1 Reyes 18 - New Testament with Old Testament portions

Yuusan umirchau ainajai Elías nekapnaisamu

¹ Yumi yututsuk tres uwí nagkamasuiti. Tumamtai Yuus Elíasan chicharuk: “Acab pujamunam wetá”. Tumam jearim chicharkum: “Yuus yumin yutumtikattajai tawai tusam ujakta”, tusa tinaiti.

² Takai Acabpan ujaktasa Elías wuwaiti. Samarianmaya shuar ainaka yumain atsau asamtai, tsukai senchi waitaina.

³ Tumaina asarmatai Acab nina waríri ainan kuitamnun Abdíasan Yuusan eme anentas umirnun jui taati tusa untsukuiti.

⁴ Jezabel Yuusa chichamen etserin ainan yaunchuk ijinu jaku asamtai, Yuusa chichamen etserin ainan Abdías cien yaruak wa jimar amaunam akanak cincuenta cincuenta uukuiti. Tura yutain umutaijai sujakuiti.

⁵ Tura apu Acab pujamunam Abdías jeawaiti. Tumamtai Acab chicharuk: “Weri, ashints ainanam, tura entsa uuntri ainanmasha ashi wekasar nupa atsuash eakar caballo aina, tura burro ainasha ayurami. Nu turachkurka tagku aina jinamtai, tagkurtinchau juaktatji”, tusa tinaiti.

⁶ Nuna tusa, nu nugkanam nita wekasami timaunam wearu ainawai. Acab chikich yantamnum weakai, Abdías chikich yantamnum wuwaiti.

⁷ Tuma Abdías wetatmaun Elías jinki we jinta igkugkuiti, turam Abdías, Elíasan nekawaiti. Tura tsuntsumrua chichaak: “¡Ameka wina apur Elíasaitme!” tusa tinaiti.

⁸ Tusa takai Elías chichaak, ee wiyaitjai. Wetá, tumam amina apuram Acab chicharkum, Elíaska ai pujumai tusam ujakta, tusa tinaiti.

⁹ Tusa tutai Abdías chichaak: “Wii nu tusa ujamka, Acab winaka mantumainaiti. ¡Acab maati tusa ame suram atasnaka wika pegkerchaunka takaschamjai!

¹⁰ Amina umirtairam Yuusrum, waitrichu asamtai wisha nekasa nuna titatjame. Elías eaktarma tusa apu Acab ashi nugkanam ishiakmau aina yujasua waketar tawar, wainkachji tusar tuinakai nekas wainkachu akurmeka Yuus waitrichu asamtai isha waitratsji tusarum titarma tusa imatrawai.

¹¹ ¡Imatu puja nuka Elías ai pujawai tusam, apuram ujakta tusam turutam!

¹² Wii, wina apurun Acabpan ujaktasa juiya weakai Yuusa Wakaní wii nugka nekashmaunam juramkittawai. Nuna turutma ai wina apur wii ujakam jui taa amina waitmakchagka wina mantuattawai. Wii amina inatairmitaj nunaka natsa asanak Yuusan umirujakuitjai.

¹³ Jezabel Yuusa chichamen juki etserin ainan ijinkai, cien shuar ainan yaruakan cincuenta cincuenta akankan wa jimar amaunam ukan apujsaran nita yuatnun tura umutaijai suinajai tusan ujakmajme.

¹⁴ Nu turamu ayatam Elías ai pujumai tusam amina apuram ujakta turutam nuka, ¡Acab maati tusam turutme!” tusa tinaiti.

¹⁵ Tusa takai Elías chicharuk: “Yuus ashi senchirtinan wii umirnaitaj nu waitrichu asamtai wisha nekasa nuna tajame. Yamaiya juik apu Acabjai chichastatjai”, tusa tinaiti.

¹⁶ Tusa tama Acabpan ujaktasa Abdías wuwaiti. Tuma jeaa ujakuiti. Turam Acab Elíasjai igkuniak chichastasa wuwaiti.

¹⁷ Tuma Acab, Elíasan igkug chicharuk: “¡Jui pujusam Israel shuar aina senchi waitkainame!” tusa tinaiti.

