2 Samuel 18 - New Testament with Old Testament portions

Apu David nina suntaari ainan maaniktarma tusa akantra ishiakmau

¹ David nina suntaari ainan mil mil akantrauwaiti, tura cien ciensha akantrauwaiti. Nuna tura chiki chikichik apun anaituruiti

² Tuma umik suntar ainan tresa iman akantrauwaiti. Suntar aina yama nagkamchaku akankamu apurigka Joab ajakuiti. Suntar aina jimara nu akankamu ainan apurigka Abisai ajakuiti. Abisaika Joabpan yachi ajakuiti, tura nukurigka Seruía ajakuiti. Tura suntar aina tresa nu akankamu ainan apurigka Itai ajakuiti. Itaika yaakat Gatnumia ajakuiti. Nuna akanar umik David suntaari ainan chicharuk: “Wisha atum maaniattsa weakrumin winittajai”, tusa tinaiti.

³ Takai nina suntaari aina chicharainak: “Atsaa, apuru ameka winitsuk yaaktanmag juakta. Tumam nui pujusmek ina yainmaktin akupta. Ina shuari aina maaniamunam jimapetuk ina ijitmainakaisha iturchatka atsawai. Antsu amina mantamainakka diez mil suntar mantamnamaina imanaitme”, tusar tiaruiti.

⁴ Tusa tuinakai apu David nitan chicharuk: “Atum tarum nuna metek umiktajai” tusa juakuiti. Tuma yaakta waitirin wajas, nina suntaari aina cien cien tura mil mil akantramu aina wenakai iiya wajau.

⁵ Tuma wajau asa, Joabpan, Abisain, Itain nu ainan apu senchi untsuak: “Wina uchir Absalónka maawairpa”, tusa tamaun suntar aina ashi antukaruiti.

Absalón jakamu

⁶ Tama Davidtan suntaari aina, Absalónka suntaari ainajai maaniawartasa wearuiti. Tumawar Efraínkan nugken ikam irunmaunam igkuniawar maaniawaru ainawai.

⁷ Tuma shir senchi maanina asar Davidtan suntaari aina, Absalónka suntaari ainan nepetaina. Turuina asar veinte mil shuaran maawaruiti.

⁸ Nu nugkanam maaniki wenak, nagkijai jinaawarua nuna nagkas Absalónkan suntaari aina ikam irunmaunam utsanawar shir nukap jinawaru ainawai.

⁹ Absalón caballonam ekemak weajkama, Davidtan suntaari ainajai igkuniakuiti. Tuma nitan ashamak numi wakentin weamak tsekeajkama, númi kanawe yaki amaunam wichnum nemak juakuiti. Turasha caballorigka tsekeak ikuknaiti.

¹⁰ Tuman chikichik suntar wainak, Absalón numinam wichnum nemak aun wainkajai, tusa nina apurin Joabpan ujakuiti.

¹¹ Tusa ujam Joab chicharuk: “Maam ikumain amajkaume. Turawakminka plata tutain diez moneda najanamun, tura chikichik akachumtain akimain amajkaujme”, tusa tinaiti.

¹² Tusa tama suntar Joabpan chicharuk: Ii ainatisha ashi antuinarin apu David, amina, Abisain tura Itaijaimak chichartamuk: “Wina uchir Absalónka maawairpa”, tusa timayi. Tusa tinu asamtai, plata tutaijai najanamu mil moneda akirkumincha wika apu uchirinka maamaitsujai.

¹³ Apu nekatsuk inaisamuka atsawai, tumau asamtai wii nuna maamtaigka, apu inimas nekamtaisha ameka winaka ayamturmaitsume, tusa tinaiti.

¹⁴ Tusa takai Joab chicharuk: “Amijai chichakun pujaknaka tsawantan megkajai”, tusa tinaiti. Nuna tusa Absalón numi kanawen netamunam Joab wuwaiti. Tuma jatsuk netaun jeari maattsa netsepnum tres nagkijai ijuwaiti.

¹⁵ Nuna turamtai Joabjai diez shuar yujaina tentakar nagkijai ijurar maawaruiti.

¹⁶ Turawarmatai Joab trompeta umpuartarma tusa takai, trompetan umpuararuiti. Turawarmatai maaniamuka inaisatarma, tusa Joab takai inaisaru ainawai.

¹⁷ Tumawar Absalónkan iyashin jukiaru ainawai, turawar wa amaunam nui egkeawar kayajai yutuawaru ainawai. Nuna turawarmatai Absalónka suntaari ainaka agkan agkan nita jeen waketraruiti.

¹⁸ Absalón uchin chikichkiksha akiachu asa, apu nugken pakanam wii jakamtaisha juna wainainak wina enentaimtursagke atin arti tusa, kayan irumar nina iimijai metek najanawaiti. Nu kaya irumramuka yamaiya juisha Absalón irumramu tinu ainawai.

