1 Reyes 8 - New Testament with Old Testament portions

Arcan jukiar Yuus ememattasa iruuntai jeanam awayamu

¹ Yuus ememattasa iruuntai jean umikaru asarmatai, chikich tsawantin Davidtan yaaktarin Siónnum arca au asamtai, Salomón jukittsa chiki chikichik tribu ainan apurin, tura nui shuar eme anentsa iitai aina pujuinancha ipaa yaakat Jerusalénnum irumrauwaiti.

² Nu iruuntraru aina nuka Etaim nantutin israelita aina aak aakmarmau tsawam jeau asamtai, nuna enentaimtus jiistamawartasa ashi israelita aina apu Salomón pujamunam iruuntrauwaiti.

³ Nu iruunmaunam Israel shuar ainan apuri kaunkaruiti. Tura sacerdote aina arcan yanakiaruiti.

⁴ Turawar sacerdote aina arcan jukiaruiti. Leví weantu aina Yuus ememattasa iruuntai jean juinak Yuus emematku takatai ainan jukiar Yuus timaunka turusag umikaruiti.

⁵ Turawarmatai apu Salomón ashi israelita ainan arca pujamunam irumrauwaiti. Tura oveja ainan, vaca aishmag ainan nekapmakrisha ejémainchaun maa yuawaruiti.

⁶ Tura inagnakmatai sacerdote aina Yuus, chichaman umikua nu egkeamun arcan jukiar, Yuus ememattasa iruuntai jeanam tesamu shir Pegker tutainam querubín jimar najanamu pujamunam nuna nanape wakenmarin apujsaru ainawai.

⁷ Nu querubín ainaka arca pujamunmani nanape ainan takuiniar ajakaruiti. Tuma asar arca juaku númi wearkamuncha nukuk ajakaruiti.

⁸ Turasha nuna numirigka esaram asa paan wantinak ajakuiti. Tumau asa aa wajasa iiyam paan wantinchaksha jea tesamu Pegker tutainam wajasa iiyamka paan wantinak ajakuiti. Nuka yamaikisha nunisag awai.

⁹ Nu arcanmagka israelita ainan, Egipto nugkanam pujuinan jiir mura Horebnum, Yuus nitajai chichaman umik jimar kaya pakama najanamunam aar Moisésan susauwa nuke egkemajakuiti.

¹⁰ Sacerdote aina arcan awayawar Yuus ememattasa iruuntai jeanam matsatu jiintraruiti. Tumawarmatai Yuus ememattasa iruuntai jeanam yuragkim utsaantrauwaiti.

¹¹ Tumamtai Yuusa senchiri tsaaptin jas au asamtai, sacerdote aina Yuus ememattasa iruuntai jeanam nita takatin takaschau ainawai.

Salomón juka Yuus ememattasa iruuntai jea atii tusa pegkernum chicharkamu

¹² Tuma asamtai Salomón chichaak: “Yuusa ameka yuragkim káshi jasmaunmasha pujumainaitjai tusam tinaitme.

¹³ Turasha ame pujustinan jean wii jeamrukjame, nu jeanmagka ame tuke pujustinaitme”, tusa tinaiti.

¹⁴ Nuna tusa apu Salomón israelita aina iruunar matsatun nitan iis pegkernum chicharkauwaiti.

¹⁵ Tura chichaak: “Israel shuar ainan Yuusriya, wina apar Davidtan anajmatawa nuna metek umika nu chichaak:

¹⁶ Israel shuar ainan Egipto nugkanam pujuinan jiiruitaj nui nagkamsan wina jear jeamkatarma. Turawakrumin nui wayawar wina ememattriarti tusankesha chiki chikichik tribu aina nuna nugkenkesha etegkachuitjai. Antsu Israel shuar ainan apuri atinan Davidtan etegkawaitjai”, tusa Yuus tinaiti.

¹⁷ Wina apar David, Israel shuar ainan Yuusri ememattasa iruuntai jean jeamkattsa senchi wakerujakuiti.

