1 Samuel 15 - New Testament with Old Testament portions

Apu Saúl chichaman metek umikchamtai jiikmau

¹ Chikich tsawantin Samuel Saúlan chicharuk: “Yuus wii etegkamu israelita aina nuna apuri atinan amina anaikati tusa akuptukai. Tuma asamtai Yuus turammaun wii titatjam nu shir antukta.

² Yuus ashi senchirtina nu chichartamuk: Atumin uuntri ainan Egipto nugkanam matsatun jiiruitjai, turam jinta wininan Amalec aina waitkasaru asarmatai wii waittan susartatjai.

³ Tuma asamtai amina suntarumjai amalecita aina waríri tsairatarma. Turakrum wait anentsuk aishmag aina, nuwa aina, uchi aina, yama uchi akina aina, tagkuri vaca aishmag aina, oveja aina, camello aina, burro ainajaimak ashi ijinatarma tusa turammayi” tinaiti.

⁴ Tutai Saúl suntar ainan chichaman etserkartinan akuprauwaiti. Turam shuar aina nuna antukar Telaim iruuntramtai nawek yujasar maanin aina nekapmaram doscientos mil shuar ajakaruiti. Tura Judá weantunmaya diez mil suntar ajakuiti.

⁵ Tuma nui Saúl nina suntaari ainan yaruak yaakat uun amalecitanu ajakua nui we, entsa amaunam uumak pujusar amalecita aina pachiachmau utsaantua maaniami tusa tumawaiti.

⁶ Nui matsamas Saúl quenita ainan chichaman etserin ainan akuptukuiti. Turam jeawar quenita ainan ujainak: ¡Amalecita ainajai iruuntrarum matsatrum nuka nitajai metek ijinam aij takurmeka jiintrarum shiaktarma! atum ainatiram israelita aina Egiptonam matsatu jiintrar winina wait anentrau ainarme. Tusa ujakam amalecita ainanum matsatu quenita ainaka jiintrar shiakaruiti.

⁷ Tumawarmatai Saúl nugka Havilanam nagkama amalecita ainan maa maakua Shur nugkanam Egipto nugke nagkatkamunam ejéniar ashi ijinawaiti.

⁸ Tura ashi ijina nuna apurin Agag ajakua nuna achikuiti.

⁹ Turasha amalecita ainan apurinka maachuiti. Nuiyasha tagku nuweram pegker ainanka maatsuk yarumuk, warí ainancha turusag pegker ainanka ekeematsuk yaruakuiti.

¹⁰ Turawarmatai Yuus Samuelan chicharuk:

¹¹ Saúlnaka apu anaimainchau amajkauwaitjai, wina chichamrun umitsuk ni wakeramun takáwai, takai Samuel kajek kuntuts enentaimuk, Saúl tsagkurata tusa kanutsuk Yuusan au aujkauwa tsawaruiti.

¹² Tuma káshikmas Saúl pujamunam wuwaiti. Turasha chikichik shuar Samuelan chicharuk: Saúlka yaakat Carmel wemayi. Tuma nui kayan esarman awajamayi nunaka shuar aina iisar Saúlka eme anentsa iitaimpa ajakuita tu enentaimturiarti tusa turawaiti, nuna tura ikuak yaakat Guilgal wemayi tusa ujakuiti.

¹³ Turam Samuel, Saúl pujamunam we jeawaiti. Tuma Saúl Samuelan chicharuk: Yuus turata tusa timaunka metek umikmajai, tura asamtai amincha Yuus pegkernum yainmakti, tusa tinaiti.

¹⁴ Takai Samuel Saúlan chicharuk: Yuus turata tusa timau metek umikum aisha ¿tuiyampa oveja aina, vaca aishmag ainasha chichainawa? tusa tinaiti.

¹⁵ Takai Saúl ayak: Suntar aina chichainak, ina Yuusri eme anentsa iiyakur tagku pegker nuweram aina juka maar epeatin jukimi tusar turutainakai, tagku pegker nuweram ainanka maatsuk yaruakmajai. Turasha chikich tagku ainaka ashi ijinamji, tusa tinaiti.

¹⁶ Takai Samuel ayak: “¡Itatkata! Yuus yamai káshi turuti nuna ujaktajme”, tusa tinaiti. Takai Saúl ayak: Ujatkata, tusa tinaiti.

