2 Samuel 19 - New Testament with Old Testament portions

¹ Tumamtai apu David nina uchiri Absalón mantamnamun antuk wake mesemar nekapeak, útmayi tusar Joabpan ujakaru ainawai.

² Tura maaniamunam nita nepetmakaru ainayat, apu nina uchiri jakau asamtai wake mesemar nekapeak útmayi tusa tamaun antukar, Davidta suntaari ainaka ashi wake mesekaru ainawai.

³ Nuiyasha maaniamunam umak tsekegki urukmainkit numamtuk natsaamainak yaaktanmagka umkar wayawaru ainawai.

⁴ Tura apuka jaanchjai yapin nukuk senchi untsumas útuk: “¡Absalónka, wina uchiru! ¡Absalónka, wina uchiru!” tusa imatu.

⁵ Nuna imatkai jeen pujaun Joab jeaari apun chicharuk: “Amina suntaarum aina, amina, uchiram aishmag ainan, nawantrum ainan, nuwem ainan, tura amina inatairam nuwa aina ame nuatrauwaitam nunasha uwemtikaru aina nu yamai inatsakume.

⁶ Amina kajertamin aina aneakum amina anenmau aina nu kajerkaume. Amina suntaarumi apuri aina, tura amina inatairam ainasha eme anentsa iiyaashmauram yamai iwainmamkaume. Ii ainati ashi jina akurincha Absalón iwákkaigka ameka shir aneasam pujumainaitam nuna nekajai.

⁷ Apuru, yamaika jinkim shuar aminu aina nu shir anentsam chicharkarta, turakum enentai ichichturarta. Nu turachkumnaka Yuusa naarijai apuru tajame, ju káshi atata juik chikichik shuarkesha juakchattawai. Nuna tumawarmataigka ame yaunchuk natsa asam iturchatnum pujujakuitam nu tura yamai iturchatnum pujam nu nagkasam iturchatnum pujuttame”, tusa tinaiti.

⁸ Tusa takai apu wajaki yaakta waitirin jeaa ekemsauwaiti. Tumamtai apu waitinam ekemsayi tusar ashi shuar ainan ujakaruiti, turawaram apuin wantinkartasa wearuiti. Tumainai Absalónka suntaari ainaka agkan nita jeen wakettraru ainawai.

David yaakat Jerusalénnum waketkimu

⁹ Ashi Israel shuar ainan chichainak: “Apu David ina shuari filisteo aina ina inatmainak pujuinan nepetak agkanmamtikramawaitji. Turasha Absalónkan ashamak, yaaktanmaya jinki tsekegni.

¹⁰ Nina uchiri Absalón ina apuri atii tusar anaikauwaitaj nunaka maaniamunam yamaika maawarai. Turawaru asarmatai ataksha David ina apuri atá timi”, tusar tiaruiti.

^11-12 Ashi Israel shuar aina nuna pachis chichainamun apu David nekawaiti. Nuna tuma asa sacerdote Sadocan, tura Abiataran, nu ainan chichaman akuptak: “Atum Judánmaya apu aina chicharkurum, nitaka wina shir pataar ainawai, apu David ataksha nina jeen waketki inamrati tusarum wakerayatrumsha, urukamtai turatsrum titarma”.

¹³ Nuiyasha Amasásha chicharkurum: “Ameka wina shir pataaruitme. Yamai nagkamsamka Joab apu amainnum ame ashi suntar ainan apuri atatme. Wii tajam nuna metek umikchamtaigka waitat shir ashammainan Yuus surusti tusa tawai tusarum ujaktarma”, tusa tinaiti.

¹⁴ Nuna tusa shuar ainan waketan susauwaiti nutikam chikichik shuara numamtuk chichaman akuptuinak: “David ashi nina suntarijaimak yaakat Jerusalénnum waketki taati”, tusar tiaruiti.

¹⁵ Tusa timau asa apu David shuar nijai yujainajaimak yaakat Jerusalénnum waketeak wea weakua entsa Jordánnum jeawaiti. Tumamtai Judá weantu aina apun igkugkar entsa Jordánnum katiakai yaigkartasa Guilgalnum weriaruiti.

