1 Reyes 12 - New Testament with Old Testament portions

Israelita aina kanakmau pachisa timau

¹ Israel shuar aina Roboaman ina apurigka juwaiti tusa tiartasa yaakat Siquemnum ashi wearu asarmatai, Roboamsha Siquemnum wuwaiti.

² Turasha Salomón maataj tusa tama, Nabatan uchiri Jeroboam Egipto nugkanam tsekegki wu nuig pujau, tuma asamtai ujakaru ainawai.

³ Nu turam weakai Israel shuar ainasha apu Roboamjai chichasartasa Jeroboamjai ashi wearu ainawai. Tumawar jeawar chichainak:

⁴ “Amina apa ajakua nuka inka shir senchi takamtikramak, apunu atincha kuit akikmatarma tusa waitkarma jakuitji. Turasha ame, takatnum tura apunu kuit atincha ishichik akikmatarma tusam tukartakminka nuka metek umiktatji”, tusa tiaru ainawai.

⁵ Nuna tusa tuinakai Roboam nitan chicharuk: “Atumin jeen waketratarma, wijai chichastasrum tres tsawan pujusrum tataarma”, tusa tinaiti. Tusa takai waketraru ainawai.

⁶ Nu tumawarmatai apu Roboam uun aina nina apari Salomónjai taká jakaru pujuinan iniak: “¿Ju shuar aina wina turutaina nunasha wari tumainaitja?” nu turuttarma tusa tinaiti.

⁷ Tusa apu takai uun aina chichainak: “Nu shuar aina wina tuke umirtin arti tusam takumka nita turamaina nu umirkarta. Turakum yamaika senchi takakrumka waittsashtatrume, tura kuit apunu atincha nukapka akikmakchattarme tusam tiarta”, tusa tinaiti.

⁸ Turasha apu Roboam nu uun timaunka umirtsuk, shuar nijai metek tsakaku nijai takau aina pujuinan,

⁹ iniak: “¿Shuar aina amina apa ina senchi takamtikramuk, tura kuit apunu atin akikmaktarma tusa waitkarma jakua turusmekka waitkakartusaipa tusa, turutaina nunasha iturmainaitja? nu pachisrum turuttarma”, tusa tinaiti.

¹⁰ Tusa takai shuar nijai metek tsakaku ainanmaya chicharainak: “Amina apa senchi takamtikartujaku akaisha ameka turukratawaipa tusa turamaina nuka chicharkum: Wina apar senchi takamtikramak waitkarma jakua nu senchi takamtikkun waitkastatjarme.

¹¹ Wina apar atumin senchi takamtikramak waitkarma jakuitrume, turasha wika nu senchi takamtikkun waitkastatjarme. Wina apar atumin akachumtaijai asuttamajakuiti, turasha wika atumnaka jiru hierro tutaijai asutrattajrume tusam tiarta”, tusa tinaiti.

¹² Tres tsawan jeamtai tataarma tusa timau asa nu tsawan jeamtai, Jeroboam ashi israelita ainan yaruak apu Roboam pujamunam nijai chichastasa wuwaiti.

¹³ Turasha apu Roboam uun aina timaunka umitsuk Jeroboaman ashi israelita ainajaimak shir pegkerchau chicharkauwaiti.

¹⁴ Nuna tura asa shuar nijai metek tsakaku nijai takau aina titá tusa timaun turusag chichaak: “Wina apar atumin senchi takamtikramuk waitkarma jakuitrume, turasha wika nu senchi takamtikiakun waitkastatjarme. Tura wina apar akachumtaijai asuttamajakuitrume, turasha wika jiru hierro tutai tsakarijai asutiattajrume”, tusa tinaiti.

¹⁵ Yuusa chichamen juki etserin Ahías Cilonmaya ajakua nuna chicharuk: “Jeroboaman turatnaitjai tusa tinu asa nu metek uminkati tusa wakerak apu Roboam shuar aina metek umikcharti”, tusa tinaiti.

¹⁶ Israelita aina nita tamaun apu Roboam umikchamtai chichainak: “David weantu aina nu ina apuri atii tusarka wakeratsji”. ¡Isaí uchiri ainaka nita waríri ainan akankagka surammain ainatsji! ¡Davidta tiragke ainaka nita shuarak kuitamnaikati! ¡Antsu israelita ainatika ina jeen waketkiarmi,! tusar nita jeen waketkiaru ainawai.

¹⁷ Judá nugkanam israelita aina pujuinan Roboam inajakuiti.

