1 Samuel 14 - New Testament with Old Testament portions

¹ Chikichik tsawantin Saúla uchiri Jonatán, aparin ujatsuk nina amikrin chicharuk: Entsa amain yantam katigkar filisteo ainajai maaniami, tusa tinaiti.

² Turasha nina apari Saúlka Gabaanum yaakat Migrón ajakua nui, munchi irunmaunam nuna wakentin seiscientos shuar iruunar matsataina.

³ Tura sacerdote Ahías tutai Yuusan emematuk yaakat Silonam Saúljai pujujakuiti. Nu sacerdoteka nugkutai linojai najanamun efod tutain takaku ajakuiti. Tura Ahíaska Icabodtan yachi Aitob ajakua nuna uchiri ajakuiti. Antsu nina apachrigka Elí uchiri Finees ajakuiti. Israelita aina Jonatán nina amikrijai wuwa nunaka chikichkiksha nekacharu ainawai.

⁴ Tura Jonatán nina amikrijai filisteo aina matsatmaunam weena. Nita wenamunam kaya uun Bosés tutai akamainchaunam, tura Senéjai iinias amaunam jeawaiti.

⁵ Yama nagkamchak kaya Bosés tutaiya nui iiyamka nujinmani yaakat Micmásnum iinias ajakuiti. Tura chikich kaya sené tutaiya nui iiyamka nugkani yaakat Gabaanum iinias ajakuiti.

⁶ Nui wesa Jonatán amikrin chicharuk: Amain katigkar shuar pegkerchaun takau aina aujai nukapchau akurincha tura ishichik akurincha Yuus yainmasmatai nepetmainaitjai.

⁷ Tutai nina amikri ayak: Ame turattsa enentaimmauka metek umikta. Wika ame turutmaunak umiktasan wakerajai, tusa tinaiti.

⁸ Takai Jonatán chicharuk: Wemi, amain katigkar filisteo aina jeari wantintukmi.

⁹ Tumarin nita chichainak: ¡Nuig nakamsatarma! Ii taattaji tusa tuinakaigka, wetsuk nuig wajasar nakastatji.

¹⁰ Turasha taatarma tusa turamkaigka wetatji. Tura Yuusapi nita shuarin nepetkarti tusa iwainawa tusar nui nekattaji.

¹¹ Tusar mai wear akararu ainawai. Tumainan nitan wainak chichainak: “Hebreo shuar aina waanam matsatu jiintrara au iistarma” tusar tuina.

¹² Tuina asar Jonatánkan tura nina inatairijai tukeneas wishikaina asar untsuinak: “Jui taatarma, tumawakrumin uruk maanitaigkit nuna jintintatjarme” tusa tinaiti. Tuinakai Jonatán nina amikrin chicharuk: “Wii emka weakai ukunam winita, Yuus ina nitan nepetak ijinati tusa tsagkattramkaji”, tusa tinaiti.

¹³ Tusa Jonatán nina amikrijai achimki wakauwaiti. Tuma jea filisteo ainan kuchiijai iju nugka nagkimu, turakai nina amikri nagkirijai iju maa.

¹⁴ Jonatán nina amikrijai yama nagkamchak maaniawa nuigka ju chichamaik veinte shuaran maawaiti.

¹⁵ Filisteo aina jea matsataina, tura nuiyasha maanin aina eemak wenasha nekawar ashamkaruiti. Tura nuiyasha nugka senchi urkamtai filisteo aina shir senchi ashamkaruiti.

¹⁶ Nu tuman ashamak tsekenak mai pachimnaiya jainan Saúla suntaari aina Benjamínka nugkeen yaakat Gabaan kuitamuk matsataina wainkaruiti.

¹⁷ Tuma Saúl nina suntaari ainan chicharuk: Suntar aina ashiyash matsataina iistarma, tusa tinaiti. Tusa tuinam ashi iiyamunam Jonatán nina amikrijai atsaun wainkaruiti.

¹⁸ Tuma asamtai Saúl Ahíasan chicharuk: Yuus iniasa nekatai efod achiakam nu itata, tusa tinaiti. Israelita aina matsatmaunam au asamtai nunaka tinaiti.

¹⁹ Saúl sacerdote Ahíasjai chichaak wajai, nu nagkamas filisteo aina pachimnaik shir senchi chichaina. Imatainakai Saúl sacerdote Ahíasan chicharuk: “Efodka itawaipa” tusa tinaiti.