¹⁶ Tura Simí Guerá uchiri yaakat Bahurimnumia ajakua nusha nigka Benjamín weantuitak Judá weantu aina wenakai nisha nitajai iruunar apu Davidtan igkugtasa wuwaiti.

¹⁷ Simí apu Davidtan igkugtasa weakai Benjamín weantu aina mil shuar aina uyuntsaru ainawai. Nuiyasha apu Saúl ajakua nuna uchiri inatairi Sibásha, nina uchiri quince ajakarua nu, tura nina inatairi veinte shuaran yaruak wea weakua apuka jeatsaig niya entsa Jordánnum jeawaiti.

¹⁸ Tuma apu shir amajtusti tusa apunu aina katinakai yaigtasa shuar nijai yujainajaimak pararmin iis entsa amain katigkuiti. Tuma apu entsa amain katigtasa namaka taamtai, apun eme anentas iiyak Simí tsuntsumruawaiti.

¹⁹ Tuma chicharuk: “Apuru, ame yaakat Jerusalénnumia jiinkinaitam nui wii pegkerchau takasmau, tura magkartua akaisha waittaka surusaipa. Tura kajertuka pujuipa.

²⁰ Wii pegkerchau takasmaurnaka wiki nekamajai, tuma asan ii José weantu ainati ame igkugka jukittsar yama nagkamchakrika iya jinkiji”, tusa tinaiti.

²¹ Nuna tusa takai Abisai, Siruía ajakua nuna uchiri chichaak: “Apu atii tusa Yuus etegkamun pegkerchau chicharkau asa Simíka mantamnamainaiti”, tusa tinaiti.

²² Turasha David Abisain, tura Joabpan Siruía uchiri ajakarua nuna chicharuk: Atum turattsarum wakerarum nunaka wika wakeratsjai. Yamaika ataksha wii Israel shuar ainan apuri jasjai. Tuma asamtai yamaika israelita ainanka chikichkinkisha macharti tusan tajai.

²³ Nuna tusa inaiyak, David Simín chicharuk: “Wika nekasa nuna tajame pegkesha mashtatjame”, tusa tinaiti.

²⁴ Apu David yaakat Jerusalénnumia jinkina nuiya nagkamas jamamtinchau, tura iturchatnumsha agkan jas ataksha waketki yaakat Jerusalénnum winawai tusa tamaun Saúl ajakua nuna tiragke, Mefi-boset antukuiti. Tuma nawe nijatsuk, susurincha awatsuk tura jaanchrincha nijatsuk apun igkugtasa werinaiti. Mefi-boset tumawa nunaka wii iturchatnum pujusuitaj nui nisha wake mesemrapi pujusuita tu enentaimturati tusa tumawaiti.

²⁵ Tuma jeamtai, apu David wainak, Mefi-bosetan chicharuk: “¿Amesha urukamtai wii weamunmasha winichmame?” tusa tinaiti.

²⁶ Tusa tama ni chichaak: “Wika shutua shutua wekain asan wina inatairun chicharkun, wisha apu wea ai ekemsan wetin burro iwarturata tusa tamaitiat wina inatair tsanuramayi.

²⁷ Wina inatair, wina tsanumruteak ni apu amainnum wii apu atajai tusa tawai, tusa wina pachitas amina ujatmakuiti. Turasha apuru, ameka nayaimpinmaya shuara numamtinaitme, tumau asam ameka ame wakeramu takasta.

²⁸ Wina pataar ainaka mantamnamain ajakaru ainawai, tumamain aig ame winaka wina mesaruin ekemsa yutatji tusam turutnaitme. Apuru, wii amina tumainka chikichka atsurtawai”, tusa tinaiti.

²⁹ Tusa takai apu David ayak: “Nu nukap chichamainka atsawai. Tuma asamtai Saúl ajakua nuna nugken wii Sibán susau akaisha ame, Sibájai akanka jukitarma”, tusa tinaiti.

³⁰ Turasha Mefi-boset chichaak: “Wina apachrun nugke aina nunaka ni ashi jukiti tusan wika wakerajai”. Wii nekas iman iiyaamua nuka: “Apuru ame jamamtinchau, tura iturchatnumsha agkanmam ataksha inamrattsam waketkim tam nuwaiti”, tusa tinaiti.

