2 Reyes 2 - New Testament with Old Testament portions

Elías nayaimpinam wemau

¹ Yuus Elíasan nasejai egkek jukitin tsawan jeawaiti. Tumamtai Elías Eliseojai yaakat Gilgalnum pujuina wearuiti.

² Tuma jinta wesa Elías Eliseon chicharuk: “Yuus winaka yaakat Betelnum wetá tusa turutmayi. Turutin asamtai wika nui weajai, ameka juig juakta”, tusa tinaiti. Tama Eliseo ayak: “Yuusa naari pachisan tajame. Pegkesha juakchattajai, wisha ame weamunam winittajai”, tusa tinaiti. Tama Elías Eliseojai Betelnum wearuiti.

³ Tuma Betelnum jeawarmatai, Yuusa chichamen etserin aina nui pujuina jiintrar, Eliseon igkugkaruiti. Nu ainanmaya Eliseon chikichik chicharuk: ¿Amina jintintramnun Yuus yamai jukitta nusha nekamek? tusa iniasuiti. Tusa iniam Eliseo aimuk: “Ee nekajai, turasha nu pachisrumka etserkairpa”, tusa tinaiti.

⁴ Tusa timatai Elías, Eliseon ataksha chicharuk: Yuus winaka chichartak Jericónam wetá turutmayi. Turutin asamtai wika nui weajai, ameka juig juakta, tusa tinaiti. Tama Eliseo ayak: Yuusa naari pachisan tajame. Pegkesha juakchattajai, wisha ame weamunam winittajai, tusa tinaiti. Tama Elías Eliseojai Jericónam wearuiti.

⁵ Tuma Jericónam jeawarmatai, Yuusa chichamen etserin nui pujuina jiintrar, Eliseon igkugkaruiti. Nu ainanmaya Eliseon chikichik chicharuk: ¿Amina jintintramnun Yuus yamai jukitta nusha nekamek? tusa iniasuiti. Tusa iniam Eliseo ayak: “Ee nekajai, turasha nu pachisrumka etserkairpa”, tusa tinaiti.

⁶ Tusa timatai Elías, Eliseon ataksha chicharuk: “Yuus winaka chichartak entsa Jordánnum wetá turutmayi. Turutin asamtai wika nui weajai, ameka juig juakta, tusa tinaiti. Tama Eliseo ayak: Yuusa naari pachisan tajame. Pegkesha juakchattajai, wisha ame weamunam winittajai”, tusa tinaiti. Tama Elías, Eliseojai entsa Jordánnum wearuiti.

⁷ Tumainakai yaakat Jericónmaya Yuusa chichamen etserin cincuenta shuar aina patatukaruiti. Tumawar urukawartig tusar entsa Jordánnum Elías, Eliseojai jeawarmatai, nitasha ika wajasar ii wajaina.

⁸ Tumainai Elías nina jaanchrin uku awagkeakmaurin jusa pempear entsan awatnaiti. Turam entsa kanak jujuptin jasuiti, tumamtai mai wekasar katigkaruiti.

⁹ Tumawar wesar Elías, Eliseon chicharuk: “Yuus eke wina juratsu juik warina iturtukti tusamea wakeram nu turutta”, tusa tinaiti. Tama Eliseo ayak: “Yuusa chichamen etserin chikich aina nuna apuri atii tusam turutta tusan wakerajai”, tusa tinaiti.

¹⁰ Tama Elías ayak: “Ame seatam nuka iturchataiti. Turasha Yuus jurakai amina ikukin nayaimpinam weai waitkamka, ame turutam nuka jukittame. Antsu wii nayaimpinam weai waitkachmeka jukishtatme”, tusa tinaiti.

¹¹ Tusar chichaki wenai, carro jiya numamtuk keeku tura caballo ainasha ji keena numamtuk keeku aina nayaimpinmaya wantinkauwaiti, tumai Elíasan akanak nase egkek nayaimpinam jukinaiti.

¹² Nuna tuman Eliseo wainak untsumuk: “¡Wina aparu! ¡Wina aparu! Israel shuar ainanmagka suntar maanitan yacha aina nu nagkasau ameka ajakuitme”, tusa tinaiti. Turasha atak awenagka Elíasnaka wainkachuiti. Tuma wake mesemar nekapeak jaanchrin jaakuiti.

