Amós 6 - New Testament with Old Testament portions

Amós nina patai ainan waittsattarme tusa timau

¹ Amós chichaak: “Wina pataar israelita aina yaakat Jerusalénnum waittsuk shir pujuina nunaka wait anentainajai. Wina pataar israelita aina yaakat Samarian eme enentaimtusar pujuina nunaka wait anentainajai. Tura wina pataar israelitanmaya apu eme anentsa iitai aina nunasha wait anentainajai”.

² Wina pataar israelitanmaya apu aina nu, israelita chikich aina nuna chicharainak: “Yaakat Calnénam, yaakat Hamat uunta nui tura filisteo ainan yaaktari Gat uunta nuisha werum nuiya shuar ainasha uruk pujuinawak nu iistarma”, tusar tuinawai. Wina pataar israelitanmaya apu ainasha chikich shuar apu aina nuna nagkasauka ainatsui. Ii israelita ainati nugkesha chikich shuar aina nuna nugken nagkasau uunka ainatsui.

³ Atumka Yuus ina ijitmatin tsawan jeatnapita tuka enentaimtsurme. Turasha nita magkartuina nunaka nita waittsatnun tsawantan wári ejéniartasa turuinawai.

⁴ Atumka jiisat takákrum kuntina nai katsuram ainajai pegker iwara peakmakmau ainanam tepesrum, tagku nuweram aina maa inarkamu aina yuarme.

⁵ Atumka kantamchatai aina, atumek jiikrum kantamkurum umputai aina umpuarme. Kantamku awattai aina awattrume. David najanu jakua turusrumek atumsha najantrume.

⁶ Atumka vino ainaka nampektasrum umarme. Perfume pegker kugkuin aina yakamarme. Turasha atumi patai aina waitaina nuka pachiatsrume.

⁷ Nu tumaina asarum, atumea achira yarumam atattrume. Turamu asarum jiistamkurum yutai yuakrum pampa pujarum nuka inaisattarme.

⁸ Yuus, ashi senchirtina nu, metek umiktin asa chichaak: “Jacob weantu ainatirmeka ememau asaakrumin kajerajrume. Jea un aina jeamrume, tura asaakrumin nakitajrume. Tuma asan atumi yaaktarin atumi shuari aina yumpunkarti”, tusan inaisattajai.

⁹ Nu tsawantinka chikichik jeanam maachmau juakrum diez shuar pujakrumsha ashi ijinam atatrume.

¹⁰ Turawarmatai shuar jinan patai iyash ainan juki ekeemakartasa jeaa waya wekan, chikich patai chicharuk: Amijai wekasha chikitcha awak, tusa tama ni ayak: “Atsa, chikichka atsawai, tusa titinaiti. Nuna tusa nuiyagka chichakaipa. Nu tusam Yuusa naari pachisam chichakaipa isha ashi jinawaij”, tusa titinaiti.

¹¹ Nunaka Yuus un jeamkamu ainan, tura jea shikapchich jeamkamu aina nunasha yumpugkarti tusa tsagkamkatnaiti. Nu turamu asamtai ashi yumpuarartin ainawai.

¹² Atumka muchig irunmaunumka caballo aina tsekemaitsu nuka shir nekarme. Atumka árak aina nayantsanam aramaitsu nusha shir nekarme. Turasha atum chicham umiktin aina nuka metek umiachu asarum pegkerchau amajsaurme. Tura shir aneasa pujuta nusha wake mesemar amajsaurme.

¹³ Atumka shuar aina ijinkurum yaakat Lodebar jukin asarum atumek eme anenmamrume. Atumka chichakrum: “Ika ina senchirijaig yaakat Karnaimnumia shuar ainasha nepetkaruitji tusarum tarume.

¹⁴ Yuus ashi senchirtina nu, chichaak, atumin nepetkati tusan shuari ainan ishitkattajai. Turam atumjai maaninak Hamatnum nagkama iji ijitmainakua entsa Arabá tutainam ejétamawartatui”, turamrume tusa Amós tinaiti.