1 Reyes 21 - New Testament with Old Testament portions

Nabot uva ajanam arakmaun Acab atankittsa wakerukmau

¹ Apu Acab ajakua nuka yaakat Samarianam pujus inamajakuiti. Tumayat ni pujusa inamtairi chikitcha jea yaakat Jezreelnum arujakuiti. Nu yaaktanmaya chikichik shuar Nabot naartin uva ajanam arakmauri jea apu pujusa inamtai ajakua nui ayaamas ajakuiti.

² Chikichik tsawantin apu Acab, Nabotan jeari chicharuk: “Amina ajaram uva arakmau wina jearuin ayaamas awai. Tuma asamtai wina ajar atii wina surusta. Ayu takumnaka aja uva arakmau pegkeran chikichan amastajme, antsu aya akirkata tusam takumnaka urutma akik tusamek turuttam nunaka turusnak akiktajme”, tusa tinaiti.

³ Turasha Nabot chichaak: “Atsa, Yuus turata tusa turutchau asamtai apu susashtatjame. Nu ajaka wina apachrunu, tura wina aparnau ajakuiti”, tusa tinaiti.

⁴ Wina untur ajakarua nu ju nugkanka surusaruiti. Turutawaru asarmatai susashtatjame, tusa tinaiti. Tusa timau asa, Acab kajek wake mesek nina jeen waketkinaiti. Tuma jeen jeaa tanishnum yapin anug tepesuiti. Tura yurumak suamsha yuachuiti.

⁵ Tumakai nina nuwe Jezabel jeari chicharuk: “¿Urukamtai wake mesekmesha yurumak yutsuksha tepame?” tusa tinaiti.

⁶ Tama Acab ayak: Nabotan chicharkun: “Amina ajaram wina jearui ayaamas a nu wina surusta tusa tamaitiat suritruku asamtai juniajai”, tusa tinaiti.

⁷ Takai nina nuwe Jezabel chicharuk: “¡Turasha ametme Israel shuar ainan apurimka! Kuntuts enentaimtsuk nantakim yurumak yuata. ¡Nabotan ajarinka wii susattajme!” tusa tinaiti.

⁸ Nuna tusa nina aishri naarin pachis papiinum aak umik apu sellorin apujtuk Nabot pujutainam apu aina pujuinan, tura shuar eme anentsa iitai aina pujuinancha akupturuiti.

⁹ Nu papi ainanam aak: “Apu ainatiram yurumak yutsuk chikichik tsawan pujamu atatui tusarum etserkatarma. Tura shuar aina iruuntramtai Nabot untsukrum atum iruuntramunam itaatarma.

¹⁰ Turarum nina tsanumrurtin shuar pegkerchau aina jimar itarum Nabotjai iimtiksarum ekentsatarma. Nita antar chichainak: ‘Ame Yuus pachisam, tura apu pachismesha pegkerchau chicharkamame’, tusa tiarti. Tusa tuinakai Nabot achikrum aa jiikrum kayajai tuka tukakuarum maatarma”, tusa tinaiti.

¹¹ Nu tu aara papi akuptukmau asar, Nabot pujutainam shuar aina pujuina, apu aina tura shuar eme anentsa iitai ainajaimak Jezabel timaun metek uminak iruuntraru ainawai.

¹² Tumawar yurumkan yutsuk pujusar Nabotan nita pujamunam itawaru ainawai.

¹³ Nuna turawarmatai Nabotan tsanumrurtin shuar pegkerchau aina jimar taawaiti. Tumawar ashi shuar aina antuinamunam Nabotan tsanumruinak: “Ju shuar Yuusan, tura apuncha pachis pegkerchau chicharu ii nekas anturkamji”, tusa tuina. Tusa tiarmatai Nabotan achikar jukiar yaaktan ikumtikiar kayajai tuku tukuinakua maawaru ainawai.

¹⁴ Nuna turawarmatai, Nabotnaka kayajai tuku tukuinakua maawarai tusarum Jezabel ujaktarma tusa chichaman etserin ainan akuptukaru ainawai. Turamu aina jeawar Jezabelan ujakaru ainawai.

¹⁵ Turam Jezabel antuk aishrin chicharuk: “Nabot Jezreelnum pujuwa nu ajariin suramtan nakitma nunaka yamaika maawarai. Turawaru asamtai nina ajarigka ame jukita”, tusa tinaiti.

¹⁶ Nabotka jakayi, tusa nuwe ujakam Acab Nabota ajariin jukittsa wuwaiti.

¹⁷ Tumamtai Tisbénmaya shuar Elías ajakua nuna, Yuus chicharuk:

¹⁸ “Israel shuar ainan apuri Acab, Samarianam pujuwa nu, Nabota ajariin jukittsa weri ajanam jeaa weká nu, amesha werita.

¹⁹ Turam jeari chicharkum: ‘Ame Nabot maakum numpe ukarmauwa nuna yawa aina nukararma turusag amina numpemnasha nu nugkanmag nukarartatui tusa Yuus tawai titá’ ”, tusa tinaiti.

²⁰ Tusa timau asa Elías Acabpan jeari, Yuus timaun turusag ujakuiti. Tusa tama Acab, Elíasan chicharuk: “Ameka wina shuaruitme. Turasha wii wekamunam jui taume”, tusa tinaiti. Tusa takai Elías chichaak: Ee jui wekamin wainkaujme. Ame takam nuka Yuus iismaka shir pegkerchauwa nuke takame.

²¹ Tura asaakmin ni chichartamuk: “Waittan wii susattajai. Turakun amee weantu ainanka ijinattajai. Tura amina uchiram aishmag aina, inaku waitkatai aina, tura inashtai Israel nugkanam pujuina nujaimak ashi ijinattajai.

²² Nabata uchiri apu Jeroboam tura Ahíasa uchiri Baasajai nita weantu ainan ijinawaitaj turusnak, Israel shuar ainan tunaun takamtiksau asamtai kajerkau asan ijinattajai.

²³ Tura amina nuwemin Jezabelan pachis Yuus chichaak: ‘Jezabela iyashinka yaakat Jezreel tanishmarmau awin yawa aina yuawartatui.

²⁴ Tura amina pataim aina yaaktanam jinaawarmataisha yawa aina yuawartatui. Antsu ajanam jinaawarmataigka nanamtin yukartin aina nu yuawartatui’ ”, tusa tawai tinaiti.

²⁵ Chikich apu ajakarua nuka Acab nina nuwe Jezabela chichamen umiruk Yuus iisam shir pegkerchaun taká jakua nuninka atsujakuiti.

²⁶ Amorreo aina yuus atii tusa najanawar ememataina asarmatai, israelita aina emtin Yuus jiiruiti. Tura Acabsha turusag nunak emematuk shir pegkerchau iwainmamajakuiti.

²⁷ Yuus turamui tusa ujakam, nuna antuk ashamkauwaiti. Tuma Acab jaanch pegkeran nugkuarmaurin jaakuiti. Tura wake mesemar pujakur nugkutain nugkuruiti. Tuma yurumkan yutsuk pujusuiti, nuu jaanchnak nugkur kanujakuiti. Nunaka wake mesemar pujamun iwainmamkattsa tumawaiti.

²⁸ Tuma pujai Yuus Elías tisbita ajakua nuna chicharuk:

²⁹ “¡Acab wina enentaimturuk wake mesek puja au wainme! Tuma asamtai, wii turattajai tusan timaj nunaka yamaika turashtatjai. Antsu ni jakamtai, nina uchiri apu jas pujutna nui, ni weantu ainan turatnaitjai”, tusa tinaiti.