2 Reyes 7 - New Testament with Old Testament portions

¹ Tusa takai Eliseo apun chicharuk: “Yuus chichaak ta nu antukta: Yamai etsa uruka juni ai kashin yaakat Samaria waitirin shuar aina chikichik kuitjaig siete litro trigon sumartatui, tura cebadancha chikichik kuitjaig quince litro sumartatui”, tusa tinaiti.

² Tusa takai apu inatairi akupkamu Eliseon chicharuk: “Ame tumattawai tusam tame nuka, Yuus nayaimpinmaya waiti ainan urarmataisha tumamaitsui”, tusa tinaiti. Tusa tama Eliseo nina chicharuk: “Ameka nuka waintaka wainkattame, turasha sumakam yuashtatme”, tusa tinaiti.

³ Cuatro shuar israelita aina lepra achiimaku asar yaakta waitirin aa pujuina. Nu aina chichainak: “Juig iima eketkurka yumain atsau asamtai, tsukai jinattaji.

⁴ Tura yaaktanam wayakrisha yumain atsau asamtai, chikich ainajaimak jinattaji, tura juig pujakrisha yumain atsau asamtai metek jinattaji. Tuma asamtai Sirianmaya aina matsatmaunam wemi, nita ina mantamainachkaigka iwáku pujuttaji, tura mantamainakaisha nuka pegkeraiti”, tusa tinaiti.

⁵ Nuna tusar káshi jasmatai Siria nugkanam wearuiti. Tuma we wenakua Siria nugkanam jeastatuk wesar chikichik shuarkesha pegke atsaun wainkaruiti.

⁶ Sirianmaya shuar, Yuus tumati tusa timau asar, shir nukap suntar aina maaniattsa carro ainanam tura caballo ainanam wenak pampamaina imatun antukaru ainawai. Tumawar Israel shuar ainan apuri hitita ainan apurin tura Egiptonmaya shuar ainan apurin atum Sirianmaya shuar ainajai maaniatarma, tusa timau asar wininak imatainatsuash tu enentaimraru ainawai.

⁷ Tumaina asar nita aakri ainan, caballori ainan, burrori ainancha tura nui irununka ashi ikuinak uwemrartasa káshi jasa ai yaaktanka ikuinak tsekeararu ainawai.

⁸ Shuar lepra tukumu aina Sirianam jeawaruiti. Tumawar chikichik aaknum wayawaru ainawai, tumawar yutai atatmaun yuawar umutaincha umararu ainawai. Nuna tumawar oro ainan, jiru plata tutai ainan tura jaanch ainancha jukiaru ainawai. Turawar úkaru ainawai. Nuna turawar chikich aaknumsha wayawaru ainawai, tumawar nuiyancha warí ainan yaruakar úkaru ainawai.

⁹ Nuna turawar nitak chichainak: “Ii jutikaj juka pegker aitkatsji. Sirianmaya aina tsekearara ju pachisa, yamaiya juik chikich israelita aina ujamainaitji. Nu turumain aig ii etsertsuji. Tura tsawarar etserkurinka urukamtai yaunchuk etserkachurum tusa ina kajertamain ainawai. Nuna turutmamain asarmatai yamaik weri Sirianmaya ainaka tsekeararmayi tusar apu ujakmi”, tusa tuina.

¹⁰ Nuna tusar wear yaaktanam jeawar yaaktan kuitamin ainan untsukar chicharainak: “Sirianmaya aina matsatmaunam wemaji. Turasha shuar ainaka pegke atsumayi, shuar chichamuksha antukchamji. Antsu caballo aina tura burro aina jigkamu wajarmayi, tura aak aakmarmau ainasha nunisag irunmayi”, tusa tiaruiti.

¹¹ Tusa tuinakai yaakat Samaria waitirin kuitamin aina, apu pujusa inamtai jean waitirin kuitamin ainan untsukaruiti.

¹² Shuar lepra achiimaku aina chichaman etserkamun apu antuk, káshi aig nantaknaiti, tuma suntara apuri ainan chicharuk: “Sirianmaya shuar aina ina iturtamkattsag tumaina nuna pachisan ujaktajrume. Ii tsukai waitainaj nuna nekaina asar, ina yaaktarinia jintrakrin achirmarar ina yaaktarin nita jukiartasa, jeen ikuinak ajariin umainak tumawarai”, tusa tinaiti.

¹³ Tusa apu takai suntara apuri chikichik chichaak: “Iturkartig tusar ujumak suntar aina cinco caballonam akupkami. Tura nita iwáku waketki tainaksha, nuna tumachkusha mantamnakaisha ii chikich ainati jui pujuinaj nutisha metek jinattaji”, tusa tinaiti.

¹⁴ Nuna tusa takai Sirianmaya shuar ainasha urukakug tumawara nu nekatarma, tusa ujumak suntar ainan caballo ainanam tura carro ainanmasha akupkauwaiti.

¹⁵ Nu turamu aina wear Sirianmaya shuar shiakmaun patatukar we wenakua entsa Jordánnum jeawaruiti. Sirianmaya aina wauras tsekena asar jaanch akakeka ikukmau aina, tura chikich warí ainasha tepetar wearun wainkaruiti. Nuna tuman wainkar ikuinak waketkiar jeawar, nita wainkamuri ainan pachisar apun ujakaru ainawai.

¹⁶ Nuna antukar wárimas yaakat Samarianmaya aina jiintrar Sirianmaya shuar ainan warírinka ashi yaruakaru ainawai. Yuus tumattawai tusa etserkauwa tumasag, shuar yutai ainan surin ainaka jiru plata chikichkijaig harina trigojai najanamun siete litron, tura chikichik jiru plata tutaijaig harina cebadajai najanamun quince litron surukaru ainawai.

¹⁷ Tura apu nijai takaun Eliseo maata tusa akupkauwa nuna ame yaakta waitiri kuitamkata, tusa tinaiti. Turasha shuar aina shir nukap asar teperkar maawaru ainawai. Apu chichastasa jeamtai, Eliseo apujai chichaak tumattawai, tusa tina nuka tumasag uminkauwaiti.

¹⁸ Nu tumawa nunaka Eliseo israelita ainan apurin chicharuk: Yaakat Samaria waitirin shuar aina chikichik jiru plata tutaijaig siete litro harina trigojai najanamun, tura chikichik jiru plata tutaijaig quince litro harina cebadajai najanamun sumartatui tinaiti.

¹⁹ Imatika sumartatui tusa Eliseo takai apu akupkamu suntara apuri chichaak: “Yuus nayaimpin uraimtaisha nuka pegkesha tumamaitsui”. Tusa takai Eliseo chicharuk: Wii tumattawai tusan taja nuka wainkattame, turasha nuka ameka yuashtatme, tusa timauwa nunaka

²⁰ yaakta waitirin kuitamuk wajaun shuar aina teperkam jakauwaiti.