2 Samuel 6 - New Testament with Old Testament portions

Chicham umikmau egkeamu David arcan Jerusalénnum ejéttsa wakerukmau

¹ Israel weantu ainanmayan suntar maanitan shir yacha ainan etegkramurin David treinta mil irumrauwaiti.

² Tura Yuus tuke puju ashi senchirtina nu, chicham umikmau egkeamu arcan nukutairi ajakua nuigka, Yuus querubínnum inamna nu, tara shuar ainajai chichastinan querubín jimar najanamu ajakuiti. Nuna yaakat Jerusalénnum ejétjai tu enentaimas, David nina suntaari ainajai yaakat Jerusalénnumia jinki yaakat Querit-jearim chikich naarigka Baala tutainam wuwaiti.

³ Tuma nainnum Abinadab pujamunam wakaru ainawai. Tumawar arcan jeanam pujaun ujumak shuar aina wayawar jukiar aa jiikiaru ainawai. Turawar carrete yamarmanam caballo weaku japitainam egkeawaru ainawai. Turawarmatai Abinadabpan uchiri aina, Uza tura Ahío, nita juki wearu ainawai.

⁴ Ahío carreten emtuki weai Uza carrete ukurin wuwaiti.

⁵ Tuma wenakai David tura ashi israelita ainasha nu ukunam wena. Tumainak Yuusan eme anentas iiyainak ememataina asar kantamainak, flautan umpuinak, arpa ainan salterio ainan, pandereta ainan, casteñuela ainan tura platillo ainan awatainak, jantsemki wena.

⁶ Tumainai Yuusa chichame umiktin aarmau egkeamun, arcan carretanam egkeawar caballo japis weakai wena. Nacón trigon irumar awatujakua nui jeainak caballo tukumrumak iyakai, Uza arcan achik emetawaiti.

⁷ Turasha arcan achikaraigka tusa Yuus tinu asa, Uza arcan achikmatai, Yuus shir senchi kajerkauwaiti. Tura asa Yuus jakati timau asa, Uza arcanam ayaamas jaka iyantuiti.

⁸ Turasha nuka Davidnaka shir amajkachuiti. Tuma asa David nu nugkan Perez-uza atii tu anaikauwaiti. Perez-uza ta nuka Uzan kajerkamu taku tawai. Nu nugkanka yamaiya juisha turusag anain ainawai.

⁹ Nu tumamtai David shir senchi ashamkauwaiti. Tuma asa nu tsawanta nuik, Yuusan aujeak: “Wika amina arcarminka yaakat Jerusalénnumka ejémain nekapeatsjai”, tusa tinaiti.

¹⁰ David yaakat Jerusalénnum ni pujusa inammaurin arcan ejémainchau nekapu asa, chikichik shuar filisteo Obed-edom naartin puja nuna jeen ejétarma, tusa tinaiti.

¹¹ David timaun metek uminak, Yuusa arcarinka shuar Obed-edom naartin pujamunam ejéniar nuna jeen awayawar apujsaru ainawai. Nui tres nantu pujusuiti, Yuus Obed-edoman tura nina jeen pujuinanka tura ashi ninu ainanka pegkernum yaigkuiti.

¹² Chikichik israelita apu Davidtan ujak: Obed-edoman jeen arca pujau asamtai, Yuus ashi nina jeen pujuinajaimak tres nantu pegkernum yaigkai tusa ujakuiti. Turam David nuna antuk, Obed-edoman jeen pujaun utittsa wuwaiti. Tuma juki shir aneas yaakat Jerusalénnum ejéttsa wuwaiti.

¹³ Tuma shuar, Yuusan arcarin yanaki ishichik kuwak wenan nuig emetak, David chikichik vaca aishmag nuwerman tura chikichik oveja nuwerman maa Yuusan eme anentas iiyak epeawaiti.

¹⁴ Linojai jaanch asarmachu najanamun sacerdote nugkutain ima nunak nugkur Yuusan eme anentas iiyak jantsemki wuwaiti.

¹⁵ David, tura israelita aina nijai yujaina, tura Yuusa chichamen aarmau egkeamun arcan yanaki juki wenasha shir anenak senchi chichaina. Tura chikich ainasha trompetan umpuina.

¹⁶ Yuusa chichame aarmau egkeamun, David nijai yujainajaimak arcan Jerusalénnum ejéniaruiti. Tuma David Yuusan eme anentas emematuk nagkimnaki jagtsemki wetatmaun apu Saúl ajakua nuna nawantri Mical iimsatin chigkaimunam asaas iimas wainkauwaiti. Tuma nina enentainig nakitrauwaiti.

¹⁷ Yuusa arcarin jukittsa eke wetsuk pujus, Yuusa arcari jukir ita apujsatin jea jaanchjai jeamkatarma tusa David nina patai ainan tinaiti. Tinu asamtai jean jaanchjai jeamkaru ainawai, turamu asamtai arcan jukiar Jerusalénnum ejéniar nu jeanam apujsaru ainawai. Nuna turawarmatai árak aina jukmaun, tura tunau takasmau aina tsagkurnartinan David tagkun maa Yuusan eme anentas iiya asa epeak namagken tinamnaikauwaiti.

¹⁸ Nuna tura umik David israelita ainan chicharuk: Yuus ashi senchirtina nu atumnasha pegkernum tuke yainmakarti, tusa tinaiti.

¹⁹ Nuna tusa aishmag ainan, tura nuwa ainajaimak nui pujuinanka pankan, chikichik torta dátiles tutaijai najanamu ainan, tura nuiya torta pasas tutaijai pachimka najankamu ainancha chiki chikichik susauwaiti. Nuna turamtai agkan agkan nita jeen waketraru ainawai.

Mical Davidtan jiakmau

²⁰ Nuna tura David yama nagkamchakka nina nuwe ainan tura uchiri ainajaimak pegkernum chicharkattsa nina jeen waketkinaiti. Turasha nina nuwe ajakarua nuiya chikichik nuwa, Mical igkugtasa jinki werinaiti. Tuma igkug wishikiak chicharuk: “Ameka jantsema asam yamai tsawanta jui pegker wantinkaume. Inatai ainan emtin jaanch asarmachu nugkuram jantsemu asam, natsan wantinme”, tusa tinaiti.

²¹ Tusa takai David ayak: “Nuka nekas turutme. Wika Yuusan eme anentsan iiyakun jantsemajai. Ni amina apan tura pataim aina nuna nagkasau wina ima senchi eme anentrus iiru asa, ni etegkamuri ainan yaigti tusa winaka apu amajtusuiti. Turuta asamtai wika Yuusan eme anentsa iiyakun jantsemaj nunaka tuke jantsemsanke atatjai.

²² Ame iismaka yamai pujaj nu imanchau juaktasan wakerajai. Turasha ame nuwa aantra inaku waitkatai aina pachisam turutam nu ainaka, wii urukamtaig jantsemaj nuna nekawartatui. Tumawar winaka eme anentriartatui”, tusa tinaiti.

²³ Apu Saúl ajakua nuna nawantri pegkerchau chichaku asamtai, Yuus uchin jurechu amajsauwaiti. Turamu asa pegkesha uchin jurerchauwaiti.