1 Reyes 22 - New Testament with Old Testament portions

Acab mantamnattawai tusa Micaías etserkamu

¹ Sirianmaya aina israelita ainajai maanitsuk tres uwí pujusaru ainawai.

² Turasha nu tres uwí jeaa ai, Judá shuar ainan apuri Josafat, Israel shuar ainan apurin irarsattsa wuwaiti.

³ Tuma jeamtai, Israel shuar ainan apuri nijai takau ainan chicharuk: “Atumka ina nugke Galaadnum yaakat Ramot a nuna Sirianmaya shuar aina, nita atainiar nitanu amajsar pujuraina nuka nekarme. Nu turamu aig nuka ika pachitsuk pujuinaji”, tusa tinaiti.

⁴ Nuna tusa Acab Josafatan chicharuk: “¿Galaad nugkanam yaakat Ramotan awaigkittsan Sirianmaya shuar ainajai maniakai yainmaitsumek?” tusa tinaiti. Tusa takai Judá shuar ainan apuri Josafat chichaak: “Wina suntarujai, tura caballo ainajai atuktatjame.

⁵ Turasha yama nagkamchakmeka Yuuscha urukawarti tusag wakera nu pachisam iniasta”, tusa tinaiti.

⁶ Tusa takai apu Acab Yuusa chichamen etserin ainan untsukuiti. Turam cuatrocientos shuar iruuntraru ainawai. Tumawarmatai chicharuk: “¿Ina shuari ainajai Gaalad nugkanam yaakat Ramotnum pujuina nujai maanimainkaitaj tumashkuncha inaimainkaitaj?” tusa tinaiti. Tusa takai nita chichainak: “Atum nitajai maaniakrum nepetkatarma tusa Yuus tsagkattramkaurme. Tuma asamtai apu maaniattsam wetá”, tusar tiaruiti.

⁷ Turasha israelita ainan apuri Josafat ajakua nu Acabpan iniak: “¿Iniasa nekamain chikichka Yuusa chichamen etserin juigka atsawak?” tusa tinaiti.

⁸ Tusa tama Israel shuar ainan apuri Acab Josafatan chicharuk: “Ee, Imla uchiri Micaías Yuusa chichamen etserin chikishcha pujawai. Turasha nuka chicham pegkera nunaka etsertsuk pegkerchau atina nunak etsernayi. Tumau asamtai, ninka iniasa nekatnasha nakitajai”, tusa tinaiti. “Tusa takai Josafat chicharuk nuka tiipa”, tusa tinaiti.

⁹ Tusa tama Acab suntara apurin untsuk itaa chicharuk: “Micaías wári utita tusa akupkauwaiti”.

¹⁰ Israel shuar ainan apuri Acab, tura Judá shuar ainan apuri Josafatcha maaniatnun nagki ainan jukiar shir uminas yaakat Samaria waitirin ekemsa ayamtai ainanam nita apu aina ekemtainam eketaina. Tumainai Yuusa chichamen etserin aina, Yuus tawai tusa chichaman etseraina.

¹¹ Quenaaná uchiri Sedequías Yuusa chichamen etserin kachun hierrojai najankauwaiti. Tura chichaak: “¡Yuusa sirio ainajai maniakum ju kachu aina ju etsegkrukrum ashi ijinattame!”, tusa tawai tinaiti.

¹² Tura Yuusa chichamen etserin chikich ainasha turusag etseraina. Turuinak apun chicharainak: “Galaadnum yaakat Ramot a nunaka Yuus atumin nepetmak atainiarti tusa tsagkattramkaurme”, tusa tinaiti.

¹³ Chikichik shuar chichaman etserin we Micaíasan jeari chicharuk: “Yuusa chichamen etserin aina apu turattsa wakeramurin turusag ujakarai. Nuna turawaru asamtai, amesha turusmek ujakta”, tusa tinaiti.

¹⁴ Tusa tama Micaías ayak: “¡Atsa, Yuuska waitrichu asamtai, Yuus titá turutmaunak titatjai!” tusa tinaiti.

¹⁵ Nuna tusa Acab pujamunam wuwaiti, tuma apu pujamunam jeawaiti. Tumamtai apu Acab iniak: “Micaíasa, nugka Galaadnum yaakat Ramot a nuiya shuar ainajaisha maanimainkaitaj atsa maanimaitsujik”, tusa tinaiti. Tusa tama Micaías apun chicharuk: “Nitajai maniak nepetkati tusa Yuus yainmaktatui, turutmatin asamtai maanikta”, tusa tinaiti.

¹⁶ Tusa tutai apu Acab nina ayak: “Wika aminka Yuus waitrichu asamtai amesha nekasa nu turutta tusan nukapea tajame”, tusa tinaiti.

¹⁷ Tusa takai Micaías chichaak: “Oveja aina nitan kuitammain atsurmau asa pampag muranam antar yujauwa numamtuk, israelita suntar ainasha pampagkar yujainan wainjai”. Yuus chichaak: “Nita ainan kuitammainka atsawai, nitaka chiki chikichik nita jeen shir agkan waketrati tawai”, tusa tinaiti.

¹⁸ Tusa takai apu Acab Josafatan chicharuk: “¿Ju shuarka pegkernaka etsertsuk pegkerchau aina nunak etsernayi tusan tichamkajam?”, tusa tinaiti.

¹⁹ Tusa takai Micaías chichaak: “Nuka tumain tichaume”. Yuus, chichaman akupturmakmaun yamai ujaktatjam nu antukta: “Yuus nina ekemtairin ekemsamtai nayaimpinmaya shuar aina untsuruini, tura menarinisha irunun wainkamjai.