¹⁸ Tusa tama Elías chichaak: “Atsaa, israelita ainan waitkanka wichauwaitjai. Antsu ame, tura ame weantu ainajai Yuusa chichame umiktarma tusa timauwa nu umirtsuk Baal wina yuusruiti tinu asam, israelita ainan nugkegka ame pegkerchau amajkaume.

¹⁹ Tura asam israelita aina, Baalan chichamen juki etserin aina cuatrocientos cincuenta shuar pujuina nu, tura Aseran chichamen etserin ainan cuatrocientos cincuenta shuar Jesabelan mesarin iruunar yu aina nu Carmelo naintrin ashi iruuntratarum tusam tiarta, tusa tinaiti. (Nunaka ashi iruuntrarmatai yana Yuusrig ima senchirtinait nu nekaami)”, tusa tinaiti.

²⁰ Tusa tama ashi israelita ainan, Baalan, tura Aseran pachisar etserin ainajaimak Carmelo naintrin Acab irumrauwaiti.

²¹ Turamtai Elías nui jeaa nitan chicharuk: “Yuus Baal umirat inaiyakrum Yuus tuke pujuwa nu umirkatarma. Yuusa nuwaiti nekas ina Yuusrigka takurmeka nigki umirkatarma. Antsu Baalaiti ina yuusrigka takurmesha nuke umirkatarum”, tusa tinaiti. Tusa takaisha pegkesha aikcharu ainawai.

²² Tumawarmatai Elías ataksha chichaak: “Yuusa chichamen etsernunka wikitjai. Antsu Baalan pachisar etserin aina nuka cuatrocientos cincuenta shuar ainawai.

²³ Vaca aishmag tsakat jimar itaatarma. Turarum chikichik maarum akaarum chigkim irumramunam jika ikapatsuk patastarma. Tura wisha turusnak chikichan maan akaran jinka ikapatsuk chigkim irumramunam patastatjai.

²⁴ Turarum ji akupkata tusarum atumin yuusri titarma. Tura wisha turusnak wina Yuusrun ji akupkata tusan titatjai. Nu tusa takurin jina akupak ekemaktata nu nekas Yuuska atatui”, tusa tinaiti. Tusa takai shuar aina ayu nunis atii tusar ashi tiaru ainawai.

²⁵ Tusa tuinakai Elías Baalan chichamen etserin ainan chicharuk: “Atumka nukap ainarme tuma asarum, vaca aishmag tsakat jimara nuiya chikichik etegkarum maarum akaarum atumea umiktarma. Turasha jika ikapatsuk atumi yuusri aujsatarma”, tusa tinaiti.

²⁶ Tutai Baalan chichamen etserin aina vaca aishmag tsakatan maa akaarar, jinka ikapattsuk chigkim irumramunam awasaruiti. Tura káshikmasar nagkamawar Baalan chicharainak: ¡Baala ii seamaj nu umikta! tusar tagku maa patasmau amaunam nagkimnainak tui tuinakua etsan tutupin amajsaruiti. Turamsha pegkesha umikchauwaiti.

²⁷ Turamtai Elías nitan wishikiak chicharuk: “Nigka chikichik yuusaiti. Warín sumak pujatsuash, tumachkusha jeashat wechayash, nuna tumachkusha kanar tepatsuash, tumachkusha ijatmak wechayash senchi untsukrum ishintartarma”, tusa tinaiti.

²⁸ Wishikiakur tamasha ina yuusri umirtamkatji tuina asar, nita yuusrin emematainakka tuke tumau asar senchi untsuina. Tura kuchiin tsupimaina, tumawar numpa jasar pujuina.

²⁹ Etsa tutupnir tenmataisha waurua numamtuk untsumainak nagkimna yuja. Imani yujai tagku maar ajamnaitai etsa jeawaiti. Turasha nitan anturak umiruka atsusuiti.

³⁰ Tumainakai Elías nitan chicharuk: “Wini kaunkatarum”, tusa tinaiti. Tusa tama israelita aina Elías wajamunam ashi iruuntraruiti. Tumawarmatai Yuus emematku tagku aina maa patasa epetain, yumpuarmaun ataksha najanawaiti.

