2 Reyes 4 - New Testament with Old Testament portions

^1-7 (-)

Eliseo yaakat Sunemnumia nuwan yaigmau

⁸ Chikichik tsawantin Eliseo yaakat Sunemnum wuwaiti. Tuma nui wetatmaun nuwa eme anentsa iitai pujau, Eliseon wina jearui taam yurumak yuata tusa nukapea tinaiti. Tusa tama nui we yurumkan yuawaiti. Eliseo nu yaaktanam weakka nuig tuke yu jakuiti.

⁹ Tuma asamtai nu nuwa nina aishrin chicharuk: “Au shuar ju yaaktanam nagkamak ina tuke irartamaj aunka wika nekajai”. Nigka Yuusa chichamen etsernaiti.

¹⁰ Tumau asamtai jea tuntupea jui, ni kanartintri najatami. Nu turar chikichik peak, mesa, ekemtai tura ekeemataisha apujtusmi. Nu turamu asamtai ni ina irartamuk winaksha nui kanarti, nuna tusar metek umikaruiti.

¹¹ Eliseo nu yaaktanam weak nitan irarsattsa jeawaiti, tuma ni kanartin tusa umikmaunam nui kanaruiti.

¹² Tuma nina inatairin Guehazín chicharuk: “Sunennumia nuwa untsukta”, tusa tinaiti. Tusa tama untsukuiti, turam Eliseo pujamunam jeawaiti.

¹³ Tumamtai Eliseo nina inatairin chicharuk: “Nu nuwa ina shir amajtamaj nu isha warinmak yaimainaita nu iniasta. Tura nisha wakerakaigka apujai nuniachkursha suntara apurijai chichamainaitji”, tusa tinaiti. Tusa takai nu nuwa chichaak: “Wika juigka wina pataar ainajai pujau asan iturchatcha atsamunam shir pujajai”, tusa tinaiti.

¹⁴ Tusa takai ¿isha warinma nisha yaimainaitji?, tusa Eliseo tinaiti. Tusa takai Guehazí chichaak: “Ju nuwaka uchirtinchauwaiti tura nina aishrisha unchiti”, tusa tinaiti.

¹⁵ Tusa takai Eliseo nina inatairin chicharuk: “Untsukam jui ataksha itaata”, tusa tinaiti. Tusa tama weri untsukuiti, turamsha Eliseo pujamunmagka jeatsuk waitinmag wajasuiti.

¹⁶ Tumamtai Eliseo nuna nuwan chicharuk: “Chikich uwí atata nui chikichik uchi jurertatme, tusa tinaiti. Tusa tama nu nuwa chichaak: Atsaa, tumashtatjai, wina apuru, ameka Yuusa chichame etsernaitme tumauwaitkumka winaka tsanurmaitsume”, tusa tinaiti.

¹⁷ Nigka nekaspa turutua tusa tichauwaiti, turasha Eliseo tumattame tusa tina tumasag chikich uwítin ajaprukuiti. Tuma uchi aishmagkun jureruiti.

¹⁸ Uchi tsakaruiti, tuma asa apari nina inatairi ainajai ajanam arakan juwak pujau asamtai, nina aparijai pujustasa chikichik tsawantin wuwaiti.

¹⁹ Tuma nui jeawaiti, tumakma ¡aya muukar najamawai! ¡muukar najamawai! tusa imatu. Tusa imatkai uchi apari nina inatairin chikichkinak chicharuk: “Jukim nukuri pujamunam jea ejéta”, tusa tinaiti.

²⁰ Tusa tama inataisha nuna uchin juki nukuri pujamunam ejénaiti. Turamtai nukuri juki nagkas puja pujakua etsan tutupin amajsauwaiti, tumai uchi jakauwaiti.

²¹ Turasha nukuri uchi jakaun juki Yuusa chichamen etserin Eliseo kanutairin yaki ejénaiti. Tura peaknum aepas waitin epeni ikuknaiti.

²² Nuna tura inaiyak wina aishur jui taati tusa turamui tusam ujakta, tusa inatairin akupkauwaiti. Turam weri ujakam aishri taawaiti, tumamtai nuwa aishrin chicharuk: Chikichik inatai burro susam akupturkata, turawakmin nujai Yuusa chichamen etserin pujamunam wetajai. Tuma chichasan taatjai, tusa tinaiti.

²³ ¿Urukamtai nijai chichastasmesha wakerame? Yamaika yamaram nantuchuiti nuna tumachkusha sábado tsawanchauwaiti, tusa nina aishri tinaiti. Tusa tama tumauchu akaisha nuka uyumakaipa, tumau akaisha wika wetatjai, tusa tinaiti.

