2 Samuel 22 - New Testament with Old Testament portions

David nina shuari ainan nepetak kantamamu

¹ Saúl maawai tusa yaigmau asa, tura ashi nina shuari ainanmasha Yuus yayasam nepetmaku asa, David Yuusan emematuk kantamawaiti.

² Tura kantamuk: “Apuru, ametme wina ayamrutnumka, ametme wii ajamataimka, wina agkanmamtikrinaitme,

³ ameka wina Yuusruitme, muchigkia numamtin asam wina ayamrutnaitme, ameka tantara numamtinaitme, ameka senchirtin asam wina uwemtikrinaitme. Nain yaki tsakarua iman asaakmin amini wika umjai, wina uwemtikrinmeka ametme”. ¡Shuar wina kajertuinakaisha ame winaka uwemtikruruitme!

⁴ “Ameka pegker asam ememattaiyaitme, iman asaakmin wika amina emematmainaitjame, shuar aina wina kajertuinakai ayamrutkata tusan wii takaisha ame winaka ayamrutnaitme.

⁵ Entsa tsukateak nugkan ukatna numamtuk, wina kajertin ainasha wina mantuawartasa pataturainakai, mantuawartatuapi tu enentaimsan sapijmamiajai.

⁶ Wina kajertin aina mantuataj tuinakai, ¡yarag takasmaunam kuntin nemak wechamnau jas pujuwa numamtuk nekapu asan yamaika mantuinawapi timiajai!

⁷ Wake mesemar pujakun wina Yuusrun, yainkata tusan aujsamiajai. Wii tutai nina jeen pujusag antukuiti, wii untsummaun shir antukuiti.

⁸ Tuma kajek nugkan urmamtikauwaiti, tura nayaim ainasha muchittraruiti. Tura asa nugka senchi muchitkauwaiti. Imania asa nain ainasha ashi muchittraruiti.

⁹ Nina nujinia yuragmia numamtin ashammain mukuinti jiinmiayi, ji keek ashi aesna numamtin, nina weneniasha ji keawa nunin jiinmiayi, tumak ji kairiya numamtinan jiimiayi.

¹⁰ Yuusru, nayaimpinam pujayatam nugkanam tarauwaitme. Tumakum jaanch jamaina numamtuk, nayaim urainaitme. Yuragkim yumijai pachimnair káshi jas amaunam najamam tarauwaitme.

¹¹ Ameka querubín tutain nanapen ekeemsam, nasenam pachitkau, nanaakim wári tarauwaitme.

¹² Aaknum yuragkim yumijai pachimnair káshi jas awa numamtinnumia wantinkauwaitme.

¹³ Yuusa pujutairinia pem petna numamtuk senchi etsantiarmiayi, tura micha aina, ji keek kairi yumi yutina numamtuk kakeniarmiayi.

¹⁴ Yuus nayaimpinam pujuwa nu, ipamtajai metek chichamen antumtikrukmiayi. Nunaka Yuus ashi nagkakartakua nu chichakmiayi.

¹⁵ Tura pem aina senchi petiarmiayi, nunaka nagki aina numamtinan akupmiayi. Turak wina kajertin ainanka sapijmamtikak jiir etsekearmiayi.

¹⁶ Yuusa ame, wina kajertin aina senchi kajerkau asam, nase shir senchi akupkam nayantsa kunarin nugka init irunusha, tura nain artincha paan amajsauwaitme.

¹⁷ Nayaimpinam pujusag nina uwejejai, nayantsanmaya achirak jiirkinaiti.

¹⁸ Shuar wina kajertin ainaka, wina nagkataku kakaram, tura nepetmainchau ainanmaya, ame winaka agkanmamtikruawaitme.

¹⁹ Shir senchi waitu pujai winaka jatetu jakaruiti. Turasha Yuusa ame winaka yainkauwaitme.

²⁰ Nina shuari aina maawai tusam, ame winaka anentu asam ayamrutkam agkanmamtikruawaitme.

²¹ Yuus, wii pegkeran takasu asamtai, wii jumaina turusmek pegker aina nu surusuitme.

²² Wika pegkerchaunka takatsuk, Yuusa aminka inaitsuk chicham umiktarma tusam tinaitam nunaka metek umikuitjai.

²³ Chicham umiktin ame wina surusuitam nunaka, yamaiya juisha umiajai. Wika chicham umiktin ame surusuitam nunaka, pegkesha umitskeka inaisachuitjai.

²⁴ Wika aminka pegkerchaunka takarsachuitjame, tunaun takasaij tusan kuitamamsan pujajai.

²⁵ Yuusa, wii metek takasu asamtai, ame nu nekau asam pegkera nuke surusume.

²⁶ Shuar ame wakeramurmin metek uminaka, amesha wait anennaitme. Tura shuar pegker ainajaigka amesha pegkeraitme.

