2 Samuel 16 - New Testament with Old Testament portions

David Sibájai chichasmau

¹ David naintan waruk nuna nagkaiki wea. Tumattamaun Mefi-bosetan inatairi Sibá naartin jimar burro ainan doscientos pankan, cien tortas pasas tutain uvajai najanamun juki, araka nere tsamaku ainan cien juki tura vinoncha chikichik nuapnum yaramun juki igkugkuiti.

² Tumattamaun David nuna wainak chicharuk: “¿Jusha iturkattsamea itame?” tusa tinaiti. Tusa tama Sibá ayak: “Ju burro aina juka, apuru amina nuwem aina ekemsa wetinan itajai. Pan ainan, tura araka nere aina junaka amina suntarum aina yuatnun itajai. Tura ju vinon itaj junaka aya nugkanmag wenak pimpikiar kitamainak umartinan itajai”, tusa tinaiti.

³ Tusa takai, “¿amina apuram Saúl ajakua nuna tiragke Mefi-bosetcha tui pujawa?” tusa apu David Sibán tinaiti. Tusa tama Sibá ayak: “Nigka wina apachur Saúl apu ajakua tumasag, israelita aina winaka apu amajtusartatui tusa Jerusalénnum juakmayi”, tusa tinaiti.

⁴ Tusa takai Mefi-bosetnau wina ikurkiyi. Tuma asamtai ninu ajakarua nuka yamaika ashi aminu artatui, tusa apu tinaiti. Tusa takai Sibá apun tikishmatar tsuntsumrua chicharuk: “Apu winaka ame tuke wait anentrita tusan wakerajai”, tusa tinaiti.

Simí apu Davidtan pegkerchau chicharkamu

⁵ Apu David yaakat Bahurimnum jeawaiti. Tuma nu nagkamakai nuiya chikichik shuar Saúl ajakua nu weantu Guerá uchiri, Simí naartin ajakua nu aa jintuki pegkerchau chicharki wea.

⁶ Tumak apu Davidtan, suntar aina tura ashi shuar nijai wenaka eteawar wenanak nitajai kajera asa, apun tura suntar ainancha kaya ainajai nagkia.

⁷ Simí Davidtan pegkerchau chicharuk: “¡Magkartin pegkerchauwa juiyagka jinkim wetá!

⁸ Ame apu jasam inamrattsam, Saúl nina uchirijaimak maatarma tusam inamrauwaitme. Tura asaakmin Yuus waittan surameawai. Yamaika ame apu jasam inammainnum amina uchiram Absalón apu jas inamrati tusa Yuus tiyi. ¡Pegkerchau asam waitame! ¡Magkartinaitme!”, tusa tinaiti.

⁹ Tusa takai Davidta umai Sarvia ajakua nuna uchiri nui netaku asa, ichrin chicharuk: Ju shuar eme anentsarkesha ishtaiya juka apu aminka pegkerchauka chichartammaitsui. ¡Yamaiya juik muuken tsupirkan maatjai akuptukta! tusa tinaiti.

¹⁰ Turasha apu, Abisain Joabjai chicharuk: “Atum Sarvia uchiri ainatirmeka shuar wina pegkerchau chichartau maattsarum enentaimrum nuka pegkerchauwaiti. Yuus turata tusa timau asa, winaka pegkerchau chichartawai. Tuma asa nigka mantamnamaitsui”, tusa tinaiti.

¹¹ Nuna tusa inaiyak, Abisain, tura suntara apuri ainancha chicharuk: “Ima wina uchirkesha mantuattsa wakeruta nu, enentaimsarum shir iistarma. Tuma asamtai Benjamín weantu chikichik shuar, tura Saulo patai ainasha nuu weantu asa chikich shuar winaka mantuattsa wakerutawai. Yuus turata tusa timau asa turuttsuash pegkerchau chichartukti pachitsuk inaisatarma.

¹² Nuna tumachkusha pegkerchau chichartuinakai waitaj nuna inaimamtikrak, Yuus pegkernum yainkattawai”, tusa tinaiti.

¹³ David nui pujau shuar nijai yujainajaimak weakai, Simí ika ikantak wesa pegkerchau chicharuk, kaya ainan juki nagkia tura nugka juyujuyuntuncha nagkia.

¹⁴ David, shuar nijai yujainajaimak entsa Jordánnum jeawaiti. Tuma shir senchi pimpikiaru asar, wetsuk nuig pujusaru ainawai.

Husai Absalónjai igkuniakmau

¹⁵ David tuma wekai, Absalón yaakat Jerusalénnum ashi israelita aina nijai yujainajaimak, tura Ahitofeljaimak jeawaiti.

¹⁶ Tumamtai Davidtan amikri Husai werinaiti. Tuma Absalónkan igkugkuiti. Tura tukeneas senchi chichaak: “¡Ju apuka nukap uwí pujus inamrati! ¡Ju apuka nukap uwí pujus inamrati!” tusa imatra.

¹⁷ Turasha Absalón Husain chicharuk: “Wika, aminka wina aparu amikri asampa chichamen metek umirnapita tusan tinajme. ¿Urukamtai nijaisha wechamame?” tusa tinaiti.

¹⁸ Tusa tama Husai Absalónkan chicharuk: “Yuus, tura ashi wina pataar ainasha amina apu atii tusa turamiaru asarmatai, wika juakmajai.

¹⁹ Nuiyasha ame wina amikru uchiri asaakmin, amina umirkattsan wika wechamjai. Tuma asan amina apan umirin ayaj tumasnak apu amina umirkatjame”, tusa tinaiti.

Absalón nina apari nuwejai kanarmau

²⁰ Tusa timatai Absalón Ahitofelan iniak: “¿Amesha winasha urukati turutmea?” tusa tinaiti.

²¹ Tusa takai Ahitofel Absalónkan chicharuk: “Shuar apu nuwe ainan takasuka ni apu jas inamna nuka ashi nekainaji. Tuma asamtai apa inatairi ainan nuatkamurin jea kuitamkatarma tusa ikukmau pujuina nu takasta. Nu turawakmin nina aparinka kajerakpapi aitkaya tusar ii shuar aina ashi nekawartatui. Nuna tumawar shuar amijai pujuina nuka amina ima senchi shir enentaimturmasartatui”, tusa tinaiti.

²² Nuna tusa timatai Absalónkan inatairi aina, Davidtan jeen tuntupen chikichik aakan jaanchjai aakmakaru ainawai. Nuna turawarmatai ashi israelita ainasha wainmaunam nu aaknum pujus Absalón nina apari nuwen takasuiti.

²³ Ahitofelka yacha ajakuiti. Tuma asamtai ashi shuar aina nina chichamenka Yuusa chichamejai metek enentaimtujakaruiti.