2 Samuel 12 - New Testament with Old Testament portions

Natán Davidtan chicharkamu

¹ Uríasan nuwen David nuatkau asamtai, Yuus Natán naartinan David pujamunam akupkauwaiti. Turam jeaa Davidtan chicharuk: “Chikichik yaaktanam jimar shuar pujujakuiti. Chikichka wiakach ajakuiti, tura chikichka wiakchachu ajakuiti.

² Wiakchan ovejari aina, tura vacari ainasha shir nukap arujakuiti.

³ Turasha wiakchachu tagkurigka oveja uchiri sumakmau chikichik arujakuiti. Shuar kuitrinchau ajakua nu ovejan sumak nina uchiri ainajai iruntur kuitamainak, nita yuamunak ovejancha ayurujakuiti. Tura nita shikika umutaijaig shikikar umutaincha sujakuiti. Tura nita kanamunmag ikanujakuiti. Tura asa nina nawantrin anemaina numamtuk ane jakuiti.

⁴ Tuma pujai wiakchan irarsattsa chikichik shuar tarinaiti. Tumamtai wiakach tagkuri nukap irunaig nina tagkurinka maatsuk, shuar wiakchachun tagkurin juruki maa inaraa, shuar irak taan ayurawaiti”, tusa tinaiti.

⁵ Tusa takai David nu shuar wiakach tumawa nuna senchi kajerkauwaiti. Tuma Natánkan chicharuk: Yuus, waitrichu asamtai wisha nekasa nuna tajame. Shuar nuna turaka mantamnamainaiti.

⁶ Shuar kuitrinnuchun wait anentsuk tagkurin mantua asa cuatro ovejan awakemainaiti, —tusa tinaiti.

⁷ Takai Natán Davidtan chicharuk: “¡Nuna turawa nuka ametme! Ina Yuusri amina chichartamuk: Israel shuar ainan apuri atii tusan wii anaikauwaitjai. Tura nuiyasha Saúl maawai tusan yaigkuitjai”.

⁸ Ni pujusa inamratnuncha nina apuri Saúl ajakua nuna jeen susauwaitjai. Tura nina apuri ajakua nuna nuwe ainancha wii susauwaitjai. Wii etegkamu ainan apuri atii tusan wii anaikauwaitjai, tura nuiyasha chikich warí ainancha susauwaitjai.

⁹ Turamu ayat wina chichamrun umitsuk wii nakitamun takak Uríasan nuwen atankinaiti. Uríasan ni inamramunam amonita aina maawaru ainawai. Nuna tura asa Uríasnaka ni maawaiti.

¹⁰ Turasha yamaika wina eme anentrus iirtsuk, Uríasa nuwen atanki nuatkau asamtai, ni weantu ainanka nita shuari aina tuke mainiartin ainawai.

¹¹ Wii, Yuus asan tajai: “Nina shir uchiri aina nuke ninka waitkasartatui. Shuar ashi wainmaunam tsawai nina nuwe ainan nina anetairi chikichik shuar takarsattawai.

¹² Ni umak chikicha nuwen takasu akaisha Israel shuar aina ashi wainmaunam nina nuwe ainanka takarsartatui”, tusa Yuus turamui tusa Natán tinaiti.

¹³ Tusa tama Yuusan eme anentsa iitsuk tunaun takarsajai. Tusa takai Natán chicharuk: “Ame tunau takasu akumnasha, Yuus aminka mantamashtatui. Yuus aminka inaitamsashtatme”.

¹⁴ Antsu Yuus eme anentsa iiyachu asam, nina chichame umikchau asaakmin, amina uchiram yama akinawa nu jakattawai, tusa Natán tinaiti.

¹⁵ Tusa ujak Natán nina jeen waketkinaiti. Tuma ai Uríasa nuwen David uchi akiamua nuna Yuus jatan akuptukuiti. Turamu asa Davidtan uchiri jatan nagkamna senchi ja.

¹⁶ Tumakai David uchin senchi anea asa, yurumkan yutsuk Yuusan aujeak káshika nugkanam tepejakuiti.

¹⁷ Davidtan jeen apu takau aina nantakim yurumak yuata, —tusa tuina. Turasha nakitujakuiti.

¹⁸ Tuma pujai siete tsawanta jui uchi jakauwaiti. Tumamtai nina inatairi aina uchi jatsuk iwáku pujaigkisha yurumak yuata tusa tamasha umirtamchamji. Tuma asa yamaiyawa uchirmeka jakayi tusa ujamka nu senchi wake mesemar nekapmainaiti tu enentaimaina asar ashamainak Davidtan ujakcharu ainawai.

¹⁹ Tumaina asar nitak chichainan wainak uchiri jakamun nekawaiti. Tuma inatairi ainan chicharuk: “¿Uchir jakayik?” tusa tinaiti. “Tusa takai ee, jakayi”, tusar tiaruiti.

²⁰ Tuinakai David nugkanam tepau nantaki entsanam mainaiti. Tuma nugkutairin chikichan nugkur, perfumen yakamaruiti. Tuma Yuus ememattasa iruuntai jea jaanchjai jeamkamunam wayaa Yuusan eme anentas iiyak emematnaiti. Tura umik jeen waketki inatairin yurumkan sea yuawaiti.

²¹ Tumamtai nina inatairi aina chicharainak: “Apuru, uchiram iwáku pujaigka yurumak yutsuk pujusam, útu pujumam nusha, ¿urukamtai uchiram jakamtaigka nantakim yurumkasha yuame?” tusar tiaruiti.

²² Tuinakai David nitan ayak: “Uchir iwáku pujakaigka, uchirun Yuus wait anentar pegker amajtursachaintash tusan, Yuusan aujkun yurumkan yutsuk útkun pujumjai.

²³ Turasha yamaika uchirka jakayi. Yurumkan yutsuk pujaknasha uchir jaka aunka inanmaitsujai. Wisha jakanka ni pujamunam wetatjai. Turasha nigka, jui wii pujamunmagka taashtinaiti”, tusa tinaiti.

Salomón akinamu

²⁴ David Betsabén enentain ichichturtasa wuwaiti. Tuma enentain ichichtur nijai kanaruiti. Tura ajaprumtikauwaiti, turam pujus uchin jurer, Salomón anaikauwaiti. Nuna uchin Yuus ane jakuiti.

²⁵ Yuus Natánkan David nina uchirin Jedidías anaikati tusam ujakta tusa akupkauwaiti. Turamu asa jeaa Davidtan ujakuiti. Turam uchirin Jedidías anaikauwaiti.

^26-31 (-)