1 Samuel 12 - New Testament with Old Testament portions

Samuel Saúlan ame inamrata timau

¹ Samuel ashi israelita ainan chicharuk: Ashi atum seatmaunka turusnak umiakun atumi apuri atinnasha anaitukjarme.

² Tuma asamtai yamaika atumi apuri inatmartatrume. Wika uuntach jasu asan jemperurjai, tura wina uchir ainaka atumjai matsatainawai. Wika natsa asan nagkaman atumi apuri jasan taká takakuan tsawantan yamai ejéjai.

³ Wii atumin tagkuri aina jurukmau akurmeka, tura wii waitkasmau akurmeka, tura chicham iwarturata tusa akirkau akurmeka yamai Yuusa emtin, tura atumi apurin etegkamua nuna emtin wii pegkerchau takasu akaigka turuttarma, tusa tinaiti.

⁴ Takai nita aimainak: Inka pegkesha waittaka sukartuschauwaitme, tura chikichkiksha kasarkachuitme, tura chichaman iwarturati tusamkesha chikichkiksha kuitka sea jakchauwaitme, tusa tuina.

⁵ Tusa tuinakai Samuel chichaak: Yamaika Yuusa emtin tura apu etegkamua nuna emtin wina iturchatur amaina nuka pegkesha wainkachurme, tusa tinaiti. Takai nita aimainak ame tame nuka nekasaiti, tusa tuina.

⁶ Nuiyasha Samuel israelita ainan chicharuk: Egiptonmaya aina atumi uuntri aina waitkam matsatun Yuus Moisésan tura Aarónjai akuptuk jiirua nusha nekawai.

⁷ Atum ima Yuusak nekaspapita tusarum umirtsuk atumi apuri atin seameakrum tunau takasu ainarum nuna nekamtikattajrume. Tura atumin uuntri ajaku ainan Yuus uwemtikattsa turawa nuna yamai nekamtikattajrume.

⁸ Jacob nina patai ainajai Egipto nugkanam jeawar matsamsarmatai, nuiya shuar aina senchi waitkainam Yuusa yainkratkata tusar aujsaru ainawai. Tumainakai Yuus antuk Moisésan tura Aarónjai akuptukuiti. Turamtai ina uuntri ainan jiir ju nugkanam ikaunmawaiti.

⁹ Turamaitiat nita Yuusri umirtanka inaisaruiti. Tumawarmatai nita shuari aina maaniamunam nepetkarti tusa Yuus timau asa Jabín Hasoran apuri ajakua nu nina suntaari ainajai. Tura filisteo aina, Moabnumia shuar aina nu maaniamunam nepetkau ainawai.

¹⁰ Turawaram Yuusan aujainak: Baal najanamu, tura Astarté najanamusha emematkur tunau takasji. Wait aneasam ina shuari waitkarmaina nu nepetkam yaigkratkata. Turukratawakmin ame wakeramua nuke umiktaji, tusar tuina.

¹¹ Nuna tuinakai Yuus Jerobaalan, Barackan, Jeftén tura wina Samuelan nita shuari ainan nepettukar agkanmamtikawarti tusa akupturmakuitrume. Tu ayamrukmau asar ina uuntri ainaka shir matsamajakaru ainawai. Tura yamai atumsha nukap tsawan atumi shuari waitkascham agkan matsatrume.

¹² Atumi Yuusri nekayatrum, amonita aina apuri Nahas atumjai maaniatjai takai antukrum, atumek isha apurtin ami turam ni ayamrutmaktaji tusarum tinaitrume.

¹³ Atumi apuri atin seamuitrum nuna, Yuus yamai atumin suramsaurme.

¹⁴ Tuma asamtai yamai atumi apurijai umiktatrum nuka juwaiti: Yuusa nuke eme anentsa iiyakrum nigki umirkatarma. Tumakrumka pegker pujustatrume.

¹⁵ Turasha ni umiktarum turammau umitsuk inaiyakruminka Yuus atumin tura atumi apurijai waittan amastinaitrume.

¹⁶ Tuma asamtai shir matsamsatarma, Yuus atum ainatirmin wainchatai ainan nina senchirin iwainamu wainkattarme.

¹⁷ Tura yamai tsawan aina nuka trigo juut asamtai yumi yutatsu nuka nekarme. Nu tuma asamtai nuna pachisan Yuusan wii aujsamtai, ni ipamtajai yumin yutumtikattawai. Turamtai atum ainatiram apu seamuitrum nu Yuus iismaka pegkerchau turawaitrum nu nekattarme, tusa tinaiti.

¹⁸ Nuna tusa Samuel Yuusan aujsauwaiti. Turam Yuus ipamtan, tura yumijai akupkauwaiti. Turamtai shuar aina tura Samuelsha Yuusan ashamkaruiti.

¹⁹ Tumaina asar shuar aina Samuelan chicharainak: Jinawaij tusar ashamainaji. Amina Yuusrum aujsata. Ina apuri atin seama wekasar nu nukap tunau jasji, tusar tuina.

²⁰ Tuinakai Samuel nitan chicharuk: Ashamkairpa. Atum nekas shir pegkerchau takasurme. Turasha yamaika Yuus umirtaka inaisairpa, nuka tumatsuk ima nigki umirkurum ememattarma.

²¹ Yuusrimattsa najanamu atumin uwemtikramainchauwa nuka umiriajai tusarmeka pegkesha emematmaitsurme.

²² Yuus winau arti tusa etegtamrau asa, ima nigki umirmaka inaitamsashtatrume.

²³ Tura wii atumin Yuusan pachisan aujchaknaka Yuusan tunaun takarkun tumamainaitjai. Tura asamtai pegker pujusar Yuus umirmaina nuna pachisan jintintattajrum nuka juwaiti:

²⁴ Yuus atumin pegkernum yainmaku asamtai, ima nigki enentaimtusrum ememattarma.

²⁵ Antsu pegkerchauwa nuke inaitsuk taká pujakrumka atumi apurijaigki waitat suam atatrume tusa Samuel israelita ainan tinaiti.