Amós 3 - New Testament with Old Testament portions

Yuusa chichame etsernun takatri

¹ Amós nina patai israelita ainan chicharuk: Yuus Egipto nugkanam pujarmin jiirmarua nu, atumin pachitmas chichaak:

² Ima atumkettrume winau arti tusa chikich nugkanmaya shuar aina iruna nuiya etegkamutirmeka. Tura asan atum pegkerchau aina takasmaunam waittan susattajrume.

³ Jimar shuar tsanig weká nuka metek atuwak tumauwaiti.

⁴ León shinakka, kuntinan maa nuna akasmatak shininaiti. Tura león tsakat waanam egkemas shinakka nunaka yutain wainak akasmatak tinaiti.

⁵ Chigkika nemaktintri apujtusmau asa nemauwaiti. Kuntin achiktasa apujsamu kuenkugka, kuntinan achiak tumauwaiti.

⁶ Kachu umpuamun antuinakka shuar ainaka pampain ainawai. Yaktanam iturchat nagkama nuka Yuus tumati tusa timau asa tumauwaiti.

⁷ Yuus turattsa wakeraksha nina chichamen etserin ainan, ni turatnurin pachis ujatskeka turichuiti.

⁸ León shinaun antuinakka, ashi shuar ashamainak kurain ainawai. Numamtuk Yuus yanak wina chichamur etserkata tusa akattrat, nuka ashi etserkartin ainawai.

Yaakat Samarian Yuus emesrattajai tusa timau

⁹ Yaakat Asdodnum apu aina pujusa inamtai jea ainanam, tura Egipto nugkanam apu aina pujusa inamtai jea ainanmasha chichakrum: “Yaakat Samaria naintri aina nui kaunkatarma. Tumarum Samarianmaya aina magkartuinak, pegkerchaun takainak pachimnaik a nu iistarma”.

¹⁰ Yuus chichaak: “Samarianmaya ainaka pegkernaka takainatsui. Apu pujusa inamtairi jea ainanam shuar aina ijinku warí aina yaruakmau ainan irumrar pujuinawai”.

¹¹ Tumaina asarmatai nita shuari aina yaakat Samarianmaya ainajai maaniattsa tentakartatui. Turawar maaninak yaakat pegkramun yumpuarartatui. Tura jea apu pujusa inamtai ainan yumpuinak warí ainancha yaruakartatui.

¹² Ovejan kuitamin ovejarin león yuram ayamruktasa akasmataksha ashi amukmaun jimar nawen nuna turachkusha kuishi tsakari ampirmaunkesha, jumaina numamtuk, atum israelita ainatiram, Samarianam pujuinatiram tura Damasconam alfombra tutai aintramunam pujuinatirmesha uwemrattsarum tsekeakrum ikuktattrume.

¹³ Yuus ashi turina nu chichaak: “Jacob weantu aina nu ujaktarma.

¹⁴ Nita tunaun takasaru asarmatai, waittan wári susartatjai. Nu tsawan jeakaigka, tagku aina patasa epetai atin najankamu, Betelnum iruna nuna yumpuntrartatjai. Tura tagku patasa epetai yantamen kachua numamtin najanamu aina nuna tsairkan nugka akaketkattajai.

¹⁵ Shuar wiakchan jee aina tsetsek tepeamtai pujutai kuntina nai ainajai iwarkamu iruna nuna, tura asat tepeamtai pujutai, jea iruna nujaimak yumpuartatjai. Wii taja nunaka metek umiktatjai”, tusa Yuus tawai tinaiti.