1 Samuel 3 - New Testament with Old Testament portions

Yuus Samueljai chichasmau

¹ Elí jintinmau asa, Samuel Yuusan metek umirujakuiti. Nu tsawantinka Yuus shuar ainan tuke tsawantaika wantintujakchauwaiti.

² Elí wainmamainchau nekapuk nina kanutairinig kanak tepejakuiti.

³ Yuus ememattasa iruuntai jeanam káshi lámpara eke kajintsaig, Yuusa arcari amaunam kanú tepau.

⁴ Tumattamaun Yuus untsuak: ¡Samuel! ¡Samuel! tutai ni ayak: Jui pujajai, tusa tinaiti.

⁵ Tusa nantaki tsekegki Elín jeari, ¿amek untsuram? tusa tinaiti. Tama Elí chicharuk: Atsaa wika untsuatsjame, ataksha waketkim kanúta, tusa tinaiti. Tama waketki tepesuiti.

⁶ Tumattamaun Yuus ataksha untsuak: ¡Samuel, Samuel! tusa untsuam, nantaki Elín jeari chicharuk: Amek untsuram, tusa tinaiti. Tama Elí ayak: Atsaa, wika untsuatsjame, ataksha waketkim kanúta, tusa tinaiti. Tama ataksha waketki tepesuiti.

⁷ Samuelka Yuus chichamun chikichkiaksha antukchau asa, yáki untsura tu enentaimu.

⁸ Tumattamaun tresa juisha ataksha untsukuiti. Turam Elín jeari chicharuk: ¿Amek untsuram? tusa tinaiti. Tutai Elí Yuus untsuam tatsuash tu enentaimrauwaiti.

⁹ Tuma asa Samuelan chicharuk: Ataksha waketkim tepesta. Yamai untsurmakaigka: Yuusa, wika amina umirin asan jui pujajai, wari ujatkattsam wakeram nuka ujatkata tusam titá, tusa tinaiti. Tutai ataksha Samuel waketki tepesuiti.

¹⁰ Tumattamaun ataksha yaunchuk untsujakua turusag untsuak: ¡Samuel! ¡Samuel! tutai ayak: Yuusru wika amina umirin asan jui pujajai, wari ujatkattsam wakeram nuka ujatkata, tusa tinaiti.

¹¹ Tutai Yuus Samuelan chicharuk: Israel shuar ainan ashammainan iwaintuktatjai. Nuna shuar aina antukar ashamainak kurainiartatui.

¹² Tura wii Elí uchiri ainan waittan susartinaitjai tusan tinaitaj nunaka metek umiktatjai.

^13-14 Tura Elísha uchiri aina tunaun takainan nekayat jintintachuiti. Turamu asar tunaun shir pegkerchau takainak wina akajtukaru ainawai. Turutawaru asarmatai Elí uchiri ainanka nekas ijinatnaitjai tusa tinu asan, nita tunauri tsagkurnartinan tagku ainan maa epenakaisha tura ninu atii tusa anajmatruawar suruinakaisha pegkesha tsagkurtsuk, ni weantu ainajaimak waitat tuke atinan susartatjai, tusa Yuus Samuelan ujakuiti.

¹⁵ Samuel kashin tsawak káshikmas nantaki, Yuus ememattasa iruuntai jean waitiri ainan uraruiti. Turasha Yuus timauwa nuna, Elín ujatan ashama.

¹⁶ Tumakai untsuk chicharuk: ¡Wina uchir Samuel! tusa tinaiti. Takai ni ayak: ¡Jui pujajai! tusa tinaiti.

¹⁷ Tura Elí iniak: ¿Yuuscha warina ujatmakma? ¡Wait aneasam uutsuk ujatkata!. Yuus amina turammauwa nu ashi ujatchakminka ni waittan amastatui, tusa tinaiti.

¹⁸ Tusa tama ni antukmaunka pegkesha uurtsuk Elín ashi ujakuiti. Turam nuna antuk chichaak: Yuuska Tuke Pujuwaiti, tumau asa ni wakeramurinka turusag umikti, tusa tinaiti.

Samuel uchichik Yuusan umirkamu

¹⁹ Yuus yayámu asa, Samuel ninak umi umiriakua tsakaruiti. Tura Yuus ni timaunka turusag umikuiti.

²⁰ Tura Yuus Samuelan chichaman etserturkati tusa etegkayi tamaun, Israel shuar aina Dan weantu aina nugkeen nagkama yaakat Beerseba tutaiya imanaisha ashi nekawaruiti.

²¹ Tura Samuelan Yuus tuke aujin asa, yaakat Silonam ni ememattasa iruuntai jeanam Yuus ataksha wantintuk chichaman ujakuiti.