¹⁸ Turasha wina apar Davidtan Yuus chicharuk: “Wina emematrittsa iruuntai jea ame jeamkattsam wakeram nuka pegkeraiti.

¹⁹ Tumakmesha wina emematrittsa iruuntai jeaka ameka jeamkashtatme. Antsu amina uchiram wina emematrittsa iruuntai jeanka jeamkatnaiti”, tusa Yuus tinaiti.

²⁰ Yuus ni timaurinka imatiksag umikai. Ni tina tumasnak wina apar inama jakua tumasnak Israel shuar ainan apuri jasjai. Tuman Yuus ememattasa iruuntai jean jeamkajai.

²¹ Tura nuiyasha ina uuntri ajakarua nuna Egipto nugkanam pujuinan jiir Yuus nitajai chichaman umikmau aarmau egkeamu arca apusatnuncha tesan umirkajai, tusa tinaiti.

²² Nuna tusa Salomón tagku aina maa patasa epetai emtin wajasuiti. Tumamtai israelita aina ashi iruuntrauwaiti. Tumawarmatai nita emtin mai uwejen nayaimpinmani takuinaiti.

²³ Tuma chichaak: Israel shuar ainan Yuusriya, ame chicham umikmauram metek uminaitam imauka nayaimpinam tura nugkanmagsha chikichka pegke atsawai. Shuar aina amina nekaspapita tusa umirtamainaka shir anennaitme.

²⁴ Wina apar amina umirtamin chicharkum: Amina uchiram wina emematrittsa iruuntai jean jeamkatnaiti, tusam tinaitam nu yamai umikume.

²⁵ Ame wina apar David chicharkum: “Ame weantu ainanmaya wina chichamrun metek umirtuinak, ame takajakuitam nujai metek takainakaigka, nita weantu artina nuiya Israel shuar ainan apuri atinaiti tusa tinaitam nusha umikta.

²⁶ Tuma asamtai Israel shuar ainan Yuusriya, ame wina apar anajmatawaitam nuka turusmek umikta”, tusa tinaiti.

²⁷ Yuusru, nekas ameka nugkanmagka pujumaitsume. Nayaim uunta nuisha ameka pujumaitsume. ¡Tura jean wii jeamkaj nuiyawa ameka pujumaitsume!

²⁸ Tumau aigkisha wina Yuusru, wii amina umirin asan tajam nu, wait aneasam anturtukta.

²⁹ Ame chichakum: Wika tsawaisha tura káshisha ju jeanam pujustatjai tusam tinaitme. Nu tusam tinu asaakmin amina umirin wii yamai chichaj nusha anturtukta.

³⁰ Wii amina umirin, tura israelita weantu ame etegkauwaitam nujai ju jea jui iruuntsa seammauwa nu anturkartukta. Amina pujutairam nayaimpia nui pujusam anturkartukta. Tumam ii pegkerchau takasmauri ainasha tsagkurkarturta.

³¹ Chikichik shuar chikich shuaran pegkerchau takartusai tusa timataigka nu shuara nu tagku aina maa patasa epetaiya jui tanta wajas chichaak: “Wika nekas pegkerchaunka takaschajai tusa tumamtinaiti”.

³² Tura ame nayaimpinam pujusam yáki pegkerchaun takasuit, nu iisam waitat suakum pegkerchaun takaschauwa nuka agkan inaisatin atá.

³³ Tura ame etegkamu Israel shuar ainan, pegkerchau takasaru asarmatai nita shuari aina achira yaruakam yujas, waitainak awake enentaimar ju jea jui iruunar emematramainak aujtamainakaigka,

³⁴ nayaimpinam pujusam anturkam nita tunauri aina tsagkurarta. Turawaram ina uuntri aina, nugka susaruitam nui awaigkim itawartin atá.