Elías Yuusa chichamen etserin ajakua tumasag Eliseo Yuusa chichamen etserin jasmau

¹³ Tuma Elías jaanchin ukunam awagkeasa wekamurin nayaimpinam weak nugka ajuanta ikukmaun juki, Jordán entsanam waketkinaiti.

¹⁴ Tuma jeaa Elíasan jaanchrin pempear entsan awatnaiti. Tura senchi chichaak: “¡Yuusa, Elías eme anentsa iiyaku umirujakmauwa winasha wainchatai aina Elías iwaintu jakuitam turusmek iwainturkata!” tusa tinaiti. Tusa taig entsa jimapetuk kanaki jujuptin jasuiti, tumamtai Eliseo wekas katigkuiti.

¹⁵ Tumamtai Jericónmaya shuar Yuusa chichamen etserin aina Eliseon wainkar chicharainak: “Elíasa wakanin yamaika Eliseo jukiyi” tusar tuina. Tuina asar Eliseon araantus iiyainak jeari tsuntsumruawar

¹⁶ chicharainak: Ika amina inatairam ainaji. Ii cincuenta shuar ainaj juuti kakaram ainaji. Iman asar amina jintintramnun, Yuusa Wakaní yaki juki nainnum ajapa ikukchamashi nuna turachkusha nugka paka amaunam ajapachmashi tusar eaktasar wakeruinaji tiaruiti. Tuinakaisha Eliseo nitan chicharuk: “Atsaa, nuna eakti tusarum shuar chikichkiksha akupkairpa”, tusa tinaiti.

¹⁷ Tusa tamaitiat eaktasar wakeruinaji, tusar tuina. Tusa tuinakai chicharuk: “Antsu wakerakrumka eaktarma”, tusa tinaiti. Timatai cincuenta shuar aina shiakar tres tsawan eakaruiti. Turuinaksha Elíasan pegke wainkacharuiti

¹⁸ Tumawar yaakat Jericónam kaunkarmatai Eliseo nitan chicharuk: “Wika auna enentaimsan weerpa tusan timajrume”, tusa tinaiti.

Eliseo entsa pegkerchau pukuni jinun pegkermamtikamu

¹⁹ Yaakat Jericónmaya shuar aina Eliseon chicharainak: “Ina yaaktarigka shir pegkeraiti. Turasha entsa pegkerchauwaiti, tura nugkasha pegkerchauwaiti. Tumau asamtai árak aina tsapachu ainawai”, tusa tiaruiti.

²⁰ Tusa tuinakai Eliseo chichaak: “Chikichik tazón yamarmanam we egkearum itaatarma, tusa tinaiti. Tusa takai tazón yamarmanam ween egkeawar ejétuawaruiti.

²¹ Turawarmatai Eliseo nuna juki entsa wuwaiti, tuma nui jeaa ween entsanam nagkima chichaak: Yuus chichaak, wii yamaika ju entsanka pegker amajeajai, turamu asamtai yamai nagkamsagka shuarkesha tura kuntinkisha juna umuinaksha pegke jakachartatui, tura nuiyasha nugkasha pegker jasu asamtai, árak ainasha tsapainiartatui tawai”, tusa tinaiti.

²² Eliseo tina tumasag, nui nagkamagka entsaka pegker jasuiti.

Shuar natsa aina Eliseon wishikramu

²³ Nuna tura yaakat Betelnum wuwaiti, tuma wetatmaun yaakat Betelnumia shuar natsa aina igkugkar wishikainak: “Elías nayaimpinam wuwa tumasmek ¡amesha muuke pakakauwa nayaimpinam wetá, muuke pakakauwa nayaimpinam wetá!”, tusa tuina.

²⁴ Tusa imatram Eliseo ukurini ayanmawaiti, tuma nitan iis, wina arantus iirainatsu ju pegkerchaunam chicharkarta tusa Yuusan aujsauwaiti. Nuna tusa taig jimar chai ikamia taa cuarenta y dos shuar natsa ainan achiarar ijinawaiti.

²⁵ Eliseo nuiya jinki nain Carmelo tutainam wuwaiti. Tuma nuiya yaakat Samarianam waketkinaiti.