2 Reyes 5 - New Testament with Old Testament portions

Naamán lepra achikam ja pegker amajsamu

¹ Naamánka Sirianmaya suntar ainan apuri ajakuiti. Nina shuari ainan nepetkati tusa Yuus timau asa, nina shuari ainajai maaniaksha nukap nepetmakuiti. Tuma asamtai Siria nugkanmaya apu eme anentsa iitai ajakuiti. Turasha Naamánka lepran achiimak jak pujau.

² Nu apu israelita ainajai yaunchuk maaninak, nuwa uchichin chikichkinak achik juki Naamán nina nuwen amina inatairam atii tusa susauwaiti.

³ Nu nuwach apu Naamánkan nuwen chicharuk: “Yuusa chichamen etserin yaakat Samarianam puja nui amina aishrum wegka lepran achiimaku asa ja aunka pegker wemainaiti”, tusa tinaiti.

⁴ Tusa tama nuwa aishrin ujakuiti. Turam Naamán nuna antuk nina apuri pujamunam wuwaiti. Tuma jeaa israelitanmaya nuwa timaun turusag ujakuiti.

⁵ Tusa ujakam Sirianmaya apu chicharuk: Pegkeraiti, wetá, wii Israel shuar ainan apurin papiin aatratjai turamtai nu jukim apu susata. Nuna papiin aujas amina yainmakti, tusa tinaiti. Tusa tama Naamán Yuusa chichame etsernun pegker amajsam akiktinan, jiru plata tutain treinta mil, oro kuit najanamun seis mil, tura jaanch nugkutai pegker ainan diez jukinaiti. (Tuma weak nina inatairi ainan juki wuwaiti).

⁶ Nuiyasha Israel shuar ainan apuri susatnun Sirianmaya apu papiin aarmaun jukinaiti. Nu papiinum apu aak: Wika Sirianmaya ainan apuriyaitjai. Tumau asan wina suntarun apurin Naamán naartinan lepran achiimakun amina pegker amajtursati tusan ame pujamunam akupeajai, tu aarmau ajakuiti.

⁷ Naamán Samaria nugkanam jeawaiti, tuma Israel shuar ainan apuri pujusa inamtai jeanam wuwaiti. Tuma jeaa apun papiin susauwaiti, turam apu aujas umik wake mesemar nekapeak jaanchrin jaakuiti. Tuma chichaak: “¡Wika Yuus pujutan sukartin, tura jakati tusasha tina nuchauwaitjai! Sirianmaya apuka ju shuar lepran achiimaku asa ja nuna pegker amajsati tusagka winaka akupturmaitsui. Atumsha shir enentaimsarum iistarma, junaka ijai maaniattsa iturchatan eatramji”, tusa tinaiti.

⁸ Sirianmaya apu papi aara akupkamun, Israel shuar ainan apuri juki aujas umik, ina iturchatan eatramuk jutikramaji tusa wake mesemar nekapeak, jaanchrin jaakmaun, Eliseo jeashat pujayat nekawaiti. Tuma nina inatairin akupeak: Nu shuarka wina akupturkata. Turam israelita ainan nugken wii Yuusa chichamen etsernun pujaj nuna nekarattawai timayi tusam ujakta tinaiti. Tama we apun ujakuiti.

⁹ Nu tusa ujakam, Eliseo jeen wetá tusa Naamánkan apu tinaiti. Tusa tama carretarijai caballo ainajai Eliseo pujamunam Naamán wuwaiti. Tuma jeen jeaa waitinam wajasuiti.

¹⁰ Turasha Eliseoka aa jintukigsha apunka aujsachuiti, antsu nina inatairin chicharuk: Entsa Jordánnum weti. Tuma sieteya imania iyagti, tuma lepra tukumau asa ja aunka pegker jastatui, tusa turamui tusam ujakta tusa akupkauwaiti.

¹¹ Turam nu weri Eliseo turamui tusa ujakuiti, nu tusa tama Naamán shir senchi kajekuiti. Tuma nina inatairi ainan chicharuk: Wika Yuusa chichamen etserin aa jinki igkuntak juruki, nina Yuusrin aujtursantsuk lepra achirkauwa auna antintruk pegker amajtusainti tu enentaimramjai.

¹² Siria nugkanam yaakat Damasconam entsa Abaná tura Farfar tutai a nuwaiti Israel shuar ainan entsari Jordánkan nagkasau ima pegker ainaka. Ima nekaska wika nu entsa ainanam main pegker jamainaitjai, tusa tinaiti. Nuna tusa shir senchi kajek wuwaiti.

¹³ Takai nina inatairi aina chicharainak: “Yuusa chichamen etserin iturchatan turamkai umirmaitsume. Ayatak entsanam siete imajnia iyag pegker jastii tusa turama nuka pegkesha iturchatchauwaiti. Antsu iturchatan turamin akaigka nuka umirmaitsume. Tumau asamtai ni turammauka turusmek umikta”, tusa tiaruiti.