²⁴ Tusa takai takumka wetá tinaiti. Tama burronam ekemsa wetin umikta, tusa inatain tinaiti. Tusa tama umikmatai nuwa inatairin chicharuk: Wári wemi, wii jui ayamrami tusan tatsaigkika wajantaipa, tusa tinaiti.

²⁵ Nuna tusa nuwa wuwaiti, tuma Yuusa chichamen etserin Eliseo pujamunam nain Carmelo tutainam jeawaiti. Tumattamaun Eliseo ni pujamunam nuwa winaun ikag wainkauwaiti, tuma nina inatairin Guehazín chicharuk: “Au nuwa wina auka Sunemnumia nuwaiti”.

²⁶ Tsekegkim weme igkugkam nisha, nina aishrisha tura uchirisha pegkerash pujuina nu pachisam iniasta, tusa tinaiti. Tusa tama Guehazí nuna nuwan igkug aujsattsa wuwaiti. Tuma igkug Eliseo titá tusa timaun turusag tinaiti. Tusa tama ashi pegkerak pujaji, tusa nuwa tinaiti.

²⁷ Nuna tusa inaiyak nina inatairijai Eliseo pujamunam jeawaiti. Tuma Eliseon nawenam pagkuk pujusuiti, turamtai Guehazí juki akankattsa jearnaiti. Turasha Eliseo chichaak: “Aitkawaipa, nigka shir senchi wake mesemar nekapeawai, urukamtaig ania nuna pachiska Yuus eke ujattsui”, tusa tinaiti.

²⁸ Tusa takai nuwa chichaak: Apu, wika aminka uchi surusta tusanka tichamjame. Antsu wika aminka tsanurawaipa tusan nuna timajme, tusa tinaiti.

²⁹ Nuna tusa takai Eliseo nina inatairin Guehazín chicharuk: Akachumtairam akachumata, tumam wina ushukrutair jukim ju nuwa jeen wetá, tuma wesam shuar igkuakmesha aujtsuk nagkaikita. Tura chikichik shuarkesha amina igkunmak aujtamkaisha aikaipa. Tumam jeaam uchi yapin wina ushukrutair awasta, tusa tinaiti. Tusa tama Guehazí uminas Eliseo ushukrutairin juki wári wuwaiti.

³⁰ Turasha uchi nukuri Eliseon chicharuk: “Yuusa naari pachisan tajai tura amincha pachisan tajai. Ame winachkuminka wisha waketkishtatjai”, tusa tinaiti. Tusa takai Eliseo nu nuwajai wuwaiti.

³¹ Tuma Eliseo eke jeaatsaig, Guehazí ni emkin asa niya jeaa yaki waka nita kanutainam wayawaiti. Tuma Eliseo turata tusa timaunka turusag ushukrutain uchi yapin awantsauwaiti. Nuna turamtaisha uchika muchittsuk jaka tepau. Tumamtai Guehazí, Eliseon igkugtasa wuwaiti, tuma Eliseo winaun jinta igkugkuiti. Tura chicharuk: Uchika ushukrutai yapinam awantsamsha muchittsuk jaka tepemai, tusa tinaiti.

³² Tura Eliseosha jeawaiti, tuma jea wayaa uchi jaka peaknum tepaun wainkauwaiti.

³³ Tuma kanutainam wayaa waitin epeni, ima Eliseok uchi jakaujai pujus Yuusan aujsauwaiti.

³⁴ Tuma peaknum waka uchi jaka tepettamaun awamti uchi wenen nina wenen enekna, uchi jiin nina jiin enekna, uchi uwejen nina uwejen enekna tura ashi iyashnum nina iyashin enekna tepesuiti. Tuma tepai uchi iyashi tsuer jasuiti.

³⁵ Tumakai Eliseo peaknumia akaiki atuni wajan, atuni wajan ja weká. Tuma ataksha peaknum waka uchi jaka tepaun patamti pagkuk tepesu, tuma tepai uchi sieteya imania jachitak iimnaiti.

³⁶ Tumamtai Eliseo nina inatairin Guehazín untsuk chicharuk: “Uchi nukuri untsukta”, tusa tinaiti. Tusa tama nuwan untsukuiti. Turam Eliseo pujamunam nuwa taawaiti, tumamtai Eliseo chicharuk: Uchirmeka aneantai jukita, tusa tinaiti.

³⁷ Tusa tama nuwa tsekegki Eliseon nawenam pagkukuiti, nuna tura ikuak uchin kanutainam egketun juki nina jeen wuwaiti.

^38-44 (-)