²⁰ Nu ainan Yuus chicharuk: ¿Nu maaniamunam maawarti tusasha yáki apu Acabpan tsanuaksha Galaad nugkanam yaakat Ramot a nuna Sirianmaya aina akasmataina nujai maaniata tumainaita?”, tusa timayi. Tusa takai nayaimpinmaya shuar aina nui irunu chiki chikichik enentain apujsarmayi.

²¹ Nuna tumainai wakan pegkerchau Yuus eketmaunam taa chichaak: “Wii nunaka tumainaitjai, tusa timayi. Tusa takai Yuus nina chicharuk: Turasha nusha uruk turattam, tusa timayi.

²² Tusa tama wakan pegkerchauwa nu chichaak: ‘Chichaman juki etserin aina nu Acabpan ashi tsanurarti tusan titatjai’ ”, tusa timayi. Tusa takai Yuus nina chicharuk: “Ame tsanumain asam tatsumeash, weme Acab jeaaram tsanuata”, tusa timayi.

²³ Nu maaniamunam nita shuari aina maawarti tusa Yuus aminka tsagkamramkaume. Nuna turutma asamtai, wakan pegkerchauwa nu tsanuata tamau asar amina chichaman ujatmau aina nuka tsanurmainawai, tusa tinaiti.

²⁴ Tusa timatai Quenaaná uchiri Sedequías Micaíasan jeaari yapinam awatnaiti. Tura chicharuk: “Yuusa Wakaní wina ikureakug amini pujus amina chichamtikrama”, tusa tinaiti.

²⁵ Tusa takai Micaías chichaak: “Wii ujamaitiatam ame wina turutam nuka, tsekegkim jeemin uuma wekakum nekaspapi turutnaita tusam nekattame”, tusa tinaiti.

²⁶ Tusa takai Israel shuar ainan apuri Acab chichaak: “Micaías achikrum jukirum apu Amón pujamunam ejétarma, tura apu uchiri Joás pujamunmasha ejétarma.

²⁷ Wii taja turusrumek nitasha ujakarta, turam nita cárcelnum egkeawarti. Turawar pankan entsajai ishichik susarti, turu pujuinai maanikan nepetmakan iwákuk pegker taatjai”, tusa tinaiti.

²⁸ Tusa takai Micaías nina chicharuk: “Ame maanikam nepetmakam iwáku pegker waketkim takminka, wina aujtusma nuka Yuus nekas aujtuschau asamtai tumattame. Nuiyasha shuar aina irunun chicharuk: ‘Wii juna taja nu atumsha aneaku ataarma’ ”, tusa tinaiti.

Sirianmaya suntar aina apu Acabpan maamu

²⁹ Israel shuar ainan apuri Acab, tura Judá weantu ainan apuri Josafatjai Galaad nugkanam yaakat Ramot tutai amaunam Sirianmaya shuar ainajai maaniawartasa wearu ainawai.

³⁰ Acab Josafattan chicharuk: “Wika suntara nugkutairin nugkuran maaniatjai”, tusa tinaiti. Tusa nigka suntara nugkutairin nugkuruiti, Josafatnaka ameka amina nugkutairmek nugkurta, tusa tinaiti. Nuna tusa nugkurar shuari ainajai maaniattsa igkuniakaru ainawai.

³¹ Turasha Sirianmaya apu treinta y dos capitán carretenam yujas maanin ainan chicharuk: “Chikich ainaka maatsuk, ima Israel shuar ainan apuriya nuke maatarma”, tusa tinaiti.

³² Capitán carretenam yujas maanin aina Josafattan wainkar apu nugkutairin nugkuaru asamtai, jutsukaitti Israel shuar ainan apurigka tusar maawartasa tentakaru ainawai. Turam ayamrutkatarma tusa senchi untsumkauwaiti.

³³ Tumakai capitán carretenam yujas maanin aina Josafattan nekawar Israel shuar ainan apurinchu asamtai maatsuk ikukiaruiti.

³⁴ Turasha shuaran wainchayat Sirianmaya suntar nina flecharin yakini inakmas nagkimawaiti. Nuna tura Israel shuar ainan apurin nina suntaari aina wenamunam pachitkau wetatmaun nekachmau jirun nugkur wetatmaun agkasu atatmaunan ijuwaiti. Tura ijum nina carretarin anuntak wean chicharuk: “Winaka ijutiarai carro ataksha awaigkim ju maaniamunmayagka jiirkita”, tusa tinaiti.

³⁵ Nu tsawantin suntar aina shir senchi maaniawaru ainawai. Ujumak suntar israelita aina apu Acab carretenam egketkai kuitamainak pujuina, tumainai chikich ainaka Sirianmaya suntar ainajai maanina. Turasha apuka flechajai ijumunam numpan senchi puwak carretanka aya numpak amajsau, tuma etsa kia ai jakauwaiti.

³⁶ Tura káshi jasa ai israelita suntar ainan apuri chichainak: “Chiki chikichik atumin jeen waketratarma.

³⁷ ¡Apuka jakayi!”, tusa tamaun antukaru ainawai. Tusa tuinakai suntar aina waketainak Acabpan iyashin jukiar Samaria nugkanam ikusaruiti.

³⁸ Turawar Acabpan carretarinka, nuwa akika takatai ainan maatairi amaunam nijararuiti. Yawa aina, Acabpan numpen nukararuiti. Yuus tumattawai tusa tina nuka tu uminkauwaiti.

³⁹ Apu Acab pujusa ni takasmauri ajakarua nuka, tura apu pujusa inamtairi jeaka leónka nai ainajai pegker takas umikua nuka, tura yaakat ainancha najankauwa nuka papi Crónicanam apu aina takasmau tutainam aarmauwaiti.

⁴⁰ Apu Acab jakamtai, nina uchiri Ocozías apu jas inamrauwaiti.

^41-53 (-)