1 Samuel 24 - New Testament with Old Testament portions

David apu Saúlan tsagkuuramu

¹ Chikichik tsawantin Saúl nina suntaari ainajai filisteo ainan patatuk waketun Davidka En-gadi aya nugkanmag pujawai, tusa ujakaruiti.

² Tura Saúl ashi Israel shuar ainan etegkar tres mil suntar ainan yaruak Davidtan eak wuwaiti.

³ Tuma jea ijatmartasa muchig wanam Saúl wayawaiti. Turasha David nina patai ainajai wayaa pujamunam nekachu asa, nu wanam wayawaiti.

⁴ Tumamtai Davidtan chicharainak: Yuus amina shuarum aina nepetin atinaitme tusa turamin asa, Saúlan maati tusa tsagkattramkayi, tura asamtai maata tusar tiaruiti. Tamaitiat David kuchiin juki Saúlan yaitamtaik jeari jaanchri yantamen tsupirak juruknaiti.

⁵ Nuna turasha pegkerchauna aitkaja tu enentaimrauwaiti.

⁶ Tuma asa ni weantu ainan ishishmas chicharuk: “Apu atii tusa Yuus etegkamua nunaka wika maamaitsujai”, tusa tinaiti.

⁷ Tusa David ni weantu ainan, Saúl maawairpa, tusa tinaiti. Tura nigka nekamatsuk waanmaya jiinki wuwaiti.

⁸ Tumamtai Davidcha ishichik arus wanmaya jiinki Saúlan chicharuk: “¡Wina apuru! ¡wina apuru! tusa tinaiti. Takai Saúl ayanma iiyajkama, eme anentak tsuntsumaa nugkan nijaijai antiastatuk pujuttamaun Davidtan wainkauwaiti.

⁹ Tuma chicharuk apuru, shuar aina wina pachittsar mantamattsa wakerawai tusa ujatmainakaisha ¿urukamtai nekas mantuashtimpash tusha enentaimam?

¹⁰ Wii pujamunam Yuus amina akuptamkaum nuka nekame. Wii enentaimsan nekas Yuusapi apu atii tusa etegkawaita tu enentaimta asan maatsuk tsagkuraujme, tusa tinaiti.

¹¹ Wii takakaj ju shir iista, junaka amina jaanchrumin tsupikan jukijai. Wii amina nekas maattsan wakeraknaka, maamain ayatnak nuna nakita asan maachjame. Wii amina maattsan wakeratsuj nu nekata. Turasha apu ame wina mantuattsam wakerutame.

¹² Apu wika aminka pegkesha maashtinaitjame. Tuma asamtai ii jimaraitaj nunaka yainig iturchatcha a nunaka Yuus turamtaji, ame wina mantuattsa wakeruta asaakmin Yuus waittan amasti”, tusa tinaiti.

¹³ Yaunchuk chicham timau awai: “Shuar pegkerchauka pegkerchaunak takáwai, tuma asamtai wika pegkerchauka aminka amajmaitsujme.

¹⁴ Wika yawa maamua numamtinaitjai, tura sugkuwa numamtinaitjai, tumau aisha urukamtai Israel shuar ainan apuriyaitkumsha wina maantuattsamsha pataturusha wekam. Ani wekamainchau wekame, tusa tinaiti.

¹⁵ Ii jimaraitaj nunaka yainig pegkerchausha a winimpash tachaksha aminimpash a nunaka Yuus turamtaji. Tura ni wina takatrun iirtus ame wina mantuataj tame nunasha ayamturkati”, tusa tinaiti.

¹⁶ Tu chichas David inagnakmatai Saúl útnaiti. Tuma Davidtan chicharuk: Uchiru, ameka pegker asam wii maattsa wakeramsha mantuachume.

¹⁷ Tura nuiyasha Davidtan chicharuk: “Ame wii maattsa patatukmaitiatam pegkernum chichartukume. Tura ame tame nuka nekasa nu tame.

¹⁸ Yamai ame pegkernum wina yaintam nu nekamtikruame. Yuus maati ta aig wina mantuachume.

¹⁹ Nekasaiti, shuar nina shuarin wainkugka pegkerchau amajin ainawai. Tuma asamtai ame wina wait anentruru asaakmin Yuus amincha pegkernum yainmakti tajame.

²⁰ Tuma asan wika nekajai ame yamaika Israel shuar ainan apurigka atatme.

²¹ Tumatin asam wii weantu aina nuna naari ainancha asakarchattajai, tura nuna uchiri ainancha ijinashtatjai tusam, Yuusa naari pachisam turutta”, tusa tinaiti.

²² Tusa tama Yuusa naarin pachis David tinaiti. Tusa timatai Saúl nina pujusa inamtairin waketkinaiti. Tura Davidcha ni shuar ainajai muchig wa pegker umikmaunam pujustasa wuwaiti.