¹⁸ Adoraman takatan takainakai iin atii tusa apu anaikamun, Israel shuar aina senchi chichainakai itatmamtikata tusa apu Roboam akupkauwaiti. Turamun israelita aina kayajai tukurar maawaru ainawai. Nuna turawarmatai apu Roboam wári carreterin egkemar Jerusalénnum tsekegnaiti.

¹⁹ David weantu ainajai Israel shuar aina tu kajernaikaru ainawai. Yamaiya juisha tumasag pujuinawai.

²⁰ Egipto nugkanam pujau Jeroboam waketki taayi tusa tamaun Israel shuar aina antukaru ainawai. Tumawar ii iruuntrar apu anaikami tusar shuaran akuptukaru ainawai. Turam weri juki itamtai nita iruuntrar ina apuri atá tusar apu anaikaru ainawai. Nuna turawar chichainak: “Yamaika juwaiti israelita ainatin apurigka, Judá weantu aina David weantu ainanmaya ina apurigka atii tusa tuina nuke juakarai”, tusa tiaru ainawai.

²¹ Roboam yaakat Jerusalénnum jeawaiti. Tuma Judá weantu ainanmayan tura Benjamín weantu ainanmayancha suntar maanitan yacha ainan, ciento ochenta mil irumrauwaiti. Nunaka Israel shuar aina diez tribu ajakarua nujai maanik nepetmakan wiki apuka jastajai, tusa turawaiti.

²² Turasha Yuusa chichamen juki etserin Samaías ajakua nuna chicharuk:

²³ “Apu Roboam, ashi Judá weantu aina tura Benjamín weantu ainajaimak chichasta.

²⁴ Israelita ainaka nita patai ainawai, tumau asarmatai maanitsuk nita jeen wakettrarti tusam ujakarta”, tusa Yuus tinaiti. Tusa takai nuna antukar nita jeen wakettraru ainawai.

Jeroboam Yuusan ememattsuk najanamu ainan emematmau

²⁵ Jeroboam nui pujus inamrattsa Efraínka nugken nain irunmaunam yaakat Siqueman tanishmar umikuiti. Nuna tura pujus chikichnasha yaakat Penuelan tanishmar umikuiti, tura nui pujus inamrattsa wuwaiti.

²⁶ Turasha David weantunmaya apu jas diez tribu ainan awaigki irumar inamrashtimpash tu enentaimrauwaiti. Tu enentaimrau asa:

²⁷ Judá nugkanam yaakat Jerusalénnum Yuusan ememattasa iruuntai jeanam aarin, tagku ainan maawar ajamnaisartasa wenak, Judá nugkanmaya apun Roboaman wainkar, ju ina apuri atii tuinak winaka mantuawartatui tu enentaimrauwaiti.

²⁸ Nuna tu enentaimrau asa, apu Jeroboam orojai vacan jimaran najana umik shuar ainan chicharuk: “Atumin yuusri jimara ju, atum Egipto nugkanam pujarmin jiirmarua nuka juwaiti, yamaika Yuus ememattasrum Jerusalénnumka wechattarme”, tusa tinaiti.

²⁹ Nuna tusa nina suntaari ainan ju yuus jukirum Betelnum nugkani apujsatarma tusa timau asar turusag chikichnaka apujsaru ainawai. Antsu chikichnaka Dannum nujinmani apujsaru ainawai.

³⁰ Nunaka Israel shuar aina tunaun takasarti tusa turawaiti. Turamu asar Yuusan eme anentas iiyainak emematiartasa Jerusalénnum wetan inaiyainak, shuar ainaka yuus atii tusa najanamun emematiartasa Betelnum tura Dannumsha wejakaruiti.

³¹ Nuiyasha nain ainanam nita yuusrimamuri ainan iruuntrar ememattinan jea ainan jeamkauwaiti. Tura nui takasartin ainan sacerdote arti tusa Leví weantuchu ainan anairauwaiti.

^32-33 Nuiyasha nutikata tusa tichamaitak Jeroboam nigki enentaimas ocho nantutin tsawan quincetin Judá weantu jiistamtai aina nu jiistamami tusa umikuiti. Tura tagku ainan maa ajamnaisauwaiti. Nunaka ni inamramtai vaca aishmagkriya numamtin tsakat najanamu Betelnum ajakua nuna emematuk turawaiti. Tura nita yuusri ememattasa iruuntai jeanam pujusar takasartin ainancha sacerdote arti tusa etegkauwaiti.