³⁵ Ame etegkamu israelita aina amina umirtamtsuk pegkerchau takasaru asarmatai waitat suakum yumi yutumtikchakmin waitainak awake enentaimar amina emematramainak ju jea jui iruunar aujtamainakaigka,

³⁶ ame etegkamu asarmatai nayaimpinam pujusmek nita tunauri tsagkurartin atá. Turam uruk shir pujumainak aina nu jintintawarta. Turakum ju nugkaka atumnau tuke atinaiti tusam susauwaitam nui yumi yutumtikatin atá.

³⁷ Ju nugkanam tsukai waitamu, yumi yutachu asamtai árak ainasha kakaru, araka jati aina, manchi aina, tema aina, ina shuari aina yaaktan tentakar mantamattsa tumashkusha chikich jata aina waitkainam,

³⁸ enentaimas ju jea jeamkamua juni uwejen takuiniar wajasar amina aujtamainakaigka anturkartin atá.

³⁹ Chikich shuar aina uruk enentaimaina, tura warina takaina nuka ame nekame. Tuma asam amina pujutairmin nayaimpinam pujusmek chiki chikichik nita takamuri iirsam anturkatin atá. Tura nekasnum aujtamainakaigka nita tunauri ainaka tsagkuratin atá.

⁴⁰ Nu turam ina uuntri aina nugka susauwaitam nui pujusar aminak eme anentramas umirtamiartinaiti.

⁴¹ Chikich nugkanmaya shuar aina ame israelita aina etegkawaitam nu weantuchu amina pachitmasar chichamun antuk ju jea jui taa,

⁴² amina pachitmasar, tura amina senchirmea nunasha pachisar aujtamaina asarmatai,

⁴³ nayaimpinam pujusmek anturkatin atá. Turakum nita seatmainamuka turusmek yaigkartin atá. Nu turakmin ashi nugkanam shuar pujuinasha amina nekarmawar Israel shuar aina amina emematramaina tumasarag emematramiarti. Tumainak amina pachitmasar ju jeanam iruuntrar emematramiartinan wii umikuitaj nunasha nekawarti.

⁴⁴ Tura ame etegkamu aina nita shuari ainajai maaniati tusam tuig ishiaktam nui yujasar maaninak ame yaakat Jerusalén etegkawaitam nui, amina emematramtasa iruuntai jean wii jeamnaitaj nunii iimsar aujtamainakaigka,

⁴⁵ nayaimpinam pujusmek nita tamauka anturkam ayamrukartin atá.

⁴⁶ Ashi israelita aina amina tunaun takartamsarmataigka, shir senchi nita kajerkam shuari aina achirar yaruakarti tusam ame tsagkamkakminka, nita shuari aina maaninak nepetainak achira yaruakam nita nugken ikukiar,

⁴⁷ chikich nugkanam pujusar nita tunau takasmaurin enentaimtusar awake enentaimrar amina emematramainak ina tunauri tsagkurkarturta tusa turamainakaigka, ame yaigtin atá.

⁴⁸ Tura nita shuari aina achira yaruakmau asar chikich nugkanam pujusar, ame yaakat Jerusalén etegkamua nunii iimas tura aminu atinan jean jeamnaitaj junisha iimas nita amina ima senchi anenmainak tura ima aminig enentaimsar pujusar aujtamainakaigka,

⁴⁹ nayaimpinam pujusmek nita anturkam ayamrukam kuitamkatin atá.

⁵⁰ Ame etegkamu aina tunaun takartamsaru ainakaisha tsagkurartin atá. Tura amijai shuarmaniawaru ainakaisha tsagkurartin atá. Tura nita shuari aina nepetkiar achirar yaruakarmataisha aminu ainan nita shuari aina wait anentrarti tusam titá.

⁵¹ Ame etegkamu aina nuka aminu ainawai. Tumaina asarmatai ji keamunmaya esawaig tusar jiimaina numamtuk Egiptonam waitu matsatu ame jiiruitme.

⁵² Wii amina inatairmetaj nu seammau anturtukta. Tura ame etegkamu Israel shuar ainati seamainaj nu antukam yaigkratkata.

