1 Samuel 28 - New Testament with Old Testament portions

^1-2 (-)

Saúl shuar jakaun wakanin untsuk itaun iistasa wemau

³ Nu tsawanta nuigka Samuelka yaunchuk jakau asa atsujakuiti. Tura jakamtai Israel shuar aina senchi útiaru ainawai. Tura ni akinamunam yaakat Ramánam ikusaruiti. Apu Saúl shuar nekamin, tura shuar jakau wakanin untsuk itau ainancha nakita asa, israelita aina nugken maatsatun jiir ashi ishiakuiti.

⁴ Tura chikichik tsawantin filisteo aina iruunar, Israel shuar ainajai maaniawartasa yaakat Sunem jeamak matsamas maaniawartasa weriaruiti. Tura apu Saúlsha nina suntaari ainan yaruak mura Guilboa tutainam iruuntraruiti.

⁵ Tura nui waka iiyajkama filisteo ainan shir nukap aakmarar matsatuk wainak senchi ashamkauwaiti.

⁶ Tuma asa ni turumainan nekattsa Yuusan aujsauwaiti. Turamsha chichame metek umirkachmau asa karanmagsha tura kaya Urim tutai tura Tumin tutaigsha tura Yuusa chichamen etserin aina nuiyagkesha ujakchauwaiti.

⁷ Nina suntaari apuri ainan chicharuk: Ii pujaj jui shuar jakaun wakanin untsuk itau pujatsuash, tusa tinaiti. Takai nita chichainak chikichik nuwa yaakat Endornum pujawai tiaruiti.

⁸ Tuinakai Saúl nekarawaraig tusa chikichan jaanchin nugkuruiti. Tuma nina inatairin jimaran juki, nuwan aujsattsa wuwaiti. Tuma jeaa nuwan chicharuk: Wait aneasam shuar jakaun wakani wii takai untsutrukta, tusa tinaiti.

⁹ Takai nuwa ayak: Saúl ju yaakta juiyan enentaimas nekamin ainan, jakau aina wakanin untsuk nekau ainan jiir ishiakua nuka ameka nekame. Tumau aisha, ¿urukamtai wina makurmaincha tusha wekame? tusa tinaiti.

¹⁰ Takai Saúl Yuusa naari pachisan tajame: “Ashamkartukaipa. ¡Yuus pujawai!, aminka iturchatka pegkesha atsurtamtatui”, tusa tinaiti.

¹¹ Takai nuwa ayak: Turasha yana wakanin untsukti tusamea wakeram, tusa tinaiti. Takai Samuela wakani untsukta, tusa tinaiti.

¹² Takai Samuelan wakanin untsuk wainak, sapijmak senchi chichaak: “¡Ameka Saúlaitme! ¡urukamtai winasha tsanuram!” tusa tinaiti.

¹³ Takai Saúl chicharuk: Ashamkartukaipa ¿yana wakani wainkaume? tusa tinaiti. Takai nuwa ayak: Chikichik shuar jakau wakanin nugkaya jinun wainkajai, tusa tinaiti.

¹⁴ Takai Saúl nuwan chicharuk: ¿Uruku iimtinaita? takai ni ayak: Chikichik shuar uuntach jaanch asarman nugkuaru nugkaya jinun wainkajai, tusa tinaiti. Tama Saúl nunaka Samuelan wakanin wainkampa tawa tu enentaimrauwaiti. Tumak eme anentas iiyak tikishmar pujus nugka antiastatuk tsuntsumawaiti.

¹⁵ Tumakai Samuel Saúlan chicharuk: ¿Urukamtai winasha taati tusamsha waitkarsaume? tusa tinaiti. Tama Saúl chicharuk: Filisteo aina israelita ainatijai maanikartasa wakeruina asarmatai, sapijmakun yáki nepetmakat nuna pachis ujatkati, tusan Yuusan aujsamjai. Turamsha karanmagsha ujatkachmayi. Nuiyasha Yuusa chichamen etserin ainasha ujatkacharai. Tuma asamtai, wisha warina nutikmainaitja ni turutti tusan amina untsukjame, tusa tinaiti.

¹⁶ Takai Samuel Saúlan chicharuk: Ame chichame umirkachmau asa, Yuus kajertamak inaitamsa aisha ¿winasha urukamtai inintsattsamsha untsurkaume?

¹⁷ Yuus amina inaitamsamtai, wii nuna pachisan amina ujakmiajme. Yuus nuna umiak ame apuitam nunaka inaitamuk amina amikrumin apu atii tusa Davidtan anaikauwaiti.

¹⁸ Junaka amalecita aina ashi ijinatarma tusa tamaitiatam, Yuus nina chichame metek umirkachmau asa Yuus inaitamsayi, tusa tinaiti.

¹⁹ Turutma asamtai filisteo aina kashin aminka uchirmijai mantamawartatui. Tura nuiyasha filisteo aina israelita ainan nepetkarti tusa Yuus inaitamsayi, tusa tinaiti.

²⁰ Tama Saúl yurumkan yutsuk weká asa, nuna antuk senchi kurak kakaarchamnau nekapeak nugkanam iyaan tepesuiti.

²¹ Tumamtai nuwa nekamin jeari Saúlan chicharuk: “Apu wina iturchat amainan nekayatnak, ame seatu asaakmin nunaka metek umikjai” tusa tinaiti.

²² Tuma asamtai wait aneasam wii titatjam nu umikta: “Yurumak ishichkisha yuata, tumam ichichmamram wetá” tusa tinaiti.

²³ Tamaitiat yurumka yutancha nakita. Tumakai suntara apuri aina tura nuwa iwishnujai iruunturar nukape chicharainak: Wait aneasam ishichkisha yurumak yuata tusa imatram nantaki peaknum ekeemsauwaiti.

²⁴ Tumai nuwa chikichik vaca aishmag tsakatan nuwerman iis maawaiti. Tura nuiyasha tortan inartuktasa harinan levadurajai pachimtsuk naneruiti.

²⁵ Tura inaraa Saúlan nina suntarijaimak yuati tusa susauwaiti. Tuma nuna yuawar nu kashitinig nita aakrin wakettraruiti.