²⁰ Tuma Saúl nina suntaari ainajai iruuntrauwaiti filisteo ainajai maaniattsa. Tuma jea iikma filisteo aina nita shuarak pempentunaiki maaninak amunian wainkauwaiti.

²¹ Tumainai hebreo aina yaunchuk filisteo ainajai matsamin ajaku aina tsekearar shiakar, Saúl nina suntarijai matsatmaunam, Jonatán nina suntarijai matsatmaunam shiakar nitajai iruuntrar matsamsaruiti.

²² Tura chikich israelita aina ashamkartuinak Efraínka nugkeen umkar matsatainasha, filisteo aina tsekenawai tamaun antukar nitasha filisteojai maaniattsa patatukaruiti.

²³ Tura patatuk mai mainakua Bet-avén ejéniaruiti. Nu tsawantin Yuus israelita ainan tu ayamruk agkanmamtikawaiti.

Saúl maaniamu nagkanchamunan suntar yurumkan yuaka mantamnati timau

²⁴ Israelita aina yutain yutsuk maaniawaru asa shir senchi pimpikiaru ainawai, tumainakai shuar aina umiktinan Saúl chichaak: Ina shuari nepetchamunam yurumkan yuaka mantamnati, tusa tinaiti.

²⁵ Turasha nu tsawantin maaniamunam yujasar napa irunmaunam israelita aina jeawaruiti.

²⁶ Tura nuna napa yumirin shir nukap aun wainkarsha Saúl timaun ashamaina asar ishichkisha nekapsacharuiti.

²⁷ Antsu Jonatán nigka apari timaun antukchau asa, ushukrutai achiakmaurijai napa sanun antig ishichik nukawaiti. Tura pimpiki wekamurinka kakaram juakuiti.

²⁸ Tura nuiya chikichik suntar chicharuk: Amina apa chichaman umiak: Maanit tsawanta jui chikichik shuarkesha yurumkan yuaka maantamnati tinu asamtai tsukamakrisha pegke yuatsji, tuma asar pimpikji, tusa tinaiti.

²⁹ Takai Jonatán chichaak: Wina aparka nunaka tumainan tatsui. Wika pimpiki weká juna ishichik napa yumirin nukaan kakaram jasjai, tusa tinaiti.

³⁰ Tura chikich israelita aina nita shuarin nepetkar yutain atankiarua nuna yuawarka nitasha kakaram jamain jasarai. Tumawaru ainakaigka filisteo ainaka wári ijinmain amajkaji, tusa tinaiti.

³¹ Nu tsawantin israelita aina, filisteo ainan mai mainakua yaakat Micmás nagkama yaakat Aialónnum ejéniaruiti. Turasha shir senchi pimpikiaru ainawai.

³² Tumaina asar filisteo tagkuri maaniamunam yarutkamu ainan tsukamainak oveja ainan, vaca ainan, vaca aishmag tsakat ainan maawar namagken numpentuk yuawaruiti.

³³ Tumainakai chikichik shuar Saúlan jeari chicharuk: Shuar aina Yuusan tunaun takarainak namagken numpentuk yuinawai, tusa tinaiti. Takai Saúl chichaak: ¡Atumka Yuus timauwa nuka umikchaurme! Tuma asarum kaya uun akagkekrum itartitarma, tusa tinaiti.

³⁴ Tusa nuiyasha Saúl chichaak: Ashi israelita aina ujaktarma, vaca aishmag, turachkusha ovejan itawar ju kaya uun puja jui maawarti. Tura numpe sanki ashi utsankamtai yuawarti. Nuna turuinakaigka Yuus nita tunaurinka tsagkurartatui, tusa tinaiti. Takai nu káshia nui vaca aishmagkun jukiar kaya uun pujamunam ejéniar nui patainiar maawaru ainawai.

³⁵ Turawarmatai Yuus eme anentsa iiyakur tagku aina maa patasa epeatnun najanchau Saúl nuna najanawaiti.

³⁶ Tura Saúl israelita ainan chicharuk: Filisteo ju káshia jui mai mainakuar chikichkiksha iwáku ujukashmi turakur waríri ainasha yarurkarmi, tusa tinaiti. Takai nita aimainak: “Ame wakeramu tame nuka imanisag uminkati, tusa tuina. Tuinakai sacerdote chichaak: Yamai nagkamchakrika Yuus iniasmi”, tusa tinaiti.

