Amós 4 - New Testament with Old Testament portions

¹ Samarianmaya nuwa ainatiram, wii titatjarum nu antuktarma: “Atumka Basánnumia vaca nuweram aina numamtuk nuwekurme. Atumka kuitrinchau aina senchi waitkakrum wishikiarme. Tura atumi aishri aina nu vino surusta umaran nampektajai”, tusarum tarume.

² Yuus ni turatnurin pachis chichaak: “Atumi shuari aina atumin tsegkenjai awagturmak yarurmaktinaitrume. Tura atumi uchiri aishmag ainan, tura uchi nuwa ainancha anzuelojai awagtukar jukiartata nu tsawan jeawai.

³ Atumnaka japirmakiar yaakat pegmarmau wa irunmaunam chiki chikichik jiirmarartinaiti. Turutmawar juramkiar nain Hermónnum utsanmakartinaiti. Wii tajarum nuka metek uminkatnun tajarme tusa Yuus turamrume”, tusa tinaiti.

Shuar ainan Yuus wishikiak tunau takarum nuka taká pujutarma timau

⁴ Israelita ainan Yuus chicharuk: “Yaakat Betelnum, tura yaakat Guilgalnumsha atumi yuusri eme anentsa iiyakrum iruuntra ememattai jea iruna nui wetaarma. Tumarum tunau takákrum magkartu pujutarma, atumi yuusri eme anentsa iiyakrum kashikmasrumka tagku aina maarum epeatarma. Tura tres tsawan tsawamu nukapek, atum takasmau ainanmaya diezmo akankarum atumi yuusri tuke sutarma”.

⁵ Atumnaka nu ima shir amajtamu asamtai pan levadurajai pachimtsuk najanamu atumi yuusri eme anentsa iiyakrum epeatarma. Ashi shuar nita enentaimsarag warí ainan ina yuusrinu atinan anajmatawarti, tusarum titarma, tusa Yuus tawai tinaiti.

Waitat suamsha Israel shuar ainaka unuimainatsui tusa Yuus timau

⁶ Yuus atumin chichartamuk: “Tsukai waittsarti tusan wii nitanka tinaitjai. Ashi yaakat ainanam tura nita ajari ainanmasha yutai pegke atsusti”, tusan tinaitjai. Nu turamsha winaka umirtukcharu ainawai.

⁷ Tura nuiyasha árak aina juktin tsawan eke jeatsaig, tres nantu yumin yutumtikachmiajai. Chikichik yaaktanam yumin yutumtikamiajai, nu yumi yutamunmani árak irunuka nugka chupiku asamtai pegker irunmiayi. Turasha chikich yaakat ainanmagka yutumtikachmiajai, nui árak irunuka yumi yutachu asamtai kakarmiayi.

⁸ Shuar ainaka entsa atsau asamtai, chiki chikichik yaaktanam entsan eainak wu jakaruiti. Tumainaksha nukap umara kitak mikimainnaka wainkacharuiti. Nuna tumainaksha, winaka umirtukcharu ainawai, tusa Yuus tawai tinaiti.

⁹ Wii nitanka waittan suakun nase tsueran akuptukaruitjai. Tura nita arake olivo aina kakarti tusa timau asa kakaruiti, manchi aina higuera neren amutkarti timau asa amukaruiti. Nu turamsha winaka umirtukcharu ainawai.

¹⁰ Egipto nugkanmaya shuar ainan waittan susaruitaj turusnak nitancha waittan susaruitjai. Nita shuari nitajai maaninak, ijinawarti tusa timau asa natsa ainan ijinawaruiti. Turuinak caballo ainan yarutkarti timau asa, nita shuari aina caballon yaruakaru ainawai. Nu natsa jinawaru aina kaukar mejeniarti tusa timau asa, nita matsamtainam shuar jinawaru aina kaukar mejegkaruiti. Nu turamsha winaka umirtukcharu ainawai.

¹¹ Wii nitanka yaakat Sodomanmaya, tura Gomorranmaya shuar ainan ijinawaruitaj numamtuk ijinawaruitjai. Nuna turaknasha ji kairi ji keamunmaya japiki jiimaina numamtuk, ashi ijinacharuitjai. Nu turamsha winaka umirtukcharu ainawai, tusa Yuus tawai tinaiti.

¹² Nuna tumau asarmatai, Israel shuar ainan waittan susartatjai. Wii waittan susartataj nuna uwemtumainchau asar wijai igkuniakartasa umintsarti.

¹³ Amós nina patain israelita ainan chicharuk: “Nain ainan, nase ainan najanna nu, ni turatjai tusa timaurin shuar ainan nekamtikna nu, tsaaptinan káshi amajna nu, ashi nugkanam wekaina nuna naarigka Yuus ashi senchirtin tutaiyaiti”, tusa tinaiti.