Absalón jakamun David nekamu

¹⁹ Ahimaas, Sadoca uchiri Joabpan chicharuk: “Yamaiya juik tseketaik wena jean, Yuus ina shuari ainanam yainmak agkanmamtikramaj nuna pachisan apun ujaktajai, akuptukta”, tusa tinaiti.

²⁰ Turasha Joab chicharuk: “Apu uchiri jakau asamtai, ameka yamaiya juika etserkattsamka wechattame, antsu chikich etserkattsa wetatui”, tusa tinaiti.

²¹ Nuna tusa chikichik suntaran Etíopenmayan chicharuk: “Ame wetá, tumam ii wainkamu aina pachisam apu ujakta”, tusa tinaiti Tusa tama Etíopenmaya shuar Joabpan eme anentas iiyak tsuntsumruawaiti, tuma tseketaik wuwaiti.

²² Nuna turamtai Ahimaas awentsag ataksha Joabpan chicharuk: “Etíopenmaya shuar we auna ukurin tseketaik wetajai”, tusa tinaiti. Turasha Joab chicharuk: “Aminka chicham etserkumnasha akirmakchattawai, tuma asamtai uchi ameka wepa”, tusa tinaiti.

²³ Akirkashtin akaisha, wika tseketaik wetatjai, tusa Ahimaas tinaiti. Tusa takai Joab ayu tsekegta, tusa tinaiti. Tusa tama Ahimaas nugka paka weamunam tseketaik weak Etíopenmaya shuarnaka nagkaikinaiti.

²⁴ David yaakat Manahaim tanishmarmaunam yama nagkamchak waiti aun nagkaiki chikich waiti init amaunam eketu. Tuma eketai suntar yaakat tanishmarmaunam ekemas shuar wayawai tusa waitin kuitama eketu, chikichik shuar tseketaik winaun wainkau.

²⁵ Tuma suntar waitin kuitamin nuig ekemsag apun senchi untsuak: “Chikichik shuar tseketaik winawai”, tusa tinaiti. Tusa tama apu chichaak: “Chikichik shuar winakka chicham pegkeran ina ujatmaktasa winawai”, tusa tinaiti. Tusa tuinai nu shuarka ashi tasattak jasu.

²⁶ Tumai nuna ukurin chikishcha tseketaik winaun suntar waitin kuitameak pujau wainkau. Tura wainak chikitcha shuar tseketaik winawai, tusa senchi untsumkauwaiti. Tusa takai apu chichaak: “Nusha chicham pegkeran ina ujatmaktasa winawai”, tusa tinaiti.

²⁷ Suntar waitin kuitameak eketu chichaak: “Shuar emki tseketaik wina auka Sadoca uchiri Ahimaasaiti, Ahimaas tsekea jawai”, tusa tinaiti. Tusa takai Ahimaaska shuar pegker awayi, chicham pegkeran ina ujatmaktasa winawai, tusa apu tinaiti.

²⁸ Tuma Ahimaas apun jeari eme anentas iiyak tikishmatrauwaiti. Tura amina chichaman ujaktasan taajai tusa chichaak: “Shuar aina amina mantamawartasa kajertamiarma nunaka Yuus ijinayi. Tura asamtai apu amina Yuusrumka pegkeraiti”, tusa tinaiti.

²⁹ Tusa takai apu iniak: “¿Wina uchir Absalónsha pegkerak pujuma?” tusa tinaiti. Tusa tama Ahimaas chichaak: “Apu, amina inatairam Joab akuptukmatai winai, suntar aina wina ukurin senchi pampainan antukmajai. Turasha urukakug imatiarma nunaka nekachmajai”, tusa tinaiti.

³⁰ Tusa takai apu chicharuk: “Menaanta, tumam nui wajasta”, tusa tinaiti. Tusa tama Ahimaas menaan wajasuiti.

³¹ Tumai Etíopenmaya shuar apu pujamunam jeawaiti. Tuma apun chicharuk: “Apuru, amina chicham pegkeran ujaktasan winitjame: Shuar aina amina kajertamainak mantamawartasa wakeriarma nunaka Yuus yamai nepetkayi”, tusa tinaiti.

³² Tusa takai apu iniak: “¿Wina uchir Absalónsha pegkerak pujuma?” tusa tinaiti. Tusa tama apuru, shuar aina amina kajertamainanka, nu uchi jaka tumasag ashi jinawarti tusa Yuuska wakerawai, tusa tinaiti.

David nina uchiri Absalón mantamnamtai útmau

³³ Tura apu David nuna antuk, wake mesemar nekapeak úttasa yaakat tanishmarmau waitiri yakintin kanutai amaunam wuwaiti. Nui wakattsa wesa David úteak: “¡Absalónka, wina uchiru! ¡Absalónka, wina uchiru! ¡wii mantamnamainnum ame mantamname!” tusa tinaiti.