³¹ Jacobon Yuusa naarin yapajtak Israel anaikauwa nuna uchiri aina doce tribu ajakarua turusag doce kayan jukinaiti.

³² Tura nu kaya ainajai Yuus ememattasa tagku maa patasa epeatnun ekenar najanawaiti. Tura tagku maa patasa epetai yantamen, trigo veinte litro egkemainan nugkan tai tentakuiti.

³³ Tura chigkimin awar umik, vaca tsakatan maa akaar chigkim irumramu yakin patasuiti.

³⁴ Tura shuar ainan chicharuk: “Cuatro muitsnum entsa aimkarum tagku namagke, tura chigkimsha tresa imajnia ukattratarma”, tusa tinaiti. Takai entsajai tresa imajnia ukattraruiti.

³⁵ Nu turamu asa entsa sanki, tagku maa patasa epetai najanamu yantamen tauka tentakmaunam piakuiti.

³⁶ Tagku maa epetai, ashi etsa jeawaiti. Tumamtai Elías nui jeaa chichaak: “¡Abraham, Isaac tura Israel nu aina emematu jakmauwa, Yuusa! Ame israelita ainan Yuusri asam, wina chichamur umirtukta tusa ame timaurmin wii umirnaitjam nu, yamai nekamtikawarta.

³⁷ Yuusa, yaunchuk wina umirtu jakuitrum tumasrumek yamaisha umirtuktarma tusam tame nuna, tura ame Yuusaitam nunasha nekarmawarti. ¡Wii amina tajam nu metek umirtukta!” tusa tinaiti.

³⁸ Tusa inagnaig Yuus jin akupkauwaiti. Tura tagku maa patasa epeatin kaya aina irumramun, chigkim ainan tura vaca namagke asaara awarmaun ekeemak aeskauwaiti. Tura tagku aina maa patasa epetai amaunam nugka aun, tura nugka tauka tenteamunam entsa piakuncha ukuyua muku amajsauwaiti.

³⁹ Yuus turamun israelita aina ashi wainkar tsuntsumawar chichainak: “¡Yuusa nuka nekas Yuusaiti! ¡Yuusa nuka nekas Yuusaiti!” tusa tiaru ainawai.

⁴⁰ Tusa tuinakai Elías nitan chicharuk: “¡Yamaika Baalan pachisar etserin aina nu ashi achikrum maatarma! ¡Chikichkiksha akupkairpa!” tusa tinaiti. Tusa takai ashi achirar jukiar entsa Quisón tutainam yaruakar ashi maawaruiti.

Elías Yuusan yumi yutumtikata tusa timau

⁴¹ Turawarmatai Acabpan Elías chicharuk: “Yumi uutmaun antajai, yamaika jeemin waketkim yurumak yuata tura umarta”, tusa tinaiti.

⁴² Tusa tama Acab yurumkan yuattsa nina jeen wuwaiti. Turasha Elíaska Carmelo naintrin wakauwaiti, tuma tikishmar tsuntsumaa yapijai tikishin antig pujusuiti.

⁴³ Tuma pujus nina inatairin chicharuk: “Wetá, tumam nayantsanmani iimsata”, tusa tinaiti. Tutai nayantsanmani iimas Elíasan chicharuk: “Pegkesha atsawai”, tusa tinaiti. Turasha Elías ataksha chicharuk: “Siete imajnia waketkita”, tusa tinaiti.

⁴⁴ Tusa tama siete imajnia we iisuiti. Tuma waketki jeaa chichaak: “Yamaika yuragmin shuaran uwejea numamtinan wainkajai”, tusa tinaiti. Nuna tusa takai Elías chicharuk: “Wetá, tumam yumi shir senchi yutak epenkai, Acab yumi yutatsaig, carreteram jukim wetá tusam titá”, tusa tinaiti.

⁴⁵ Tusa timau asa Acabpan ujakuiti. Turam Acab yaakat Jezreelnum wuwaiti. Tuma ai yuragkim kiar tee jasuiti, tuma nase nasejai yumi shir senchi yutukuiti.

⁴⁶ Turasha Elíaska Yuus senchimtikmau asa, shir akachuma tsekegki Acabka jeatsaig niyaa yaakat Jezreelnum jeawaiti.