³¹ Antsu shuar Barzilaí naartin nugka Gaadnumia ajakua nu, entsa Jordán amain apu katiakai yaigtasa, tura aujas akupkattsa yaakat Roguelimnumia nagkama apujai wea weakua entsa Jordánnum jeawaiti.

³² Nu shuarka untach ochenta uwí ején ajakuiti, nigka shir wiakach ajakuiti. Iman asa apu David shuar nijaimak yujainajaimak yaakat Mahanaimnum pujusmatai nita atsumainamun yaigkuiti.

³³ Barzilaín apu David chicharuk: “Ijai yaakat Jerusalénnum wemi. Ame atsumamu ainancha wii ashi sutatjame”, tusa tinaiti.

³⁴ Turasha Barzilaí chichaak: “Wika nukap tsawan pujushtatjai, tuma asan Jerusalénnumka winimaitsujai.

³⁵ Winaka ochenta uwí arutui, tumau asan yutai ainancha pegker nekapeachaitkun yuajai, tura umutai ainancha pegker nekapeachaitkun umajai. Yutai pegkernasha tura yutai pegkerchauncha wika nekatsjai, tura nuiyasha kantamainakaisha antumaitsujai. Tumau asan amina waitkatnaka nakitajai.

³⁶ Apuru wika entsa Jordánnum katiakmin nunak yaigtatjame, wii amina yaigtatjam nunaka ninu ainan surusti tusanka turashtatjame.

³⁷ Antsu wika apuru wina nugkaruin waketkin jakatjai, tumamtai wina pataar aina wina untur aina ikumatainmag winasha ikursarti tusan wakerajai. Turasha apuru jui wina uchir Quimham amina umirtamin pujawai, ni ame weakmin winiti, tumamtai ame uruk inartasmea wakeram turusmek inarta”, tusa tinaiti.

³⁸ Tusa takai apu David chichaak: “Takuminka Quimham wii weakai winiti, tumamtai ame wakeram turusnak umiktajai. Tura ame seatam nunasha turusnak amastajai”, tusa tinaiti.

³⁹ Tusa timatai ashi shuar aina entsa Jordánnum amain katiararuiti. Tumawarmatai apu Davidcha katigkuiti, tumamtai Barzilaí apun aujas ikuat kugkuasuiti. Tura Barzilaí nina pujutairin waketkinaiti.

⁴⁰ Tura apu Davidka Quimhaman juki ashi Judá weantu ainan, tura Israel shuar ainanka jimapetuk yaruak Guilgalnum wuwaiti.

⁴¹ Turasha ashi israelita ainan apuri aina apu Davidjai chichasartasa wearuiti. Tumawar jeawar chikichik shuar apun chicharuk: “¿Urukamtai ina yachi Judá weantu ainasha amina apurimramawarsha entsa Jordánnum ashi aminu ainajai katiakmincha yainmakaruita?” tusa tinaiti.

⁴² Tusa takai eke apu Davidka chichatsaig nui Judánmaya suntar pujuina asar nuiya chikichik suntar chichaak: “Apuka ina pataiyaiti, ika apu yutairigka yuachuitji, tura chikichkiksha kasarkachuitji. Tuma asamtai atumka inka kajerkartumain ainatsrume”, tusa tinaiti.

⁴³ Tusa takai Israel shuaran apuri ainanmaya chikichik chichaak: “Ii ainatika diez tribunmaya aina nuna apuri ainaji. Turasha atumka chikichik tribun apuri ainarme. Tuma asarum atum ainatirmeka chiki chikichkitiram apuka uyuntrume, tura ii ainatika diez shuarti apuka uyunmainaitji. Tuma asamtai ii ainatinka pegkerchauka chicharkartukairpa, atumka tatsurminig ii ainati yama nagkamchakrika waketkim Jerusalénnum ataksha taam inamrata tusar apu David tinaitaj nu enentaimsarum iistarma”. Nuna tusar Judá weantu aina, israelita chikich ainan shir pegkerchau chicharaina.