⁵³ Israelita ainatinka chikich shuar ainasha pujuinaig, winau arti tusam ina etegkartuawaitme. Yuusa, ame ina uuntri aina Egiptonam pujuina jiiruitam nui amina inatairam Moisés ujakuitme, tusa Salomón Yuusan tinaiti.

⁵⁴ Salomón Yuus ememattasa iruuntai jeanam tagku maa patasa epetai amaunam nuna emtin tikishmar pujus uwejen nayaimpinmani takui Yuusan aujsauwaiti. Tura umik wajaknaiti.

⁵⁵ Tuma ashi israelita ainan pegkernum pachis senchi chichaak:

⁵⁶ “Yuus Moisésan pegker ainan anajmatawa nuna metek umiku asamtai, tura ni etegkamu israelita ainan maanitsuk matsamsarti tusa yaigku asamtai ima nigki ememattai atin atii.

⁵⁷ Tura pegkesha inaitamtsuk ina Yuusriya, nu yaunchuk ina uuntri ainan yaigkua numamtuk incha inaitamtsuk yainmaktatji.

⁵⁸ Yaunchuk ina uuntri aina chicham umiktinan umijakarua nu chicham wakerusa umikarmi. Nu wakerusa umiktinnasha waketan suramsatji.

⁵⁹ Juna ashi pachisan ina Yuusri, wii seamaj nunaka, tsawaisha tura káshisha ina pegkernum yainmak tuke aneaku atin atii. Tura ii atsumamuncha suramsatin atii.

⁶⁰ Nuna nekawar ashi shuar aina nugkanam pujuina nuka Yuusa, imauka chikichka atsawapi tusa nekawartin arti.

⁶¹ Tuma asamtai atum ainatirmeka ina Yuusri, ii emematin ainaj nuka nekasa nui takarin ataarma. Tumakrum nina chichame umiktin aarmau yamai umiarum tumasrumek umiktin ataarma”, tusa Salomón tinaiti.

⁶² Nuna tusa umik, apu Salomón ashi Israel shuar ainajai, tagku ainan maawar Yuusan eme anentas iiyainak ajamnaisar yuawaruiti.

⁶³ Tura Salomón Yuusjai, chichaman umiku asa, nina eme anentas iiya asa veinti dos mil vaca aishmag ainan, tura ciento veinte mil oveja ainan maawar yuawaruiti. Apu Salomón ashi israelita aina tuakmaunam ju jea jeamkamua juka yamaika Yuusnau atii, tusa tinaiti.

⁶⁴ Tura nu tsawanta nuik Yuus ememattasa iruuntai jean aarin, waitinam jeastatuk amaunam tagku ainan maa epeawaiti. Nitak enentaimsag juna Yuusan susatjai timau aina, tura árak ainan nerencha epeawaiti. Turak Yuus agkan pujustinnasha amasti tusa tagku kuntuti ainancha epeawaiti. Tagku aina maa patasa epetai bronce najanamuka shikapchich asa ashi pataska epemainchau asamtai turawaiti.

⁶⁵ Nu tsawantin numi kanawe aina tsupira aakmara matsamsamu tsawan asamtai shuar yaakat Hamat tutainam jeattak matsamin aina, entsa Egiptonam a imanaiya nagkamas ashi Israel shuar aina apu Salomónjai iruuntraruiti. Tumawar ina Yuusri, emtin jiistamawaruiti. Tura chikich jiistancha siete tsawan jiistamawaruiti. Tumaina asar ashi irumramka catorce tsawan jiistamawaru ainawai.

⁶⁶ Nu jiisat ashimnakmatai kashin tsawak apu Salomón shuar ainan pegkernum chicharkauwaiti. Turam nitasha apu Salomónkan pegkernum chicharkar, nita jeen shir aneasar wakettraru ainawai. Nuna tumawaru aina nunaka Davidtan tura israelita ainajaimak Yuus wait anentu jaku asamtai, tura nitasha turusrik wait anentramu asar nunaka tumawaru ainawai.