³⁷ Takai Saúl Yuusan iniak: ¿Filisteo ainajaisha maaniattsa wemainkait? ¿Tura filisteo ainajai maaniati tusamsha yaigkratmainkaitam? tusa tinaiti. Turasha Yuus nu tsawanta nuigka aikchauwaiti.

³⁸ Turamu asa Saúl suntara apuri ainan chicharuk: “Shuar tunaun takasu asamtai Yuus airkachai” tusa tinaiti.

³⁹ Israel shuar ainatin Yuus ayamrutmauwa nuna naari pachisan tajai: Shuar tunaun takasuka mantamnati. Tura ¡wina uchir Jonatánkesha tunaun takasu akusha mantamnati! tusa tinaiti. Takai suntar aina chikichkiksha aimkacharuiti.

⁴⁰ Tuma asamtai Saúl shuar ainan chicharainak: Atum ainatiram kaunkarum ju yantam iruuntratarma. Tura wika uchir Jonatánjai chikich yantamnum wajastajai, tusa tinaiti. Takai suntar aina chichainak: Ame tame nunisag uminkati, tusa tiaruiti.

⁴¹ Tuinakai Saúl Yuusan chicharuk: Ina Yuusriya, ¿urukamtai amina inatairam aujtamkaisha yamaisha aikchaume? Sacerdote kayan egkea jiikti, nu turamunam wii tunau takasmau akaigka, turachkusha wina uchir Jonatán tunaun takasu akaigka kaya Urim tutai jinti, tura Israel shuar aina tunaun takasaru akaigka kaya Tumin tutain jittawai, tusa tinaiti. Turamunam kaya Urim tutai jinnaiti. Tumamtai israelita ainaka agkan makumamainchau juakaruiti.

⁴² Tura Saúl chichaak: “Yamaika wina uchir Jonatánjai nekaprusta” tusa tinaiti. Tura nekapeam Jonatánnau timau kayan jiiknaiti.

⁴³ Tumamtai Saúl Jonatánkan chicharuk: “Wari takasum nu ujatkata” tusa tinaiti. Tutai Jonatán ayak: Ushukrutairjai nuna tsakarin napa yumirin antikan ishichik nukaamjai. Turasha ¿ima nu turamunmag mantamnattaj? tusa tinaiti.

⁴⁴ Takai Saúl ayak: ¡Jonatánka ame mantamnashkuminka Yuus wina mantuati! tusa tinaiti.

⁴⁵ Takai Israel shuar aina Saúlan chicharainak: ¡Jonatán ina shuarin filisteo ainajai maniamunam nepetka, tumaig mantamnatta! Yuusa naari pachisan tajai: Ninka chikichik pegkerchauksha nagkasashtatui. Yuus yayasam nepetmak ayamrukmau asar, tiaru ainawai. Saúl mantamnamainnum tu ayamrukaru ainawai.

⁴⁶ Tura Saúl, filisteo ainajai maanitnaka inaisaruiti. Tumawarmatai filisteo aina nita jeen wakettraruiti.

⁴⁷ Tu nepetmak Saúl Israel shuar ainan apuri jas inamrauwaiti. Tuma Moabnumia ainan, Amónnumia ainan, Edonnumia ainan, Sobánmaya apun tura filisteo ainancha nepetkauwaiti. Saúl nina shuarijai maaniakka tuke nepetujakuiti.

⁴⁸ Saúl nina suntaari ainan irumar Amalec shuar ainajai maaniak ijinawaiti. Israel shuar aina kasaram matsatun tu agkanmamtikkauwaiti.

⁴⁹ Saúlan uchiri aishmag ainaka: Jonatán, Isví tura Malqui-Suá. Tura nawantrigka ju ainawai: Iwairigka Merab, tura chikichka Mical ajakuiti.

⁵⁰ Saúla nuwegka Ahinoam, Ahimaasa nawantri ajakuiti. Tura nina suntaari apurigka Abner nina apari yachi Neran uchiri ajakuiti.

⁵¹ Saúla apari Quis ajakua nuka Abneran apari ajakua nujai Abielan uchiri ajaku ainawai.

⁵² Saúl apu pujus Israel shuar ainan inajakua nuigka filisteo ainajai shir senchi maanijakuiti. Tumau asa nigka nina suntaari maanitan yacha aina nujai shir uminas pujujakuiti.