¹⁷ Takai Samuel chicharuk: Yaunchukka ameka shuar imanchau aminig Yuus israelita ainan apuri atii tusa etegtamawaiti.

¹⁸ Tura nuiyasha Amalec shuar aina tunaun takau aina nuna ijinati tusa Yuus akuptamkauwaiti.

¹⁹ Turutma aisha ¿urukamtai Yuus timau umiskesha amina suntar aina tagku yaruakmi takai umiakmesha yaruaktarma tusamsha timame? nu tura asam Yuus pegkerchau takarsaume, tusa tinaiti.

²⁰ Tutai Saúl Samuelan ayak: Wika Yuusa umiru asan, ni turutmaunka metek umiakun, Amalec ainan apurin achikan itajai. Tura nuiyasha Amalec shuar ainanka ashi ijinamjai.

²¹ Antsu suntar aina oveja nuweram aina, vaca aishmag nuweram ainasha ijinami tamaunak yaakat Guilgalnum maar epeakur amina Yuusrum eme anentsa iiyakur tagku aina maar epeakur nuna namagke ajamnaisami tusa yaruakarmayi, tusa tinaiti.

²² Tama Samuel Saúlan chicharuk: Tagku maa epeamu tura nuna namagke ajamnaiyamua nuna nagkasau Yuusan shir amajea nuka, Yuus umiktarma timauwa nu metek umiamua nuwaiti.

²³ Iwishin aina, yuusrimamu najanamun emematin aina, nigki emematmamin aina nujai metek Yuusa chichame umirkachu asam tunau takasume. Amesha numamtuk nina chichame umirkachmau asa, yamaika ame apuitam nunaka inaitamsayi, tusa tinaiti.

²⁴ Tama Saúl Samuelan chicharuk: Shuar ainan ashamakun nita chichamen umiakun, Yuus turata tusa timaun umikchau asan, tunaun takasjai, tusa tinaiti.

²⁵ Turasha wait aneasam wina tunaursha tsagkurturta, turutawakmin ijai weri Yuus emematmi, tusa tinaiti.

²⁶ Takai Samuel Saúlan chicharuk: Yuusa chichame umirkachu asaakmin amijaigka wechattajai. Tuma asaakmin Yuus aminka apu achati tusa turamui tinaiti.

²⁷ Tusa titatmaun Saúl jaanchnum achik emeta jarkauwaiti.

²⁸ Turam Samuel Saúlan chicharuk: Ame wina jaanchur jakum numamtuk, Yuus amincha Israel shuar ainan apuri jasam pujam nuna jiirmaktatui. Chikich israelita shuar chichaman umin puja nu yamaika apu atii, tusa Yuus tawai.

²⁹ Yuuska shuar ainati ii chichakmausha metek umichu ainaj tumauchauwaiti. Iman asa ni timaurinka yapajimaitsui, tusa tinaiti.

³⁰ Tama Saúl ataksha chichaak: Wii tunaun takasu akaisha, wait aneasam apu aina emtin, Israel shuar aina emtincha eme anentrusam apujai metek iirsata. Tura nui ijai weri Guilgalnum amina Yuusrum emematmi, tusa tinaiti.

³¹ Tama Samuel Saúljai Yuus ememattasa iruuntai jeanam wayaa Yuusan emematnaiti.

³² Tumamtai Samuel chichaak: Agag Amalec shuar aina apuri achikam jui itartitarma, tusa tinaiti. Takai Agag enentaimas yaunchukeapi mantumain amajtukaruita. Turasha yamaika mantumain ainatsuapi tu enentaimas shir aneas Samuel pujamunam jeawaiti.

³³ Tumamtai Samuel chicharuk: Amina kuchiirmijai ina suntaari aina ijina asaakmin nukap nuwa aina uchirtinchau juakarai. Tura asaakmin amincha maattajme, turamtai amina nukusha nu nuwa ainajai metek uchirmachu juaktatui. Tusa Yuus timauwa turusag umiak yaakat Guilgalnum kuchiijai maawaiti.

³⁴ Tuma Samuel nina jeen yaakat Ramánam waketkinaiti. Tura Saúlsha nina jeen yaakat Gabaanum waketkinaiti.

³⁵ Tumamtai Samuel, Saúlan atak awenagka wainkachuiti. Turasha Samuel Saúlan enentaimtus wake mesemar nekapuk utujakuiti. Tumasag Yuus Saúlan Israel shuar ainan apuri atii tusa anaikau asa wake mesemar nekapu.