¹⁴ Tama Naamán wuwaiti, tuma entsa Jordánnum jeaa Eliseo tumati tusa timaunka tumasag siete imajnia entsanam iyagkuiti. Tuma pegker jasuiti, nina iyashigka shuar natsa iyashiya numamtin jasuiti.

¹⁵ Nuna tuma Naamán, Eliseojai chichastasa shuar nijai yujainajaimak wuwaiti. Tuma Eliseo pujamunam jeawaiti, tuma Eliseon chicharuk: “Ashi nugka aina nui Israelan Yuusriya imau atsa nuna yamaika nekaajai. Tuma asamtai, ame wina pegker amajtusu asaakmin warín amastatjam nu, wait aneasam nakittsuk jukita”, tusa tinaiti.

¹⁶ Turasha Eliseo chicharuk: “Yuus Pujuwa nuna naari pachisan tajame”. Ame wina surustasam turutam nunaka ayu tichattajme, tusa tinaiti. Nuna tusa Naamán susattsa imatramsha Eliseo nakitrauwaiti.

¹⁷ Tumamtai Naamán Eliseon chicharuk: “Wii amina susattsan wakeraj nusha nakitraume, tuma asaakmin susashtatjame, wii amina seattajam nu surusta. Jimar mulajai jumain, Israelnumia nugka surusta. Wika yamaika nekas yuuschau aina nunaka eme anentsanka iischattajai. Antsu Yuusan eme anentsa iiyakun, tagku ainan maa patasa ashi epeatnun tura nuig tagku ainan maa ajamnaisatnun wina nugkarui waketkin najanatjai”, tusa tinaiti.

¹⁸ Antsu wina nugkarui jeaa pujusan wina apur nina yuusrimtairi Rimón tutaiya nuna eme anentas iiyak ememattasa weakai uyuntsattajai. Nu ememattainam wayaan nuna emematak wina yakairuin achimak tikishmar pujakai wisha tikishmaran pujustatjai. Nuna wii tumakaisha wait aneas Yuus winasha tsagkurturti tusan tajai, tusa tinaiti.

¹⁹ Tusa takai Eliseo Naamánkan chicharuk: “Shir aneasam wetá, tumakum nugkasha jukita”, tusa tinaiti. Tusa tama Naamán wuwaiti. Tuma jeashat jas wean.

²⁰ Eliseo inatairi Guehazí nigki enentaimas: “Wina apur Eliseoka Sirianmaya suntara apuri Naamán susattsa wakeramsha nakitakpa jurutsuk akupkaya. Yuusa naarin, wii nekas wári patatukan amaigkan ujumkesha jurukchainjash, tu enentaimrauwaiti.

²¹ Nuna tu enentaimar Guehazí Naamánkan ukunam patatukuiti. Tuma Naamán ukurini winaun wainak aujsattsa, carretarin aepas akaikinaiti. Tuma chicharuk: ‘¿Iturchat atsuak?’ tusa tinaiti.

²² Tusa tama ni chichaak: ‘Iturchatka atsawai. Antsu wina apur Eliseo Efraín nugkanmaya jimar shuar natsa Yuusa chichamen etserin yama taawarmatai, ame weme jiru plata tutai najanamu tres mil, nuiya jimar jaanch nugkutai seam utita tusa akuptukmatai winajai’, tusa tinaiti.

²³ Tusa tama Naamán chichaak: ‘Nekaska wait aneasam jiru plata tutain seis mil jukita’, tusa tinaiti. Nuna tusa jimar saconam kuitan chumpiawaiti, tura jaanch nugkutaincha jimaran egkeawaiti. Nuna tura nina inatairi jimaran chicharuk: Atum jukirum ejétuatarma tusa susauwaiti.

²⁴ Turam jukiar Eliseo, Guehazíjai nainnum puju jakua nui ejeawaruiti. Turawarmatai Guehazí nuna jukinaiti, tura nu shuar ainan aujas akupkauwaiti, tura wearmatai jeanam uuk ikusuiti.

²⁵ Tura Eliseo pujamunam jeawaiti. Tumamtai Eliseo chicharuk: ‘¿Guehazí tui wuwa winame?’ tusa tinaiti. Tama chichaak: ‘Wechajai’, tusa tinaiti.

²⁶ Takaisha Eliseo ataksha chicharuk: ‘Naamán amina aujtamsattsa nina carretarinia akaikima nunasha wika nekamjai. Yamai Yuusa senchirijai pegker amajkartusaj juigka kuitan, nugkutain, ajan, tagku ainan, tura inatai ainankesha surusarti tusarka wakerumaitsui.

²⁷ Turumainchau aig ame nu wakerakum tura asam, lepra apu Naamánkan achikua nu amesha achiimaktatme, tura amee weantu ainasha tukumartatui’ ”, tusa tinaiti. Nuna tusa Eliseo ikua aig Guehazí lepra achikam puju jasuiti.