yaruakartinaiti turamui’ ”, tusa Amós tinaiti.