²⁷ Shuar pegker enentaimkau aina nuka, amesha pegker enentaimtinaitme. Turasha shuar waitrin aina nuka, amesha turusmek tsanuwaitme.

²⁸ Ameka, shuar nigki eme anenmamchau aina nu nepetmakti tusam yainaitme. Turasha shuar nigki eme anenmamin aina nuka, ame wainu asam nepetmakcharti tusam inainaitme.

²⁹ Yuusa, ameka tsaaptina numamtinaitme, wina Yuusru, káshia numamtinnum wii pujakaisha ame yainme.

³⁰ Ame yaintsakmin wina kajertin ainan nepetkattsan nita yaaktari aina pegkramurin egkemtuan maaniakun nepetkartatjai.

³¹ Yuusa, ame jintinkartutairam aina nuka ashi pegkerak ainawai. Ame anajmakartuawaitam nunaka metekeapi umiktinaita tusan tajai. Shuar nekaspapita tusa turamuka ameka ayamrinaitme.

³² Ameketme Yuusmeka, chikichka atsawai. Tura ina ayamrutmamainka chikich Yuuska atsawai.

³³ Yuusru, ametme wina senchimtikrinmeka ame wina pujutruka pegker amajtursauwaitme.

³⁴ Ame winaka nina shuari aina amaigkai tusam, jápa amaimainchau tsekena iman amajtame. Nainta tsakarin wakamtaisha ame winaka kuitamrinaitme.

³⁵ Ame winaka shuarum ainajaisha tu maanikta tusam jintintrame. Nagkijai shuari ainan eketak ijuti tusam senchimtikrame.

³⁶ Ame wina kajertin aina nu mantuawartaj tuinakaisha ayamrutnaitme. Ame ayamrutin asaakmin chikich ainasha eme anentruinawai.

³⁷ Ame winaka shir pujusti tusam yainkauwaitme, ame yainkau asaakmin wina kajertin ainasha winaka mantuacharu ainawai.

³⁸ Wina kajertin ainan patatukaran, amaigkaran ashi ijinamiajai. Turan waketkimiajai.

³⁹ ¡Ashi ijinamiajai! Chikichkiksha iwákuka juakchamiayi.

⁴⁰ Nina shuari ainajai maanikti tusam senchimtikruawakmin wina kajertin ainajai maanikmiajai. Nina shuari ainanka ijinati tusam inaitursamiame.

⁴¹ Ame wina kajertin ainaka ipisram ishiakuitme. Turasha wii patatukmiajai, turan amaigkaran wina kajertin ainanka ijinamiajai.

⁴² Yainkatarma tusar untsumiarmiayi, turasha chikichkisha yaigcharuiti. Yuusa, amincha yainkata tusar untsurmarmiayi, turasha nitaka yaigchamiame.

⁴³ ¡Nugka tsaimaina numamtuk nitanka nepetkamiajai! Jintanam paaka au najattaiya numamtuk nita iyashin najamsan wekasamiajai.

⁴⁴ Wina pataar ainayat, wina kajertukar wijai maaninakaisha ame winaka ayamrutkauwaitme. Israel shuar ainajai, chikich shuar ainajaimak inarti tusam apu amajtusam apujtusuitme. Ame turuta asaakmin shuar wii yaunchuk nekajakchamur ainajaimak umirtuinawai.

⁴⁵ Chikich nugkanmaya shuar aina, wini weamkarmatai, wii nitan inartinaitjai. Wina chichamrun anturtukar metek umirtuinawai.

⁴⁶ Chikich nugkanmaya shuar ainaka sapijmaina asar, winaka kajertumain nekapenatsui. Tumaina asar, wina takartusartasa nita pujamunmaya kurakmaikia jinainawai.

⁴⁷ ¡Yuusa, ameka tuke pujutnaitme! ¡Wina ayamrutak uwemtikrina nuka pegkernum chichartai atinaiti! Wina uwemtikrina nuka senchirtin asamtai, nigki ememattai atin atii.

⁴⁸ Yuusru, wina kajertin aina nuka ame ijinawaitme. Ame chikich nugkanmaya shuar aina wini ikankam wina inatair amajsaume.

⁴⁹ Wina kajertin aina nu mantuawartasa wakerutainakaisha, ame winaka ayamrutme. ¡Shuar pegkerchau aina mantuataj tuinakaisha, ame winaka ayamrutkauwaitme!

⁵⁰ Turuta asaakmin, Yuusa chikich shuar aina emtin ame turamurmin pachisa kantamkun tura eme anentsa iiyakun emematjame.

⁵¹ Ame winaka apu atii tusam etegtua asam, nepetmakti tusam turutta. Winaka ameka tuke pegker amajtame, tura wii weantu artina nusha aneakum pegkernum yaigkartin atá”, tusa David Yuusan tinaiti.